Yesu asukile apwisha ukusambilisha abatumwa bane ilyo baali pa Lupili lwa Miolife. Abaaswike icipusho ico bamwipwishe pa kubapo kwakwe na pa mpela ya calo.

Ala balikwete ifya kucita ifingi pa Nisani 11! Ilyo balebwelelamo ku Betani uko balesendama, nalimo e lyo Yesu aebele abatumwa bakwe ukuti: “Namwishiba ukuti kwashala fye inshiku shibili ninshi umutebeto wa ca kucilila wafika, e lyo Umwana wa muntu bakamutwala ku kumupoopela pa cimuti.”—Mateo 26:2.

Ubushiku bwakonkelepo, pali Citatu, Yesu afwile aali fye na batumwa bakwe. Ubushiku bwafumineko pali Cibili, Yesu alikalipile intungulushi sha baYuda kabili alisokolwele pa cintubwingi ifyo shalecita. E co balefwaila ukumwipaya. Kanshi, talefwaya ukumonekela ku bantu pa Nisani 12, pantu talefwaya nangu cimo ukupumfyanya umutebo wa Ca Kucilila icali no kubako pa Nisani 14 cilya akasuba kawa.

Lelo intungulushi sha bashimapepo na bakalamba ba mu bantu tabalekelepo fye iyo. Ilyo ubushiku bwa Ca Kucilila bushilafika, balilongene mu lubansa lwa kwa shimapepo mukalamba, Kayafa. Mulandu nshi? Balifulilwe pantu Yesu alesokolola ifyo balecita. Nomba bonse baumene akapi “ukuti bekate Yesu mu bucenjeshi no kumwipaya.” Bushe baali no kucita shani pa kuti bamwikate kabili bapangene ukumwikata lilali? Basosele abati: “Pa mutebeto te po iyo, epali kwaima icimfulunganya mu bantu.” (Mateo 26:4, 5) Baletiina pantu abengi balimutemenwe.

Ilyo intungulushi sha baYuda shalongene, shalipokelele umweni. Ica kupapusha ca kuti ali mutumwa wa kwa Yesu, Yuda Iskariote. Satana alimutunkile ukufutuka Shikulu wakwe! Lyena Yuda abepwishe ukuti: “Cinshi mulempeela nga namufutuka pa kuti mumwikate?” (Mateo 26:15) Ilyo baumfwile ifi balitemenwe kabili “bapangene no  kumupeela indalama sha silfere.” (Luka 22:5) Baali no kumupeela shinga? Basuminishenye ukumupeela indalama sha silfere 30. Amashekele 30 e ndalama baleshitamo umusha umo. (Ukufuma 21:32) Kanshi filya intungulushi sha baYuda shali no kumupeela indalama sha silfere 30, fyalangile ukuti shalisuulile Yesu. Yuda nomba atendeke ‘ukufwaya inshita yalinga iya kumufutukilamo ilyo kushili abantu.’—Luka 22:6.

Ubushiku bwa Nisani 13 bwatendeke icungulo pali Citatu. Ubu e bushiku bwalenga 6 kabili ubo Yesu alekelesheko ukuba mu Betani. Ubushiku bwakonkelepo, baalingile ukupwisha ukupekanya Ica Kucilila. Baalingile ukufwaya umwana wa mpaanga uo bali no kwipaya no kooca pa bushiku bwa Nisani 14. Ni kwi bali no kuliila ica kulya, kabili ni bani bali no kupekanya? Yesu tabebele ifi fyonse. E co Yuda taebeele bashimapepo bakalamba ifi fyonse.

Yesu atumine Petro na Yohane ukufuma ku Betani nalimo pali Cine akasuba, no kubeba ati: “Kabiyeni, mutupekanishishe umutebeto wa ca kucilila, ukuti tulye.” Nabo bamwipwishe abati: “Ni kwi mulefwaya ukuti tupekanishishe?” Na o abebele ati: “Nga mwaingila mu musumba, umuntu uusendele umutondo wa menshi alemukumanya. Mumukonke mu ng’anda umo aleingila. Kabili mwebe umwine wa ng’anda amuti, ‘Kasambilisha atila kuli iwe: “Uli kwi umuputule wa beni umo nalaliila umutebeto wa ca kucilila pamo na basambi bandi?”’ Na o alemulanga umuputule uukalamba uwa pa muulu, uo bapekenye bwino bwino. Umo mwine e mo mupekanishishe ica kucilila.”—Luka 22:8-12.

Ukwabula no kutwishika, umwine wa ng’anda aali musambi wa kwa Yesu. Afwile ale-enekela ukuti Yesu aali no kuliila umutebeto wa Ca Kucilila mu ng’anda yakwe. Ilyo abatumwa bafikile ku Yerusalemu, basangile fyonse nafipekanishiwa ukulingana ne fyo Yesu abebele. Awe e fyo bapekenye umwana wa mpaanga na fyonse ifyalefwaikwa pa mutebeto wa Ca Kucilila, ifingakumana abantu 13, e kutila Yesu na batumwa bakwe 12.