ICIPANDE CA KUSAMBILILAMO 11
Ifyo Ukubelenga Baibolo Kwingatwafwa Ukushipikisha Amafya
‘Lesa alapeela ukushipikisha.’—ROM. 15:5.
ULWIMBO 94 Tulatasha pa Cebo ca kwa Lesa
IFYO TWALASAMBILILA *
1. Mesho nshi yamo ayo ababomfi ba kwa Yehova bengakwata?
BUSHE mwalikwata ubwafya ubukalamba ubo mulingile ukushipikisha? Nalimo uwa mu cilonganino alimukalifya. (Yako. 3:2) Nelyo limbi abo mubomba nabo nangu abo musambilila nabo balamupumya pa mulandu wa kubombela Yehova. (1 Pet. 4:3, 4) Nelyo nalimo balupwa lwenu balamukaanya ukulalongana nelyo ukwebako bambi pa fyo mwasuminamo. (Mat. 10:35, 36) Nga ca kuti ubwesho mukwete nabukula sana, nalimo kuti mwalamona kwati kuti cawamapo ukuleka ukubombela Yehova. Nomba kuti twacetekela ukuti te mulandu no bwesho tukwete, Yehova kuti atupeela amano ya kupingula bwino pa fintu na maka ya kushipikisha ubo bwesho.
2. Ukulingana na Abena Roma 15:4, bushe ukubelenga Icebo ca kwa Lesa kuti kwatwafwa shani?
2 Yehova alilengele amalyashi ya bantu bamo abali abashapwililika abashipikishe amafya ayakalamba yalembwe mu Cebo cakwe. Cinshi acitiile ifi? Ni co alefwaya tulesambililako kuli aya malyashi. Ifi fine e fyo Yehova aebele no mutumwa Paulo ukulemba. (Belengeni Abena Roma 15:4.) Ukubelenga aya amalyashi kuti kwatusansamusha kabili kuti kwalenga twaba ne subilo. Na lyo line, pa kuti tunonkelemo tatulingile ukupelela fye pa kubelenga Baibolo. Lelo tufwile ukuleka ifyo tubelenga fya-alula ifyo tutontonkanya ne fyo tumfwa. Ku ca kumwenako, finshi twingacita nga tulefwaya ukwishiba ifya kucita pa bwafya tukwete? Kuti twacita ifintu 4 ifyakonkapo: (1) Ukupepa, (2) Ukwelenganya, (3) Ukwetetula, na (4) Ukubomfya ifyo tulesambilila. Lekeni tulande pa fyabimbwamo mu kucita ifi fintu 4. * Lyena twalamona ifyo twingacita ifi 4 ilyo tulesambilila pa fyacitikiile Imfumu Davidi e lyo no mutumwa Paulo.
1. UKUPEPA
Ilyo mushilatendeka ukubelenga Baibolo, mulelomba Yehova ukuti amwafwe ukumona ifyo ifyebo mwalatendeka ukubelenga fingamwafwa (Moneni paragrafu 3)
3. Finshi mufwile ukucita ilyo mushilatendeka ukubelenga Baibolo, kabili mulandu nshi?
3 (1) Ukupepa. Ilyo mushilatendeka ukubelenga Baibolo, mulelomba Yehova ukuti alemwafwa ukumona ifyo ifyebo mwalatendeka ukubelenga fingamwafwa. Ku ca kumwenako, nga mulefwaya ukwishiba ifya kucita pa bwafya mukwete, mulelomba Yehova ukuti amwafwe ukusanga amashinte mu Cebo cakwe ayengalenga mwaishiba ifya kucita.—Fil. 4:6, 7; Yako. 1:5.
2. UKWELENGANYA
Mule-elenganya ukuti ifyalecitikila uo mulebelengapo ni mwebo filecitikila (Moneni paragrafu 4)
4. Finshi mwingacita pa kuti muleumfwikisha ilyashi mulebelengapo ilya mu Baibolo?
4 (2) Ukwelenganya. Yehova atubumba mu nshila ya kupapusha ica kuti twaliba na maka ya kwelenganya ifintu. Pa kuti mumfwikishe bwino ilyashi lya mu Baibolo, mule-esha ukwelenganya ifyalecitika kabili mule-elenganya ukuti ifyo mulebelengapo ni mwe fyalecitikila. Mule-esha ukumona ifyo uo mulebelengapo alemona no kumfwa ifyo nalimo aleumfwa.
