Ica Kucilila ica kulekeleshako ico Yesu asefeshe, cali icacindama nga nshi. Apo alishibe ukuti ali mupepi no kufwa, apekenye ukuti aliile Ica Kucilila pamo na batumwa bakwe. Kabili atendeke no kusefya ukupya uko bali no kulasefya cila mwaka e kutila, Umulalilo wa kwa Shikulu. E ico atumine Petro na Yohane ukuyapekanya umuputule umo bali no kusefesha Ica Kucilila. (Luka 22:7-13; moneni icikope cili pa nkupo.) Ifi Yesu acitile filetwibukishako ukuti na ifwe bene tulingile ukuipekanishisha libela ku Cibukisho icili no kubako pa 27 March. Ifilonganino fifwile nafipekanya kale uukalanda ilyashi, ifimpashanya e lyo na fimbipo. Nomba finshi cila muntu engacita pa kuti aipekanishishe libela ku Cibukisho?

Pekanyeni umutima. Mulebelenga no kutontonkanya sana pa malembo ayaba mu katabo ka Ukubebeta Amalembo Cila Bushiku ayo tulingile ukubelenga mu nshiku sha Cibukisho. Kuti mwabelengelapo na fimbi mu Akatabo ka Kutwafwa Ukusambilila Icebo ca kwa Lesa. (Moneni na Akatabo ka Mikalile no Mulimo Tubomba aka mu April 2020.) Indupwa kuti shasanga ifyebo na fimbi pa fyo icilubula cacindamina ilyo bali pa mapepo ya lupwa mu Icisontelelo ca Mpapulo sha Watch Tower e lyo na mu Icitabo ca Kwafwa Inte sha kwa Yehova Ukusanga Ifyebo.

Muketeko abantu ku Cibukisho. Mukabombeshe ukwita abantu ku Cibukisho. Pa bantu mwingeta kuti paba ifipempu, abo mwalesambilisha kale Baibolo, abakaya benu e lyo na balupwa wenu. Baeluda bafwile ukwita abaleka ukulongana no kubila imbila nsuma. Nga ca kuti uyo muntu te kala ku cifulo uko mwikala, pa kuti mwishibe inshita ne cifulo ababa ku cifulo ukwikala uyu muntu bakalongana Icibukisho kuti mwaya pa jw.org/bem no kuya apatila PA NTE SHA KWA YEHOVA e lyo mwatinika apatila “Icibukisho.”

Finshi fimbi twingacita pa kuti tuipekanye?