Yesu afwilile abantu abashapwililika. (Rom. 5:8) Bonse tulatasha pa fyo Yesu alangile ukuti alitutemenwe no kutufwila. Na lyo line, tufwile ukulaibukishako ukuti Yesu alifwilile na bamunyinefwe. Nga filya Yesu acitile, kuti twalanga shani ukuti twalitemwa bamunyina na ba nkashi abashapwililika nga ifwe? Natulande pa fintu fitatu ifyo twingacita. Ica kubalilapo, tufwile ukupanga ifibusa na bantu abo twapusana nabo inkulilo. (Rom. 15:7; 2 Kor. 6:12, 13) Ica bubili, tulingile ukuba abacenjela pa kuti tatulandile nelyo ukucita ifintu ifingalenga bambi bapunwishiwa. (Rom. 14:13-15) Ne calenga butatu, ngo muntu umo atubembukila tulingile ukwangufyanya ukumweleela. (Luka 17:3, 4; 23:34) Nga ca kuti tulepashanya Yesu muli ishi inshila twalandapo, Yehova akatwalilila ukupaala icilonganino kabili mukaba umutende no kwikatana.

TABENI VIDIO ITILA MULEBELAKO FYE ABENA KRISTU ABASUMA! KABILI ASUKENI AYA MEPUSHO:

• Bushe ba Miki balemona shani icilonganino cabo ilyo baileko fye?

• Cinshi calengele baluke mu fyo balemona icilonganino?

• Bushe ica kumwenako ca kwa Yesu cayafwile shani ba Miki ukwaluka? (Marko 14:38)

• Bushe Amapinda 19:11 kuti yatwafwa shani ukulamona ifisuma mu Bena Kristu banensu?