3. UKWETETULA
Muletontonkanya sana pa fyo mulebelenga na pa fyo mwingabomfya ifyo mulebelenga (Moneni paragrafu 5)
5. Bushe ukwetetula kwalola mwi, kabili kuti mwaetetula shani?
5 (3) Ukwetetula. Ukwetetula kutontonkanya sana pa fyo tulebelenga na pa fyo twingabomfya ifyo tulebelenga. Ukucita ifi kulatwafwa ukwishiba bwino no kumfwikisha ilyashi tulebelengapo. Ukubelenga Baibolo ukwabula ukwetetula kwaba kwati kupelela fye pa kulolesha injelwa. Lelo ukwetetula kwaba kwati kukuula icikulwa ukubomfya isho shine injelwa no kumona ifyo icikuulwa camoneka. Pa kuti cimwangukile ukwetetula, mufwile ukuyipusha no kusanga amasuko ku mepusho pamo nga: ‘Cinshi uuli mu lyashi ndebelengapo acitile pa kuti acimfye ubwafya akwete? Bushe Yehova amwafwile shani? Kuti nabomfya shani ifyo nasambilila kuli ili lyashi pa kuti nshipikishe ubwesho?’
4. UKUBOMFYA IFYO MWASAMBILILA
Mulebomfya ifyo mwasambilila pa kuti mulepingula bwino pa fintu, pa kuti muleba no mutende, na pa kuti mulekosha icitetekelo cenu (Moneni paragrafu 6)
6. Cinshi tulingile ukulabomfesha ifyo tulesambilila?
6 (4) Ukubomfya ifyo mwasambilila. Yesu atile nga tatulebomfya ifyo tulesambilila, kuti twaba ngo muntu uulekuula ing’anda yakwe pa mucanga. Nangu engabombesha ukuikuula, ukubombesha kwakwe kuti kwaya fye mu menshi. Cinshi twalandila ifyo? Pantu ilyo kwaisa mulamba ne cimwela, ing’anda yakwe kuti yawa. (Mat. 7:24-27) Ifi fine e fyo caba na kuli ifwe. Nga tulepepa, tule-elenganya, kabili tule-etetula lelo tatulekonka ifyo tulesambililako, ninshi tuleonaula fye inshita yesu na maka. Nga ca kuti twaba na mesho nelyo nga balatucusha, icitetekelo cesu cikanaka. Lelo nga tuleisambilisha kabili tulekonka ifyo tulesambilila, tukalasala bwino ifya kucita, tukaba no mutende kabili icitetekelo cesu cikakosa. (Esa. 48:17, 18) Lekeni nomba tubomfye ifintu 4 ifyo twalandapo, ilyo tulelanshanya pa fyo twingasambililako ku fyacitikiile Imfumu Davidi.
FINSHI TWINGASAMBILILAKO KU MFUMU DAVIDI?
7. Lyashi nshi ilya mu Baibolo ilyo twalalandapo?
7 Bushe balimupondokela kuli cibusa wenu nelyo lupwa wenu uo mwacetekele? Nga ca kuti balimupondokela, kuti mwanonkelamo nga mwabelenga ilyashi lya kwa Abishalomu umwana wa Mfumu Davidi, uwapondokele wishi kabili uwalefwaya ukupoka wishi ubufumu.—2 Sam. 15:5-14, 31; 18:6-14.
8. Finshi mwingacita pa kuti Yehova amwafwe?
8 (1) Ukupepa. Ilyo muletontonkanya pe lyashi lya mu Baibolo, mulepepa kuli Yehova no kumweba ifyo muleumfwa pa fimucitikiile. (Amalu. 6:6-9) Mule-eba Yehova fyonse ifyo muleumfwa. Lyena mulemulomba ukuti alemwafwa ukusanga amashinte ya mafunde ayengamwafwa ukwishiba ifya kucita pa kuti mushipikishe ubwafya.
9. Finshi fyacitike kuli Davidi na Abishalomu?
9 (2) Ukwelenganya. Tontonkanyeni pali ili lyashi, kabili elenganyeni ifyo Imfumu Davidi yaleumfwa. Abishalomu umwana wa kwa Davidi alibombeshe pa myaka iingi ukulenga abantu bamutemwe. (2 Sam. 15:7) Ilyo Abishalomu amwene ukuti nomba calinga, alitumine inengu mu Israele monse pa kuti alenge abantu basumine ukuti abe imfumu yabo. Alyongwele na Ahitofele uwali pa fibusa kabili pali bampanda mano ba kwa Davidi. Abishalomu ali-ibikile pa bufumu, kabili alefwaya ukwikata Davidi no kumwipaya. Pali iyi nshita Davidi nalimo alilwele sana. (Amalu. 41:1-9) Ilyo Davidi aishibe ifyo Abishalomu alepanga ukucita, alifulumwike mu Yerusalemu. Mu kupita kwa nshita, abashilika ba kwa Abishalomu balilwile na bashilika abali aba cishinka kuli Davidi. Abashilika ba kwa Abishalomu balibacimfishe kabili Abishalomu umwana wa kwa Davidi balimwipeye.
