Broshuwa itila Ni Bani Bacita Ifyo Yehova Afwaya Muno Nshiku? bailembela ukuti tulelanshanya ifyebo fyabamo no musambi ilyo tushilatendeka ukumusambilisha Baibolo nelyo pa numa ye sambililo. * Amasambililo 1 ukufika ku 4 ya kwafwa umusambi ukwishiba Inte sha kwa Yehova, amasambililo 5 ukufika ku 14 ya kwafwa umusambi ukwishiba umulimo tubomba e lyo amasambililo 15 ukufika ku 28 ya kwafwa umusambi ukwishiba icilonganino cesu. Kuti cawama nga ca kuti ilyo tulelanshanya no musambi muli iyi broshuwa, tulekonka ifyo amasambililo yakonkana kano fye nga ca kuti kuli ifyo tulefwaya umusambi eshibe apo pene. Cila isambililo lyakwata fye ibula limo kabili ku basambi abengi kuti mwalanshanya fye pa mamineti 5 ukufika ku 10.

• Bikeni sana amano ku kwasuka icipusho ca mutwe we sambililo

• Belengeni isambililo pamo no musambi, kuti mwabelenga amaparagrafu yonse pa muku umo nelyo paragrafu imo na imo

• Lanshanyeni ifyo mwabelenga. Mulebomfya ifipusho ifili pe samba lye bula kabili mulelanda na pa fikope. Belengeni no kulanshanya amalembo ayo mupekenye ukubelenga. Langeni umusambi ukuti utumitwe tuli mu filembo fyafiita e tuleyasuka icipusho icikalamba

• Nga ca kuti mwi sambililo muli akabokoshi akatila “Ishibilenipo na Fimbi”, kabelengeleni pamo no musambi kabili mukoselesheni ukukonka ifili mu kabokoshi