Cinshi mufwile ukulaebela abafyashi benu ifyo muletontonkanya ukwabula ukupita mu mbali? (Amapi. 23:26) Pantu Yehova alibapeela umulimo wa kumusakamana no kumutungulula. (Amalu. 127:3, 4) Tabakulaishiba ifyo bengacita pa kuti bamwafwe nga ca kuti tamulebeba ifyo muletontonkanya ne filemusakamika. Kabili tamwakulasambililako ku fyo baishiba ukutula apo bafyalilwa. Bushe calibipa inshita shimo ukukanaebako abafyashi fimo? Tacabipa lelo ufwile ukushininkisha ukuti taubepele abafyashi bobe.—Amapi. 3:32.

Kuti wacita shani pa kulanda na bafyashi bobe? Ulesala inshita iisuma iyo ulemona ukutila kuti ya kuwamina kabili kuti ya wamina na bafyashi bobe. Nga ca kuti inshita iisuma te kuti imoneke, nalimo kuti wabalembela inkalata no kubalondolwela ifyo uletontonkanya. Inga nga ca kuti balefwaya ukuti mulanshanye pe lyashi ilyo ushingatemwa ukulandapo? Uleibukisha ukuti ico balefwaya ku kwafwa. Ulemona ukuti ico abafyashi bobe babelako, ku kwafwa te balwani bobe awe. Nga ule-esha na maka yobe yonse ukulanshanya na bafyashi bobe, ifintu fikakuwamina umuyayaya!—Amapi. 4:10-12.

TAMBENI VIDIO ITILA AMAFYA FWE MISEPELA TUKWATA—KUTI NALANSHANYA SHANI NA BAFYASHI BANDI?, LYENA ASUKENI AMEPUSHO YAKONKAPO:

• Finshi ba Esther na ba Partik baishileishiba?

• Finshi mwingasambilila kuli Yesu?

• Finshi abafyashi benu bacita pa kulanga ukuti balamusakamana?

• Mashinte nshi aya mafunde ya mu Baibolo ayengamwafwa ilyo mulefwaya ukulanda na bafyashi benu?