Paulo na Sila balelumbanya Lesa mu nyimbo ilyo bali mu cifungo. (Imil. 16:25) Bakapepa banensu baleimba inyimbo sha Bufumu ilyo bali mu nkambi ya kucushishamo abantu iya Sachsenhausen iya baNazi ku Germany na lintu babatwele ku Siberia. Ifi twalandapo filelanga fye ifyo inyimbo shafwa Abena Kristu abali na mafya ukuba abashipa.

Mu ndimi ishingi, abantu bali no kukwata icitabo ca nyimbo icipya icitila, Imbileni Yehova ne Nsansa. Ilyo tukakwata ici citabo, tukalaishiba amashiwi ya mu lwimbo nga ca kuti ilyo tuli pa mapepo ya lupwa tulesambilila ifya kwimba ishi inyimbo. (Efes. 5:19) Lyena umupashi wa mushilo ukalatwafwa ukwibukisha ishi inyimbo ilyo twaba na mafya. Inyimbo sha Bufumu kuti shatwafwa ukulatontonkanya pe subilo twakwata. Kuti shatusansamusha ilyo tuli na mafya. Kabili nga natusansamuka, amashiwi ya kusansamusha ayali mu lwimbo yalatwafwa ukwimba ne nsansa pantu ninshi umutima wesu nausekelela. (1 Imila. 15:16; Amalu. 33:1-3) Kanshi natuleesha na maka yesu yonse ukulaimbako inyimbo shesu isha Bufumu.

TAMBENI VIDIO ITILA ULWIMBO ULWALEKOSELESHA ABASHA. LYENA ASUKENI IFI FIPUSHO:

• Finshi fyalengele ukuti munyina Frost alembe ulu ulwimbo?

• Bushe ulu lwimbo lwalekoselesha shani bamunyina abali mu nkambi ya kucushishamo abantu iya Sachsenhausen?

• Fintu nshi ifingamucitikila ifingalenga inyimbo sha Bufumu ukumukosha?

• Ni nyimbo nshi isha Bufumu isho mwingatemwa ukulaibukisha?