Twikala mu calo umwaba abantu abatila ubusuma bubi no bubi abati busuma. (Esa. 5:20) Ku ca bulanda abantu bamo balacita ifyo Yehova apata, ukubikako fye na baume ukulanga icintemwa ku baume banabo na banakashi ukulanga icintemwa ku banakashi banabo e lyo no kuulungana nabo. Abana be sukulu banabo e lyo na bantu bambi kuti bafwaya ukubeleleka abana besu ukulacitako ifyabipa ifyo bacita. Kuti mwasambilisha shani abana benu ukwishiba ifyo balingile ukucita nga batunkwa ukucita ifyabipa?

Mulesambilisha abana benu pa fyo Yehova afwaya balecita. (Lebi 18:3) Ilyo mulelanshanya na bana benu pa kwampana kwa mwaume no mwanakashi, ifyebo mulebeba filingile ukulingana no mushinku balipo. (Amala. 6:7) Yipusheni amuti: ‘Bushe nalisambilisha abana bandi inshila iisuma iya kulangilamo ukutemwa, ico cacindamina ukulafwala bwino, e lyo ne fyebo ifyo bashilingile ukwebako abantu bambi ne fyo bengabeba? Bushe abana bandi balishiba ifya kucita umuntu nga afwaya ukubatambisha ifye shiku nelyo abeba ukucita ifyo Yehova apata? Ni filya batila limbula isansa ilyo lishilalimba mishila, kanshi nga mwafundila limo abana ninshi mwabacingilila. (Amapi. 27:12; Luk. Mil. 7:12) Kabili ninshi tulelanga ukuti twalitemwa ubupyani ubo Yehova atupa.—Amalu. 127:3.

TAMBENI VIDIO ITILA MULEKUULA ING’ANDA IIKATWALILILA UKUBA IYAKOSA—MULECINGILILA ABANA BENU KU “FYABIPA,” LYENA ASUKENI AMEPUSHO YAKONKAPO:

• Mulandu nshi abafyashi bamo cibafisha ukufundila abana babo pa kwampana kwa mwaume no mwanakashi?

• Mulandu nshi abafyashi balingile ukusambilishisha abana babo “ukulingana no kusalapula kwa kwa Yehova no kukonkomesha kwakwe”?—Efes. 6:4

• Finshi icilonganino ca kwa Yehova capekanya ifyafwa abafyashi ukusambilisha abana babo pa kwampana kwa mwaume no mwanakashi?—w19.05 ibu. 12, akabokoshi

• Mulandu nshi mulingile ukulalanshanishisha lyonse na bana benu ilyo amafya yashilaisa?