10. Finshi nalimo Imfumu Davidi yali no kucita?
10 Elenganyeni ifyo Davidi aumfwile pali ifi fyonse ifyamucitikiile. Alitemenwe Abishalomu kabili alicetekele Ahitofele. Lelo bonse babili balimupondokele. Balimukalifye sana kabili balefwaya no kumwipaya. Davidi nga alilekele ukucetekela ifibusa fyakwe fimbi, kabili nga alitendeke ukubatunganya ukuti nabo baletungilila Abishalomu. Nga atendeke ukutontonkanya fye pa fingamuwamina kabili nga alefwaya ukufulumuka fye eka. Nelyo nalimo nga alifuupwike sana. Nomba ifi te fyo Davidi acitile. Lelo alicimfishe ubwesho akwete. Cinshi camwafwile ukucimfya?
11. Finshi Davidi acitile ilyo ali no bwesho?
11 (3) Ukwetetula. Finshi twingasambilila kuli ili lyashi? Pa kuti twishibe ifyo twingasambililako, tulingile ukwasuka ici cipusho: “Finshi Davidi acitile pa kuti acimfye ubwesho akwete?” Davidi alitekele umutima, ta-angufyenye ukupingulapo ifya kucita pa bwesho akwete kabili tapingwilepo ukucita ifishali bwino. Na kabili, taumfwile sana umwenso ica kuti afilwa no kupingulapo ifya kucita. Lelo alipepele kuli Yehova ukuti amwafwe. Kabili alyebele ne fibusa fyakwe ukuti fimwafwe. Na kabili, Davidi alyangufyenye ukucita ifyo apingwilepo ukucita. Nangu ca kuti Davidi alyumfwile sana ububi, talekele ukucetekela ifibusa fyakwe kabili tale-enda ne cikonko ku mukoshi. Alitwalilile ukucetekela Yehova e lyo ne fibusa fyakwe.
12. Finshi Yehova acitile pa kwafwa Davidi?
12 Bushe Yehova aafwile shani Davidi? Nga mwafwailapo ifyebo na fimbi pali ili lyashi, mukasanga ukuti Yehova alipeele Davidi amaka ya kushipikisha ubwesho. (Amalu. 3:1-8; amashiwi ya pa muulu) Yehova alipaalile ifyo Davidi asalilepo ukucita. Kabili alyafwile ifibusa fya kwa Davidi abali aba cishinka ilyo baile mu kulwa inkondo pa kuti bacingilile imfumu yabo.
13. Kuti mwapashanya shani Davidi nga ca kuti umuntu amukalifya sana? (Mateo 18:15-17)
13 (4) Ukubomfya ifyo mwasambilila. Mufwile ukuyipusha amuti, ‘Kuti napashanya shani Davidi?’ Mufwile ukwangufyanya ukucitapo cimo pa kuti mupwishe ubwafya mukwete. Ukulingana no bwafya mukwete, kuti mwacita ifyo Yesu alandilepo muli Mateo icipandwa 18 nelyo kuti mwabomfya ishinte lye funde ilyabamo. (Belengeni Mateo 18:15-17.) Lelo tamufwile ukwangufyanya ukupingulapo ifya kucita nga ca kuti namukalipa. Mufwile ukupepa kuli Yehova pa kuti amwafwe ukuteeka umutima kabili amupeele amano ya kwishiba ifya kucita pa kuti mupwishe ubwafya. Tamufwile ukuleka ukucetekela ifibusa fyenu. Lelo mufwile ukusumina ukuti ifibusa fyenu filemwafwa. (Amapi. 17:17) Ne cacindamisha ca kuti, mufwile ukulakonka ifyo Yehova alanda mu Cebo cakwe.—Amapi. 3:5, 6.
FINSHI TWINGASAMBILILA KULI PAULO?
14. Ni lilali nalimo ifyaba pali 2 Timote 1:12-16; 4:6-11, 17-22 fingamukoselesha sana?
14 Bushe aba mu lupwa lwenu balamucusha pa mulandu wa kuti tabatemwa ifi mubombela Yehova? Nelyo bushe mwikala mu calo umo babinda imilimo yesu imo nangu umo babinda ukupepa kwesu? Nga ca kuti ifi e fyo caba, nalimo kuti mwakoseleshiwa nga mwabelenga ifyaba pali 2 Timote 1:12-16 na 4:6-11, 17-22. * Paulo alembele ifi ifikomo ninshi ali mu cifungo.
