Mu mweshi wa September, tukabombesha ukutendeka amasambililo ya Baibolo ku bantu abengi ukubomfya broshuwa ya Kuti Mwaba ne Nsansa Umuyayaya!. Bakasabankanya kuti basalapo ukubomba bupainiya bwakwafwilisha ubwa ma-awala 30. Bushe tukabomba shani iyi kampeni?

• Pa Muku wa Kubalilapo: Kuti mwabomfya ifyebo fyaba ku numa ya broshuwa pa kuti umuntu afwaishe ukukutika, lyena kuti mwamulanga ifyo tucita pa kusambilila Baibolo. Tamufwile ukulaba ukulanda na bantu abo mwalanshenyepo nabo kale lelo abalefwaya ukukutika, kabili mufwile no kubwelela ku fipempu. Nangu ca kuti kale balikeene ukusambilila, nalimo uno muku kuti basumina ukusambilila ukubomfya inshila iipya e lyo na broshuwa iipya. Tatufwile ukulasha amabroshuwa pa mayanda apashili abantu nelyo ukusha broshuwa iyo tubikile muli makalata ku bantu abashatemenwe sana ifyo twalanshenye nabo lelo abashili pa ng’anda. Komiti ya Mulimo iya Cilonganino kuti yapekanya ukuti kukaleba ukukumana kwa kuya mu mulimo wa mwi bala na kumbi mu kati ka mweshi pa kuti mukalelanshanyako ifikumine kampeni.

• Fimbi Ifyo Mwingacita: Nga ca kuti icilonganino cenu cilabomfya ka standi ka mpapulo, ninshi mulingile ukulabikapo broshuwa itila Kuti Mwaba ne Nsansa Umuyayaya!. Kuti mwaeba abalesendapo impapulo shesu ukuti nga ca kuti basenda broshuwa ninshi kuti batendeka no kusambilila Baibolo ukwabula ukulipila. Kuti mwabalanga ifyo tusambilila Baibolo palya pene fye nelyo kuti mwalanshanya ukuti mukabalange inshita imbi. Kangalila wa mulimo kuti atantika ukuti bakasabankanya ababeelesha bakabileko imbila nsuma ku fifulo fya makwebo e lyo no kutendeka amasambililo ya Baibolo. Kuti mwatendeka amasambililo ya Baibolo kubo mubomba nabo kabili kuti mwabombako no bunte bwa mu lyashi ku bantu mulekumanya.

Yesu atwebele ‘ukulenga abantu ukuba abasambi,’ no ‘kulabasambilisha.’ (Mat. 28:19, 20) Nge fyo Yesu atwebele, mukwai natukabombeshe ukusambilisha abantu muli iyi kampeni yaibela ukubomfya ulupapulo lutila Kuti Mwaba ne Nsansa Umuyayaya!