Ukulandapo Sana: Tamufwile ukulamona kwati mulingile ukulondolola fye fyonse. Yesu alebomfya ifipusho pa kwafwa abantu ukutontonkanya na pa kubafwa ukwishiba icishinka. (Mat. 17:24-27) Ukubomfya ifipusho kulalenga isambililo lyawama kabili kuti kwamwafwa ukwishiba umusambi nga aleumfwa no kusumina ifyo alesambilila. (be ibu. 253 amapara. 3-4) Ilyo muleipusha ifipusho, muletekanya no kulolela ayasuka. Mu nshita ya kuti mwebe umusambi icasuko nga taswike bwino, mwipusheni ifipusho na fimbi pa kumwafwa ukwishiba icasuko. (be ibu. 238 amapara. 1-2) Muletekanya pa kulanda ifyebo ifipya pa kuti umusambi aumfwikisha ifyo mulelandapo.—be ibu. 230 para. 4.

Ukulanda pa Fishili mwi Sambililo: Mwilalanda pali fyonse ifyo mwaishiba pe lyashi mulesambilisha umusambi. (Yoh. 16:12) Landeni fye pa cishinka cikalamba icili mu paragrafu. (be ibu. 226 amapara. 4-5) Ukulanda pa fyebo ifisuma lelo ifishili mwi sambililo kuti kwalenga ifishinka ukukanaumfwika. (be ibu. 235 para. 3) Umusambi nga aumfwa fye icishinka cikalamba, kabiyeni mu paragrafu ikonkelepo

Ukufwaya fye Ukupwisha Ukusambilila: Ico tufwaisha kufika umusambi pa mutima, te kumusambilisha ifyebo ifingi. (Luka 24:32) Pa kuti mufike umusambi pa mutima, mulebomfya bwino Icebo ca kwa Lesa pa kulondolola amalembo apashimpilwe ifishinka fili mwi sambililo. (2 Kor. 10:4; Heb. 4:12; be ibu. 144 amapara. 1-3) Mulebomfya ifilangililo ifyayanguka ukumfwa. (be ibu. 245 amapara. 2-4) Ishibeni bwino umusambi ne fyo asuminamo, kabili mulesambilila fye ukulingana na maka umusambi akwata aya kumfwa ifyebo. Mwipusheni ifipusho pamo nge ifi: “Bushe muleumfwa shani pali ifi mulesambilila?” “Bushe finshi filetusambilisha pali Yehova?” “Kuti mwanonkelamo shani nga mulebomfya ifyo mulesambilila?”—be ibu. 238 amapara. 4-6; ibu. 259 para. 1