15. Finshi mwingalandapo ilyo mulepepa kuli Yehova?
15 (1) Ukupepa. Ilyo mushilabelenga ifi fikomo, mule-eba Yehova ubwafya mukwete ne fyo muleumfwa pali ubo bwafya. Mulemweba fyonse ifyo muleumfwa. Lyena ilyo mulebelenga ilyashi ililanda pa mafya Paulo akwete, mulelomba Yehova ukuti amwafwe ukusanga amashinte ya mafunde ayengamwafwa ukwishiba ifya kucita pa bwafya mukwete.
16. Finshi fyacitike kuli Paulo?
16 (2) Ukwelenganya. Elenganyeni ukuti nimwe muli no bwafya ubo Paulo akwete. Paulo ali mu cifungo mu Roma ninshi nabamukaka na maceni. Uyu tawali e muku wa kubalilapo bamupoosele mu cifungo. Lelo pali iyi inshita alishibe ukuti bali mu kumwipaya. Bamo abali ifibusa fyakwe balimushile, kabili alinakile sana.—2 Tim. 1:15.
17. Finshi nalimo Paulo ali no kucita alafwaya?
17 Paulo afwaya nga aletontonkanya pa fya ku numa. Nalimo nga aletontonkanya ukuti akanasalapo ukuba Umwina Kristu uwacincila nga tabamwikete no kumubika mu cifungo. Nga alifuliilwe abaume abali mu cintungu ca Asia abamufutwike, kabili nalimo nga alilekele no kucetekela ifibusa fyakwe fimbi. Lelo ifi te fyo Paulo acitile. Cinshi calengele ashininkishe ukuti ifibusa fyakwe bali no kutwalilila ukuba aba cishinka kuli ena no kuti Yehova ali no kumulambula?
18. Finshi Paulo acitile ilyo ali no bwesho?
18 (3) Ukwetetula. Mufwile ukwasuka ici cipusho, “Finshi Paulo acitile pa kuti ashipikishe ubwesho akwete?” Na lintu aishibe ukuti tapali no kukokola bali no kumwipaya, abikile sana amano ku kucita icintu icacindamisha, e kutila ukulenga Yehova alumbanishiwa. Kabili alitwalilile ukutontonkanya pa fyo engakoselesha abantu bambi. Alepepa lyonse pantu alishintilile pali Yehova. (2 Tim. 1:3) Mu cifulo ca kubika sana amano ku ba mubutwike, Paulo aletasha sana pa fyo ifibusa fyakwe abali aba cishinka kuli ena kabili abamutemenwe balemwafwa mu fyo alekabila. Na kabili, Paulo alitwalilile ukusambilila Icebo ca kwa Lesa. (2 Tim. 3:16, 17; 4:13) Ne cacindamisha ca kuti, taletwishika nangu panono ukuti Yehova na Yesu balimutemenwe. Alishibe ukuti tabamulabileko, kabili bali no kumulambula pa fyo atwalilile ukuba uwa cishinka ilyo alebomba umulimo wakwe.
19. Bushe Yehova ayafwile shani Paulo?
19 Yehova alyebele limo Paulo ukuti bali no kulamucusha pa mulandu wa kuti ali Umwina Kristu. (Imil. 21:11-13) Bushe Yehova aafwile shani Paulo? Aleasuka amapepo yakwe, kabili alemupeela amaka. (2 Tim. 4:17) Yehova alyebele Paulo ukuti ali no kumulambula pa fyo alebombesha. Na kabili, Yehova alilengele ifibusa fya kwa Paulo ukumwafwa mu fyo alekabila.
20. Kuti twapashanya shani Paulo nga twabelenga ifyaba pa Abena Roma 8:38, 39 ifilanga ifyo ali ne citetekelo?
20 (4) Ukubomfya ifyo mwasambilila. Muleyipusha amuti, ‘Kuti napashanya shani Paulo?’ Nga filya cali kuli Paulo, na ifwe tufwile ukulaenekela ukutila kuti batucusha pa mulandu wa kubombela Yehova. (Marko 10:29, 30) Pa kuti tutwalilile ukuba aba cishinka kuli Yehova ilyo twaba na mafya, tulingile ukulapepa kuli ena no kulaisambilisha Icebo cakwe lyonse. Na kabili, tufwile lyonse ukulaibukisha ukuti icacindama sana ico twingacita kulalenga Yehova acindikwa. Kuti twashininkisha ukuti Yehova takabale atulekelesha, kabili takuli nangu cimo ico bamo bengacita icingalenga aleka ukututemwa.—Belengeni Abena Roma 8:38, 39; Heb. 13:5, 6.
