ICO CACINDAMINA: Ukuisambilisha Icebo ca kwa Lesa kulatwafwa ukuba na maka ya “kulingulula . . . ifyaba ubwipi no butali no kulepa no kushika” kwa cine. (Efes. 3:18) Na kabili kulatwafwa ukutwalilila ababula umulandu kabili aba kaele mu calo umwaba abantu abapondama kabili abapotama, no “kwikatisha icebo ca mweo.” (Fil. 2:15, 16) Ilyo tuleisambilisha Icebo ca kwa Lesa tulaisalila ifyebo ifingatwafwa mu bumi bwesu. Finshi tulingile ukucita pa kuti tulenonkelamo sana ilyo tulebelenga no kuisambilisha Baibolo?

IFYO MWINGACITA:

• Muleshila mu fikomo kabili mulelemba ifyebo muli Baibolo yenu, nampo nga ni pa foni nelyo pa tabuleti

• Muleyipusha aya mepusho ilyo mulebelenga Icebo ca kwa Lesa: ‘Cinshi? Mulandu nshi? Ni lilali? Cali shani? Ni kwi? Ni nani?’

• Mulefwaya ifishinka. Mulebomfya ifyo twakwata ifitwafwa ukusanga ifyebo ilyo mulefwailisha ifishinka pa lyashi nelyo pe lembo lya mu Baibolo

• Muletontonkanya sana pa fyo mulebelenga pa kuti muleiluka ifyo mwingabomfya ifyo mulebelenga

• Cila bushiku mulebomfya ifyo mulesambilila.—Luka 6:47, 48

TAMBENI VIDIO ITILA MULEISAMBILISHA SANA ICEBO CA KWA LESA LYONSE, LYENA ASUKENI AMEPUSHO YAKONKAPO:

• Bushe bamo balondolola shani ukuisambilisha Baibolo?

• Mulandu nshi tulingile ukupepela ilyo tushilatendeka ukuisambilisha Baibolo?

• Finshi fingatwafwa ukumfwikisha ifyo tulebelenga mu Baibolo?

• Fishibilo nshi fimo ifyo twingabika muli Baibolo tubomfya pa kuisambilisha?

• Mulandu nshi ukutontonkanya sana pa fyo tuleisambilisha mu Cebo ca kwa Lesa kwacindamina?

• Finshi tulingile ukucita nga twaisambilisha?