Ukutendekela mu January 2018, mu Akatabo ka Kubomfya pa Kulongana kwa Imikalile ya Bwina Kristu no Mulimo Tubomba pe buula lya kubalilapo, palaba icipande citila Ifyo Mwingalanda. Bushe tubomfya shani ifyaba pali ici cipande?

Nga Mulelanda Ilyashi lya Musambi: Mufwile ukubomfya icipusho, ilembo e lyo ne cipusho mukalanshanyapo iciba pali ici cipande. Na lyo line, ici tacilolele mu kuti mufwile ukulanda filya fine fye ifiba mu vidio ya ifyo mwingalanda. Kuti mwaipekanishisha intendekelo, inshila mwalalandilamo e lyo na fimbipo. Na kabili kuti mwapeela umuntu ulupapulo ulwaba pa Impapulo Tubomfya Sana pa Kusambilisha Abantu nangu ca kuti tabamwebele ukucita ifi pa kulanda ilyashi.

Ilyo Mulebila Imbila Nsuma: Ici cipande cabelako ku kutwafwa ukwishiba ifya kulanda. Umuntu nga amoneka ukuti natemwa ifyo mwalanshanya nankwe kabili alefwaya ukwishibilapo na fimbi, kuti mwatwalilila ukulanshanya nankwe, nalimo kuti mwabomfya ifyebo fya kulanda pa cipempu. Kuti mwa-alulako fimo ifyaba pa cipande ca ifyo mwingalanda nelyo kuti mwalanda fye ifyebo fimbi. Nalimo fimbi ifingamwafwa, kwishiba nga ca kuti ifyalipo pa cipande citile ifyo mwingalanda mu katabo ka Imikalile nelyo ilembo limbi kuti fyafika abantu baba mu ncende mubilako imbila nsuma pa mutima. Bushe abantu mu cifulo mubilamo imbila nsuma balitemwa amalyashi ayalecitika uko mwikala nelyo amalyashi ya pa mulabasa? Kuti mwabomfya ifyaba pa cipande citila ifyo mwingalanda mu nshila ishalekanalekana, lelo mulingile ukulafwaisha ukucita ifyo umutumwa Paulo acitile ilyo atile, “Ifintu fyonse ncitila imbila nsuma, pa kuti nshimikileko bambi.”—1 Kor. 9:22, 23.