Ilyo Yesu abuushiwe, alipekenye ukuti akamonane na batumwa bakwe 11, pa lupili mu Galili. Abasambi na bambi nalimo 500, e ko baali kumo na balya abaletwishika pa kubalilapo ukuti nabuuka. (Mateo 28:17; 1 Abena Korinti 15:6) Ifyo Yesu alandile pali iyi nshita fyalengele ukuti bonse bashininkishe ukuti nabuuka.

Yesu abebele ukuti Lesa alimupeele amaka yonse mu muulu na pano isonde. Atile: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukulakonka fyonse ifyo namwebele.” (Mateo 28:18-20) Yesu alibuuka ku bafwa kabili alibika sana amano ku mulimo wa kushimikila imbila nsuma.

Abasambi ba kwa Yesu bonse, abaume na banakashi, ukubikako fye na baice, balikwata umulimo uwa kulenga abantu ukuba abasambi. Abantu bambi kuti balebakaanya ukushimikila imbila nsuma no kusambilisha abantu, lelo Yesu alibalaya ati: “Nabampela amaka yonse mu muulu na pano isonde.” Bushe abasambi ba kwa Yesu bamona ukuti aya amashiwi yalola mwi? Yesu abebele no kuti: “Moneni! nakulaba na imwe inshiku shonse mpaka na ku mpela ya calo.” Yesu talelanda ukuti bonse abashimikila imbila nsuma bakakwata amaka ya kucita ifisungusho. Na lyo line, umupashi wa mushilo wali no kulabafwa ukubomba imilimo ya kwa Lesa.

Yesu alimoneke ku basambi bakwe pa “nshiku amakumi yane (40)” ukutula apo abuukiile. Alemoneka mu mibili ya buntunse kabili aliilangile “uwa mweo ku batumwa bakwe ukupitila mu bushininkisho bwine bwine ubwingi,” e lyo alebeba na pa “Bufumu bwa kwa Lesa.”—Imilimo 1:3; 1 Abena Korinti 15:7.

Na kuba, ilyo abatumwa baali mu Galili, Yesu abebele ukubwelelamo ku Yerusalemu. Ilyo aali nabo mu Galili abebele ukuti: “Mwifuma mu Yerusalemu, lelo mulelolela ico Tata alaya, ico mwaumfwile kuli ine; pantu Yohane, ena, alebatishisha mu menshi, lelo tapakapite inshiku ishingi, imwe mukabatishiwa mu mupashi wa mushilo.”—Imilimo 1:4, 5.

Yesu na kabili alikumene na batumwa bakwe kabili abatwele “mupepi fye na ku Betani,” iyabelele ku kabanga ka Lupiili lwa Miolife. (Luka 24:50) Nangu ca kuti Yesu alibebele ukuti aali no kuya ku muulu, abasambi bakwe pali iyi nshita baletontonkanya ukuti Ubufumu bwakwe bukabela pano calo.—Luka 22:16, 18, 30; Yohane 14:2, 3.

Abatumwa baipwishe Yesu abati: “Mwe Shikulu, bushe ni pali ino nshita mulebwesesha ubufumu kuli Israele?” Yesu abaswike ati: “Te mulimo wenu ukwishiba inshita atemwa imyaka, pantu Tata e wakwatapo amaka pali ifyo.” Nomba ilyo alelanda pa mulimo baali no kulabomba, Yesu abebele ukuti: “Mukapokelela amaka ilyo umupashi wa mushilo ukesa pali imwe, kabili mukaba inte shandi mu Yerusalemu na mu Yudea monse na mu Samaria, na ku mpela ya pano isonde.”—Imilimo 1:6-8.

Abatumwa baali pa Lupili lwa Miolife na Yesu ilyo atendeke ukuya ku muulu. Ikumbi lyalimufimbile e lyo baleka no kumumona. Ilyo abuushiwe, Yesu alemonekela mu mubili wa buntunse. Pali iyi nshita, Yesu alishiile umubili wa buntunse, kabili ilyo aile ku muulu aali mupashi. (1 Abena Korinti 15:44, 50; 1 Petro 3:18) Ilyo abatumwa balelolekesha uko Yesu aleya ku muulu, “abaume babili abafwele ifyabuuta” balimoneke. Aba ni bamalaika abamonekele mu mibili ya buntunse, kabili baipwishe abatumwa abati: “Mwe bena Galili, cinshi ico mwiminine pano mulelolesha mu muulu? Uyu Yesu uwasendwa pali imwe ukuya mu muulu akesa mu musango umo wine uo mwamumwenamo aleya mu muulu.”—Imilimo 1:10, 11.

Takwali abantu na bambi abamweneko ilyo Yesu alebwelelamo ku muulu kano fye abasambi bakwe aba citetekelo. Yesu akesa “mu musango umo  wine,” kabili abantu abengi tabekeshibe ukuti aalisa, kano abasambi bakwe aba citetekelo e bakeshiba ukuti alitendeka ukuteka.

Abatumwa balibwelelemo ku Yerusalemu. Mu nshiku shakonkelepo, balilongene capamo na basambi bambi, ukubikako fye na “Maria nyina wa kwa Yesu pamo pene na bamunyina ba kwa Yesu.” (Imilimo 1:14) Aba batwalilile fye ukupepa kabili balipepele pa kusanga umusambi uwali no kupyana Yuda Iskariote, pa kuti impendwa ya batumwa ikakumane 12 na kabili. (Mateo 19:28) Balefwaya umusambi uwamweneko uko Yesu alecita ifisungusho kabili uwamweneko nelyo abuukile. Pa kusala umusambi, bapoosele ica kupendwilako, kabili uyu e muku wa kulekeleshako uo Baibolo yalandapo pa kupendula. (Amalumbo 109:8; Amapinda 16:33) Basalile Matia, uwali pa basambi 70 abo Yesu atumine, kabili “bamusanshishe ku batumwa 11.”—Imilimo 1:26.

Ilyo papitile inshiku 10 ukutula apo Yesu abwelelemo ku muulu, abaYuda balikwete Umutebeto wa Pentekoste mu 33 C.E. Abasambi 120 balilongene mu muputule wa pa muulu, mu Yerusalemu. Mu kupumikisha kwaumfwike icongo icali kwati cipuupu ca mwela icikali kabili cakumene ing’anda yonse. Kwamoneke indimi ishali kwati mulilo pa mitwe ya bonse abasangilweko. Lilya line fye, abasambi batendeke ukulanda mu ndimi ishalekanalekana. Uyu e mupashi wa mushilo uo Yesu alaile ukutumina abasambi bakwe!—Yohane 14:26.