Amasanso ayesako pa mulandu ne fyabumbwa yaleya yalefulilako fye muno nshiku. Pa kuti twafwilishe abaponenwe no busanso tufwile ukupekanya bwino ukubombela pamo. Uyu e mulandu wine Ibumba Litungulula lyabikilako Dipartimenti Ilolekesha pa Baponenwe na Masanso mu ma bethel yonse.

Bamunyinefwe ababa muli yi dipartimenti nga baishiba ukuti na kucitika ubusanso, ilyo line fye balalanshanya na baeluda bakuli iyo ncende pa kuti beshibe ifyo bakasabankanya abaponenwe no busanso bengakabila. Nga ca kuti ubusanso na bukula sana ica kuti bakasabankanya te kuti baisakamane abene, iofeshi lya musambo lilasala bamunyinefwe abafikapo aba kwangalila umulimo wa kwafwilisha abaponenwe no busanso. Aba bamunyinefwe nalimo kuti baipusha abengaitemenwa ukubombako, abengasangwilako fimo ifilekabilwa nelyo kuti bashita ifilekabilwa no kupeela kuli bonse abalekabila ubwafwilisho.

Ukucita ifi twalandapo kusuma sana, pantu kulalenga incito yabombwa bwino, takuba icimfulumfulu no kukanaonaula indalama nelyo fintu fimbi. Nomba ifintu te kuti fyende bwino nga ca kuti aba bwananyina baleicitila fye ifintu ukulingana ne fyo baletontonkanya.

Bamunyinefwe abo iofeshi lya musambo lisontele e bamona indalama ishingafwaikwa na bakuitemenwa ukubomba abengafwaikwa pa kwafwa abaponenwe na masanso. Na kabili kuti baishibako na balashi abengalatwafwa pa kuti tulebomba bwangu umulimo wa kwafwa abaponenwe no busanso. Kanshi bamunyinefwe na bankashi tabafwile ukuitendekelako ukukolonganika indalama, ukutuma ifya kwafwilisha abaponenwe no busanso nelyo ukuya ku cifulo ukucitike ubusanso, kano fye nga na babeba ukucita ifi.

Na lyo line nga kwacitika ubusanso tulafwaya ukwafwilishako abaponenwe no busanso. (Heb. 13:16) Twalitemwa bamunyinefwe! Nomba finshi twingacita? Icacindama sana ico twingacita, kupepelako abaponenwe no busanso e lyo na baleafwilisha abaponenwe no busanso. Kabili kuti twasangwilako na ku mulimo wa mwi sonde lyonse. Ibumba Litungulula lileba ama bethel ifya kucita, kanshi e beshiba uko ishi indalama shilekabilwa sana. Kabili nga ca kuti tulefwaya ukubombako, kuti twasaina formu ya Local Design/Construction Volunteer Application (DC-50) pa kuti tulange ukuti tulefwaya ukubombako uyu mulimo.

TAMBENI VIDIO ITILA IMFULA YA CIMWELA IYAONAWILE IFINTU MU BRAZIL, LYENA ASUKENI ICI CIPUSHO

Finshi mwatemwapo sana pa fyo Inte sha kwa Yehova ba-afwile abaponenwe no busanso ilyo kwali imfula iyaletele mulamba ku Brazil mu 2020?