IFYO TWINGACITA PA KUTI TULEBILA BWINO IMBILA NSUMA
Ifingatwafwa Ukulashimikila Bwino Imbila Nsuma—Ukupeekanya Ifya Kulanda mu Mashiwi Yenu pa Kupeela Abantu Magazini
ICO CACINDAMINA: Nangu ca kuti ifyo twingalanda pa kupeela abantu impapulo ifisangwa mu katabo ka kubomfya pa kulongana fya kutwafwa fye ukwishiba ifya kulanda, tufwile ukupeekanya ifya kulanda mu mashiwi fye yesu. Kuti mwalanda no muntu ukubomfya ifyebo fimbi nelyo kuti mwamona ilyashi mwingalandapo ilikumine sana abantu ku cifulo mubila imbila nsuma. E ico, pa numa ya kubelenga magazini, mwapita na mu fyo mwingalanda ifisangwa mu katabo ka kubomfya pa kulongana e lyo mwatamba na vidio ilelanga ifya kulanda pa kupeela impapulo, kuti mwacita ifyebo fyakonkapo pa kuti mwaishiba ifya kulanda na bantu mu mashiwi fye yenu.
IFYO MWINGACITA:
Yipusheni amuti, ‘Bushe ndefwaya ukubomfya ifyebo twingalanda ifili mu katabo ka kubomfya pa kulongana?’
EE
-
Pekanyeni amashiwi ya kubalilapo ukulanda. Nga mwaposha abo mwasanga, mwifusha ifya kulanda, landeni ico mwendele (Natulangilile: “Ico nyendele ndefwaya . . . ”)
-
Tontonkanyeni pa fyo mwalalanda nga mwaipusha icipusho, nga mwabelenga ilembo kabili nga mwamupeela no lupapulo. (Natulangilile: Nga mulefwaya ukubelenga ilembo, nalimo kuti mwalanda ukuti: “Icasuko kuli ici cipusho kuti mwacisanga pali ili ilembo.”)
AWE
-
Bepusheni icipusho ico mukalanshanyapo nga mwabwelelako
-
Peekanyeni icipusho mwingabepusha icingalenga batontonkanya kabili icingalenga mwalanshanya bwino ukwabula ukumfwisha abo mulelanda nabo insoni. (Natulangilile: Ifipusho ifiba pe bula lya bubili muli magazini.)
-
Saleni ilembo lya kubelenga. (Nga mulepeela abantu Loleni!, te lyonse mwingabelenga ilembo pantu Loleni! bailembela abantu abashaishiba ifingi pali Baibolo kabili abashacetekela sana mu fya mapepo.)
-
Pekanyeniko na amashiwi ayanono fye aya kulondolola ifyo benganonkelamo mu kubelenga ico icipande
-
Lembeniko ifyebo fimo ifya kumwafwa ukukanalaba ifyo mulefwaya ukuyalanda ilyo mukabwelelako
-
Saleni ilyashi muli magazini ilyo mutemenwe kabili ilyo na bantu bengatemwa mu cifulo mubila imbila nsuma
