Nga ca kuti muli basambi ba Baibolo nelyo ni mwe bakasabankanya bacaice abashabatishiwa, bushe mulafwaya ukubatishiwa? Cinshi mulingile ukubatishiwilwa? Pantu pa kuti mube ifibusa fya kwa Yehova mulingile ukuipeela no kubatishiwa. (Amalu. 91:1) Ulubatisho kuti lwalenga mwaisapusuka. (1 Pet. 3:21) Finshi mufwile ukucita pa kuti mukafikepo ukubatishiwa?

Mulingile ukushininkisha ukuti ifyo musambilila e cine. Nga kuli ifipusho ifyo mushishibe ifyasuko, mulingile ukufwailapo ifyebo. (Rom. 12:2) Nga mwamona ukuti kuli mumo umo mulingile ukwaluka, muleshininkisha ukuti icilelenga mulefwaya ukwaluka nico mulefwaya ukulenga Yehova alesekelela. (Amapi. 27:11; Efes. 4:23, 24) Na kabili mulepepa lyonse ukuti Lesa alemwafwa. Yehova akamukosha no kumutungilila ukubomfya umupashi wakwe uwa mushilo. (1 Pet. 5:10, 11) Ukubombesha kwenu takwakaye fye nga mu menshi. Takwaba icawama ukucila pa kubombela Yehova.—Amalu. 16:11.

TAMBENI VIDIO ITILA IFYO UMUNTU ENGACITA PA KUTI ABATISHIWE, LYENA ASUKENI AMEPUSHO YAKONKAPO:

• Mafya nshi bamo bacimfishe pa kuti babatishiwe?

• Finshi mulingile ukucita pa kuti mukwate icitetekelo icingalenga mwafwaya ukuipeela kuli Yehova?

• Finshi fyalengele bamo babombeshe pa kuti bafikepo ukubatishiwa?

• Bushe Yehova apaala shani abasalapo ukulamubombela?

• Bushe ukuipeela no kubatishiwa kwalola mwi?