Cinshi tulingiile ukulayampanina na bantu abatemwa Yehova? Pantu abantu tusangwa nabo kuti balenga twalacita ifisuma nelyo ifyabipa. (Amapi. 13:20) Ku ca kumwenako, Imfumu Yehoashi yalecita “ifisuma mu menso ya kwa Yehova” ilyo yalesangwa na Shimapepo Mukalamba Yehoyada. (2 Imila. 24:2) Nomba ilyo Yehoyada afwile, Yehoashi alishiile Yehova pantu atendeke ukwampana na bantu abalecita ifyabipa.—2 Imila. 24:17-19.

Mu nshita ya batumwa, umutumwa Paulo alingenye icilonganino ca Bena Kristu ku “ng’anda iikalamba” kabili alingenye abali mu cilonganino ku “fipe.” Finshi tulingile ukucita pa kuti tutwalilile ukuba “icipe ica mucinshi”? Tatulingile ukulayampana no uli onse nampo nga ni lupwa nelyo nga wa mu cilonganino uushicita ifyo Yehova afwaya. (2 Tim. 2:20, 21) Abantu tulingile ukusala ukuba ifibusa fyesu, bantu abatemwa Yehova kabili abengatukoselesha ukulamubombela.

TAMBENI VIDIO ITILA MWILAYAMPANA NA BAKWATA IMIBELE YABIPA, LYENA ASUKENI AMEPUSHO YAKONKAPO:

• Bushe kuti twatendeka shani ukwampana na bantu baba ne misango yabipa ukwabula no kwishiba?

• Muli vidio twacitamba, finshi fyayafwile Abena Kristu batatu ukuleka ukwampana na bantu baba ne mibele yabipa?

• Mashinte nshi aya mafunde aya mu Baibolo ayengamwafwa ukusala bwino ifibusa?