Cinshi twatemenwa sana ukulongana kwa citungu? Nga filya fine cali ku bena Israele, ukulongana kwa citungu kulalenga tulepepela pamo na ba bwananyina abengi. Twalitemwa fyonse ifyo tusambilila ifitwafwa ukuba ifibusa fya kwa Yehova. Na kabili tulatemwa ukuba pamo na balupwa ne fibusa. Apo tulatasha sana pali uku kulongana kwa citungu, e cilenga tulelongana inshiku shonse shitatu.

Kanshi lyonse ilyo tulelongana pamo na ba bwananyina, tatufwile ukulatontonkanya fye pa fyo twinganonkelamo lelo tufwile no kulatontonkanya pa fyo twingabalanga ukuti twalibatemwa. (Gal. 6:10; Heb. 10:24, 25) Tulanga ukuti twalitemwa aba bwananyina nga twabeswilako ifiibi nelyo ukukanaikatila ifipuna. (Fil. 2:3, 4) Ukulongana kwa citungu kulalenga twakwata ifibusa ifipya. Ilyo ukulongana kushilatendeka nelyo ilyo kwapwa kabili na lintu tuli pa kutuusha, tule-esha ukulalanshanyako na bantu abo tushaishiba. (2 Kor. 6:13) Ifibusa tupanga pali uku kulongana kuti fyaba ifibusa fya cine cine. Kabili abantu nga bamona ifyo twatemwana nabo kuti bafwaya ukubombela Yehova.—Yoh. 13:35.

TAMBENI VIDIO ITILA UKULONGANA KWA CITUNGU UKWA BAFUMA MU FYALO IFINGI UKWALETI “UKUTEMWA TAKUPWA”!, LYENA ASUKENI AMEPUSHO YAKONKAPO:

• Bushe abafumine mu fyalo fimbi abaile ku kulongana kwa citungu ukwa mu 2019 babalangile shani ukutemwa?

• Cinshi twingalandila ukuti ukutemwana no kwikatana ukwaba pa bantu ba kwa Lesa kwali-ibela icine cine?

• Finshi fimo ifyo aba mwi Bumba Litungulula balandilepo ifyo Abena Kristu balanga ukuti balitemwana?

• Bushe ukutemwa kwalenga shani bamunyinefwe mu Germany na mu South Korea babe abaikatana?

• Finshi tufwile ukulafwaisha ukucita?