Umwana nga e watupokelela pa ng’anda, tulingile ukupoka ulusa lwa kulanda nankwe ku bafyashi. Ukucita ifi kuti kwalanga fye ukuti twalicindika bumutwe bwa bafyashi bakwe. (Amapi. 6:20) Umwana nga atweba ukuti twingile, tulingile fye ukusumina nga ca kuti natupoka ulusa ku bafyashi bakwe. Abafyashi bakwe nga tabalipo, kuti twabwelelako ilyo bengabapo.

Umwana nga ali ne myaka nalimo 15 ukufika ku 19, kuti cawama na kabili ukulanda na bafyashi bakwe. Abafyashi nga tabalipo, kuti twamwipusha nga kuti bamusuminisha ukubelengako impapulo shesu. Nga kuti bamusuminisha, kuti twamupeelako ulupapulo e lyo nalimo no kumulanga Webu saiti yesu iya jw.org.

Nga tulecita icipempu ca kubwelelamo ku mwana uwatemenwe ifyo twalanshenye nankwe, tulingile ukulanda na bafyashi bakwe. Ukucita ifi kuti kwatwafwa ukulondolola ico tulandila na bantu pa mafunde ya kwa Lesa no kupanda amano ukusuma ukwaba mu Baibolo ukwafwa indupwa. (Amalu. 119:86, 138) Nga tulecindika abafyashi no kubalangulukilako, kuti batusuminisha ukubashimikila pamo no lupwa lwabo.—1 Pet. 2:12.