Yesu aebele abasambi bakwe ukuya mu kulenga abantu ukuba abasambi. (Mat. 28:19) Ici calola mu kuti tufwile ukubashimikila na ukusambilisha. Nga papita inshita, tufwile ukuyipusha ukuti, ‘Bushe kuti nawamyako shani ifyo momba umulimo wa kupanga abasambi?’

Mu nshita ya kuti tulelolela abantu ukwisa kuli ifwe, tufwile ukuya no kubombesha ukufwaya ‘abafwaya ukumfwa.’ (Mat. 10:11) Ilyo tulebomba umulimo wa kubila imbila nsuma, bushe tulabikako amano ku ‘basangwa’ apali ponse apo tuli pa kuti twabashimikilako nabo? (Imil. 17:17) Lidia aishileba umusambi pa mulandu wa fyo umutumwa Paulo alebombesha ukubila imbila nsuma.—Imil. 16:13-15.

TAMBENI VIDIO ITILA TWALILILENI UKUSHIMIKILA ABANTU “UKWABULA UKULEKA”—UBUNTE BWA MU LYASHI NA KU NG’ANDA NE NG’ANDA, LYENA ASUKENI AYA AMEPUSHO:

• Bushe ba Samuel balelanga shani mu fyo balecita cila bushiku ukuti balefwaisha ukubyala imbuto sha cine?

• Cinshi tulingile ukutwalilila ukushipikisha ilyo tulebila imbila nsuma mu nshila ishalekanalekana?

• Ilyo mulecita ifyo mucita cila bushiku, ni bani mwingabilako imbila ya Bufumu?

Pa kuti tupange abasambi, tatufwile fye ukupeela abantu impapulo. Tulingile na ukucita ifipempu fya kubwelelamo no kutungulula amasambililo ya Baibolo pa kuti abasambi balunduluke mu fya kwa Lesa. (1 Kor. 3:6-9) Nomba kuti twacita shani umuntu nga talelunduluka nangu ca kuti twabombesha ukumusambilisha? (Mat. 13:19-22) Tufwile ukutwalilila ukulafwaya abo imitima yaba nga ‘umushili uusuma.’—Mat. 13:23; Imil. 13:48.

TAMBENI VIDIO ITILA TWALILILENI UKUSHIMIKILA ABANTU “UKWABULA UKULEKA”—KU CINTUBWINGI KABILI MULEPANGA ABASAMBI, LYENA ASUKENI AYA AMEPUSHO:

• Bushe ba Solomon na ba Mary batapilile shani imbuto sha cine mu mitima ya ba Ezekiel na ba Abigail?

• Cinshi tulingile ukulafwaisha ukufikilisha ilyo tulebila imbila nsuma, kumo fye na mu bunte bwa ku cintubwingi?

• Kuti twacita shani pa kuti tubike sana amano ku kusambilisha abantu icine?