Nangu ca kuti mu nshiku sha kwa Yakobo Yehova ninshi talapeele abantu amafunde ayalelesha ukupepa tulesa tumbi, Yakobo alishibe ukuti Yehova afwaya fye ukupepwa eka. (Ukufu. 20:3-5) E ico ilyo Yehova aebele Yakobo ukubwelela ku Betele, Yakobo aebele aba mu ng’anda yakwe ukumupeela utulubi tonse uto bakwete. Pa numa Yakobo alitupoosele, apali na uto balefwala ku matwi, nalimo ico baletufwalila ni co twali ni mpinga. (Ukute. 35:1-4) Ukwabula no kutwishika Yehova alitemenwe ifyo Yakobo acitile.

Nga muno nshiku, kuti twacita shani pa kuti tulepepa fye Yehova eka? Cimo icacindama ico tushilingile ukucita, kulapepa utulubi nelyo ukupupe mipashi. Ici cisanshishemo ukupoosa fyonse ifyakuma imipashi no kulasala bwino ifyo tuleseshamo icitendwe. Yipusheni amuti: ‘Bushe nalitemwa ukubelenga amabuuku nelyo ukutamba amafilimu umuba ifibanda ifyonka abantu umulopa, ifipuuku e lyo ne fiwa? Bushe ifyo ntamba nelyo ifyo mbelenga filenga camoneka kwati ifinjelengwe nelyo ubuloshi fyaliba fye bwino?’ Tufwile ukupata fyonse ifyo Yehova apata.—Amalu. 97:10.

TAMBENI VIDIO ITILA “KAANENI KASEEBANYA,” KABILI PA NUMA ASUKENI AYA MEPUSHO:

• Bwafya nshi Palesa umusambi wa Baibolo akwete?

• Mulandu nshi cacindamina ukwebako baeluda nga ca kuti muli no bwafya nelyo uo musambilisha Baibolo ali no bwafya ubukumine imipashi?

• Nga tulefwaya Yehova aletucingilila, finshi tulingile ukutalukako?

• Finshi ba Palesa bacitile?

• Fintu nshi fimo ifyo mwingacita uko mwikala pa kuti mwilaumfwana ne mipashi?