Yesu alicitile ubunte bwa mu lyashi ku mwanakashi umwina Samaria pantu abalilepo ukulanda nakwe ilyashi fye. Finshi fingatwafwa ukulanshanya na bantu tushaishiba?

• Mwilaifinya kabili mulelanshanya na bantu. Nangu ca kuti alinakile, Yesu alombele amenshi pa kutendeke ukulanshanya no mwanakashi. Kuti mwatendekelapo ukubaposha lyena kuti mwalandako pa miceele, nelyo pa ficitike. Muleibukisha ukuti ico mulefwaya, kutendeka fye ukulanda nabo, e ico landeni pa lyashi ilili lyonse ilyo umuntu engatemwa ukumfwa. Nga ca kuti talefwaya ukushimika na imwe, landeniko no muntu umbi. Mulelomba Yehova ukuti alemukosha.—Nehe. 2:4; Imil. 4:29.

• Lyonse mulebila imbila nsuma ku bantu mwakumanya, lelo muletekanya. Mulelolela mpaka ilyashi muleshimika lyalenga mwalandako pa fyaba mu Baibolo. Nga ca kuti mwatendeka ukulanda bwangu pa fyaba mu Baibolo umuntu te kuti atemwe kabili kuti aleka ukulanda na imwe. Mwilaumfwa ububi ilyashi nga lyapwa ilyo mushilalanda nankwe ifya mu Baibolo. Nga ca kuti mulomfwa umwenso ukutendeka ukulanda pa mbila nsuma ilyo muleshimika ilyashi, mulelanshanya fye na bantu ukwabula ukulanda pa fyaba mu Baibolo mpaka mukabeleshe. [Tambeni kabili lanshanyeni vidio 1.]

• Ilyo mulelanshanya, kuti mwakwata apa kutendekela ukubila imbila nsuma nga mwalandako fimo ifyo mwasuminamo, nga mwacita ifi uo mulelanshanya nakwe nalimo kuti afwaya mwamulondolwelako na fimbi. Ifyo Yesu alandile e fyalengele umwanakashi amwipushe amepusho. Ilyo Yesu atendeke ukulanda pa mbila nsuma, aleyasuka fye amepusho umwanakashi amwipwishe. [Tambeni no kulanshanya vidio 2 kabili tambeni no kulanshanya vidio 3.]