Pali Cibili pa 11 April, abengi abaleka ukulongana no kushimikila bakesa ku Cibukisho. Balitendeke ukubutuka ulubilo lwa ku bumi nomba kwaliba ifingi ifyalenga ukuti baleke ukubutukisha pali ino nshita kabili fimo balifilandapo muli broshuwa itila Bweleleni Kuli Yehova. (Heb. 12:1) Yehova amona abaleka ukulongana no kushimikila ukuti bamutengo pantu abashitile mu mulopa wa Mwana wakwe. (Imil. 20:28; 1 Pet. 1:18, 19) Kuti twabafwa shani pa kuti babwelele mu cilonganino?

Baeluda balafwaya Abena Kristu abaleka ukulongana no kushimikila nga filya fine kacema abombesha ukufwaya impanga ishilubile. (Luka 15:4-7) Ukucita ifi kulanga fye ifyo Yehova asakamana abantu bakwe. (Yer. 23:3, 4) Bonse fye kuti twakoselesha abaleka ukulongana no kushimikila, te mulimo fye wa baeluda. Nga twabombesha ukulanga abanensu icikuuku, Yehova akatemwa kabili tukaba ne nsansa. (Amapi. 19:17; Imil. 20:35) Kanshi tontonkanyeniko pa bo mwingatemwa ukukoselesha kabili yangufyanyeni ukubakoselesha.

TAMBENI VIDIO ITILA MULEKOSELESHA ABALEKA UKULONGANA NO KUSHIMIKILA, LYENA LANSHANYENI IFI FIPUSHO:

• Finshi ba Abbey bacitile ilyo bamonene na Nte uo bashaishibe?

• Mulandu nshi tulingile ukulandila na baeluda ilyo tushilaya mu kwafwa uwaleka ukulongana no kushimikila?

• Bushe ba Abbey bapekenye shani ukuyatandalila ba Laura pa muku walenga bubili?

• Bushe ba Abbey balangile shani umupampamina, ukutekanya no kutemwa ilyo balekoselesha ba Laura?

• Finshi twingasambilila ku cilangililo ca kwa Yesu icalembwa pali Luka 15:8-10?

• Fisuma nshi fyafuminemo pa fyo bamunyinefwe babombeshe ukwafwa ba Laura?