KUTI TWASAMBILILAKO KU BAUME NA BANAKASHI BAMBI ABALI NE CISHINKA ABALEMBWA MU BAIBOLO
21. Finshi fya-afwile nkashi Aya e lyo no wacaice Hector ukucimfya amafya bakwete?
21 Te mulandu na mafya twingakwata, ukubelenga amalyashi ya bantu abali ne cishinka abalembwa mu Baibolo kuti kwalenga twashipikisha. Ku ca kumwenako, nkashi Aya painiya uwa ku Japan alandile ukuti ilyashi lya kwa Yona lyalimwafwile ukuleka ukuba no mwenso wa kushimikila ku cintubwingi. Hector uwacaice uwikala ku Indonesia uo abafyashi bakwe bashibombela Yehova, atile ilyashi lya kwa Ruti lyalilenga alafwaya ukusambilila pali Yehova no kulamubombela.
22. Finshi mwingacita pa kuti mulenonkelamo mu fyangalo fya mu Baibolo nelyo mu fipande fitila “Pashanyeni Icitetekelo Cabo”?
22 Ni kwi mwingasanga amalyashi yalanda pa bantu ba mu Baibolo ayengamukoselesha? Amavidio yesu, amalyashi ya mu Baibolo ayo babelenga nge fyangalo, e lyo ne fipande fitila “Pashanyeni Icitetekelo Cabo,” kuti fyatwafwa ukumfwikisha amalyashi ya mu Baibolo. * Pa kupanga aya amavidio na pa kulemba ishi impapulo balifwailishe sana. Ilyo mushilatamba, ukukutika nelyo ukubelenga ishi impapulo, mulelomba Yehova ukuti amwafwe ukusanga ifishinka ifyo mwingabomfya. Mule-elenganya ukuti ifyalecitikila uo mulesambililapo nimwe filecitikila. Muletontonkanya sana pa fyo aba ababomfi ba cishinka aba kwa Yehova bacitile na pa fyo Yehova abafwile ukucimfya amafya bakwete. Lyena mulebomfya ifyo mwasambililako. Mufwile ukutasha Yehova pa fyo alemwafwa. Kabili muleafwako abantu bambi no kubakoselesha pa kuti mulelanga ukuti mulatasha pa fyo Yehova amwafwa.
23. Ukulingana na Esaya 41:10, 13, finshi Yehova atulaya?
23 Ifintu muli cilo calo icitungululwa na Satana filafya nga nshi, kabili limo tatwishiba ne fya kucita. (2 Tim. 3:1) Lelo tatulingile ukusakamikwa sana nelyo ukumfwa umwenso. Yehova aleshiba amafya tukwata. Alitulaya ukuti ilyo tulekabila ubwafwilisho, akulatwikata no kuboko kwakwe ukwa ku kulyo ukwa maka. (Belengeni Esaya 41:10, 13.) Twalicetekela ukuti Yehova akulatwafwa, kabili ukubelenga Baibolo kuti kwalenga twaba na maka ya kushipikisha ubwesho ubuli bonse.
ULWIMBO 96 Icitabo ca kwa Lesa Calicindama
^ para. 5 Amalyashi ayengi ayaba mu Baibolo yalanga ukuti Yehova alitemwa ababomfi bakwe, kabili alabafwa ukushipikisha amesho ayali yonse ayo bengakwata. Muli cino cipande twalalanda pa fyo twingacita ilyo tuleisambilisha Baibolo, na pa fingatwafwa pa kuti tulenonkelamo sana mu fyo tulebelenga.
^ para. 2 Ukulunda pali ifi 4 ifyo twalandapo, kwaliba na fimbi ifyo mwingacita ilyo mulebelenga Baibolo. Fimo ifyo mwingacita kuti mwafisanga mu Icitabo ca Kwafwa Inte sha kwa Yehova Ukusanga Ifyebo pa mutwe utila “Baibolo,” pa ka mutwe akatila “Ukubelenga no Kumfwikisha Baibolo.”
^ para. 14 Tamulingile ukubelenga aya amalembo ilyo mulesambilila Isambililo lya Ulupungu lwa kwa Kalinda pa cilonganino.
^ para. 22 Moneni icipande citila, “Pashanyeni Icitetekelo Cabo—Abaume na Banakashi Abalembwa mu Baibolo” pa jw.org. (Kabiyeni apo balemba ukuti AMASAMBILISHO YA MU BAIBOLO > UKUTETEKELA LESA.)
