ICO CACINDAMINA: Ibuuku lya 1 Abena Korinti lyaba pa makalata 14 ayo umutumwa Paulo alembeele Abena Kristu banankwe. Umuntu nga alemba kalata alasala bwino amashiwi ya kulemba, kabili umuntu alembela kuti aibelenga pa inshita iili yonse. Ukulemba amakalata ni nshila iisuma iya kubililamo imbila nsuma kuli balupwa e lyo na ku bantu abo twaishiba fye. Kabili amakalata yalabomba bwino pa kushimikila abantu tufilwa ukusanga pa mayanda. Ku ca kumwenako, kuti nalimo mwalilanshenye no muntu uwalangile ukuti alefwaya ukukutika lelo tasangwa pa ng’anda. Cilafya ukubila ku bantu bamo mu cifulo tubilamo imbila nsuma pa mulandu wa kutila bekala mu mayanda ayaba mu malinga nelyo ayabela ukutali sana. Finshi mulingile ukulemba muli kalata yenu, maka maka nga mulelembela umuntu mushaishiba?

IFYO MWINGACITA:

• Lembeni ifyo mwingalanda nga mulelanshanya nakwe. Mulebalilapo ukuilondolola muli kalata yenu, lyena londololeni ico mwalembela iyo kalata. Nalimo kuti mwamwipusha icipusho, mwamulanga napo engasanga icasuko pa webusaiti yesu. Lyena kuti mwamwebako na pali Online Bible Study Lessons (pali ino nshita takulaba mu Cibemba), mulondolweleni ifyo isambililo lya Baibolo liba, nelyo kuti mwamwebako ifyaba mu fipandwa fimo fimo ifyaba mu Mpapulo Tubomfya Sana pa Kusambilisha Abantu Baibolo. Ilyo muletuma kalata kuti mwabikamo kardi apaba webusaiti yesu, akapepala kakwitilapo abantu ku kulongana, nelyo trakiti.

• Mwilalemba ifyebo ifingi sana pantu umuntu kuti atendwa bwangu ukubelenga.—Moneni kalata ya kumulangilila Ifyo Mwingalemba

• Pitulukeni mu fyo mwalemba pa kuti mushininkishe kuti tamuli ifilubo, kabili filebelengwa fye bwino. Shininkisheni kuti fyonse ifyo mwalemba fileumfwika bwino kabili teti fikalifye umuntu.