Ukutula mu 2018, mu Ulupungu lwa kwa Kalinda ulwa bantu bonse muba fye ilyashi limo, ifi fine e fyo ciba na kuli Loleni!. Aya yonse amamagazini yaba pa Mpapulo Tubomfya Sana pa Kusambilisha Abantu. Kanshi tulingile ukulayabomfya ilyo tulebila imbila nsuma. Kuti twasendako magazini ilyo tuli pa bulendo nelyo ilyo twile mu kushita ifintu. Tatubomfya magazini ukusambilishishamo abantu Baibolo, lelo kuti yalenga umuntu alafwaya ukusambilila pali Lesa.

Nga mwatendeka ukulanshanya no muntu, kuti mwamubelengelako ilembo kabili kuti mwalandako na fimo ifili muli magazini ifyo mumwene ukuti uyo muntu kuti afitemwa. Ku ca kumwenako, nga ca kuti uo mulelanshanya nankwe alikwata ulupwa nelyo ali no bulanda nelyo amasakamika kuti mwamweba ati: “Nalibelengeleko fimo pali ilyo lyashi, fyali muli iyi magazini.” Nga mwamona ukuti uo mulelanshanya nankwe kuti afwaya ukumfwilapo na fimbi, kuti mwamupeela iyo magazini nelyo ukumutumina pa foni nangu ca kuti e muku wa kubalilapo mwalanshanyapo nankwe. Nangu ca kuti tatubika fye amano ku kupeela abantu magazini, kuti yatwafwa ukwishiba abalefwaya ukusambilila.—Imil. 13:48.