Pa nshita imo Yesu alyebele abasambi bakwe icilangililo calelanda pa kutwalilila ukupepa. (Luka 11:5-13) Ilyo aali mu Samaria nalimo mu Galili, na kabili alikomailepo pa fyo cawamina ukulapepa lyonse. Pa kulanda pa busuma bwa kupepa, abashimikile icilangililo na cimbi. Atile:

“Mu musumba umo mwali kapingula umo uushaletiina Lesa kabili uushalecindika abantu. Awe mu musumba ulya wine mwali mukamfwilwa uwaleya kuli ena lyonse, ati, ‘Mwikaleka bakamfyenge ku ulentwala ku cilye.’ Awe palipitile inshita na o kapingula alekaana fye. Lelo pa numa asosele mu mutima ati, ‘Nelyo nshitiina Lesa kabili nshacindika umuntu, kwena, pa mulandu wa kumpamfya lyonse kuli uyu mukamfwilwa, nshakaleke bakamufyenge, pa kuti elaisa lyonse mu kuncusha.’”—Luka 18:2-5.

Lyena Yesu alandile pa fyo twingasambililako. Atile: “Mwaumfwa ifyo kapingula asosa, nangu ca kuti te mulungami? Bushe kanshi Lesa takaleke ukuti kube umulinganya ku basalwa bakwe abalilila kuli ena akasuba no bushiku, nangu ca kuti alabatekanishisha?” (Luka 18:6, 7) Finshi Yesu alesambilisha abantu pali Wishi?

Yesu taloseshe mu kuti Yehova Lesa aaba nga ulya kapingula umubifi. Lelo alelanda pa fyo Lesa ashalingana na bantunse: Nga ca kuti kapingula umuntunse kabili uushalungama kuti ayafwa umuntu pa mulandu wa kuti alemupamfya, Lesa ena kuti acishapo ukwafwa uulemulomba. Lesa mulungami kabili musuma, e lyo alaasuka amapepo ya bantu nga batwalilila ukupepa. Ifi e fyo Yesu alandilepo ilyo atile: “Ndemweba, nati, [Lesa] akaleka ukuti kube umulinganya kuli bena bwangu bwangu.”—Luka 18:8.

Abapiina na balanda ilingi line balabafyenga, lelo aba maka na bakankaala balabacindikisha. Lelo te fyo caba kuli Lesa. Inshita nga yafika, akapingula abantu mu mulinganya. Akakanda ababifi, lelo ababomfi bakwe akabapeela umweo wa muyayaya.

Ni bani bakwata icitetekelo nge ca kwa mukamfwilwa? Ni banga bacetekela no mweo onse ukuti Lesa ‘akaleka kukabe umulinganya kuli bena bwangu bwangu’? Yesu e lyo abashimikile fye icilangililo icalelanda pa fyo cawamina ukutwalilila ukupepa. Lyena aipwishe abantu nga balicetekeele ukuti Lesa alasuka amapepo. Atile: “Ilyo Umwana wa muntu akesa, bushe akasanga icitetekelo pano isonde?” (Luka 18:8) Ico alelandapo ca kutila, banono fye nalimo abakaba ne citetekelo ca musango yu ilyo Kristu akesa.

Bamo abo Yesu alelanshanya nabo, balisuulile abantu bambi kabili baleimona kwati ba citetekelo e lyo balilungama. Aba ebo Yesu alefwaya bomfwe ici cilangililo icaleti:

“Abantu babili baile mu kupepa mwi tempele, umo ali muFarise na umbi ali kasonkesha wa misonko. UmuFarise aiminine alapepa mu mutima ati, ‘Mwe Lesa, ndemutootela ico nshaba nga bantu bambi abashala, abapuupu, abashalungama, abacende, nangu ngo yu kasonkesha wa misonko. Ndaleka ukulya imiku ibili mu mulungu, kabili mpeela ica pe kumi ica pali fyonse ifyo nanonka.’”—Luka 18:10-12.

 AbaFarise balitemenwe ukuilanga ku cintubwingi ukuti balungami pa kuti abantu balebacindika. Pa kuti abantu abengi babamone, baleleka ukulya pali Cimo na pali Cine, pa nshiku ilyo pa maliketi paleba abantu abengi abaleya ku kushita no kushitisha ifintu. Balepeela ne ca pe kumi ica tuntu utunono pamo nga imisalu. (Luka 11:42) Mu myeshi yafumineko, balisaalwile abantu yaweyawe abati: “Ili ibumba ilishaishiba Amafunde [ukulingana ne fyo abaFarise balemona] lyalitiipwa.”—Yohane 7:49.

Yesu alitwalilile ukushimika icilangililo ati: “Lelo kasonkesha wa misonko uwaiminine akatalamukila, talefwaya no kulolesha mu muulu, lelo aleuma fye pa cifuba no kulasosa ati: ‘Mwe Lesa, mbeleleni uluse ne mubembu.’” Apo kasonkesha wa misonko ali-icefeshe pa kuyeeba ukuti mubembu, Yesu atile: “Ndemweba nati uyu kasonkesha wa misonko aile ku ng’anda ku mwakwe uwalungama ukucila ulya muFarise; pantu onse uwaicindamika bakamuceefya, lelo onse uwaiceefya bakamucindamika.”—Luka 18:13, 14.

Muli ici cilangililo, Yesu alisambilishe abasambi ukuti ukuicefya kwalicindama. Ili isambililo lyalicindeme ku basambi pantu bakuliile mu cifulo umwali abaFarise abaleimona ukuti balungami kabili ababikile sana amano ku kukwatwa ififulo. Ifyo abasambilishe fyalicindama ku basambi ba kwa Yesu bonse.