1. Ukulingana na Mateo 24:9, cinshi tushipapila abantu ba muli cino calo nga batupata?

YEHOVA atubumbile mu musango wa kuti tuletemwa abantu kabili tulefwaya ukuti na ifwe batutemwe. Kanshi nga ca kuti umuntu atupata, tulomfwa ububi kabili limo tulomfwa no mwenso. Ku ca kumwenako, nkashi Georgina uwikala ku Europe atile: “Ilyo nali ne myaka 14, bamayo balimpatile pa mulandu wa kubombela Yehova. Naleumfwa uwalekeleshiwa kabili natendeke ukutwishika nga ca kuti nali umuntu umusuma.” * Munyinefwe Danylo alembele ukuti: “Ilyo abashilika bangumine, bantuka insele no kuntiinya pa mulandu wa kuba Inte ya kwa Yehova, nalyumfwile umwenso kabili naumfwile kwati ndi wacabecabe fye.” Tulomfwa ububi sana abantu nga batupata. Lelo ici tacitupapusha. Mulandu nshi? Pantu Yesu atile abantu bakatupata.—Belengeni Mateo 24:9.

2-3. Cinshi abantu batupatila?

² Abantu ba muli ici calo balipata abasambi ba kwa Yesu. Mulandu nshi? Pantu Yesu alilandile ukuti ‘tatuli ba muli ici calo.’ (Yoh. 15:17-19) Kanshi nangu ca kuti twalicindika amabuteko ya bantunse, tulakaana ukuyapepa nelyo ukupepa ifimpashanya ifimininako aya amabuteko. Tupepa fye Yehova eka. Tulatungilila insambu sha kwa Lesa isha kuteka abantunse. Lelo Satana na bamukonka balakaana ukuti Lesa takwata insambu sha kuteka abantunse. (Ukute. 3:1-5, 15) Tulashimikila abantu ukuti Bufumu bwa kwa Lesa fye e bukapwisha amafya yonse ayo abantunse bakwata, no kuti nomba line fye buli no konaula bonse abashibutungilila. (Dan. 2:44; Ukus. 19:19-21) Iyi ni mbila nsuma ku bafuuka, lelo ku babifi ni mbila ya bulanda.—Amalu. 37:10, 11.

 ³ Na cimbi ico abantu batupatila ni co tulakonka amafunde ya kwa Lesa ayalungama. Ifyo Lesa alanda ukuti fyalilungama ne fyo alanda ukuti tafyalungama, fyalipusana sana ne fyo abantu ba muli cino calo balanda ukuti e fyalungama ne fishalungama. Ku ca kumwenako, abantu abengi bamona ukuti tacabipa ukucita ubulalelale ubwa misango yalekanalekana ubo Lesa aonawililepo abaleikala mu misumba ya Sodomu na Gomora! (Yuda 7) Apo tulakonka amafunde ya mu Baibolo ayalungama ayalanda pali iyi imibele, abantu abengi balatupumya kabili balanda ukuti twalishishita.—1 Pet. 4:3, 4.

4. Mibele nshi iilenga twalashipikisha abantu nga batupa?

⁴ Finshi fingatwafwa ukushipikisha abantu nga batupata nelyo nga baletutuka? Tufwile ukucetekela sana ukuti Yehova akatwafwa. Nga filya inkwela yaba, icitetekelo kuti catwafwa ‘ukushimya imifwi yonse iya mulilo iya mubifi.’ (Efes. 6:16) Lelo tatulingile ukupelela fye pa kuba ne citetekelo. Tulingile ukuba no kutemwa. Mulandu nshi? Pantu mu kutemwa “tamwaba ukukalifiwa.” Ukutemwa kulasuulako no kushipikisha ifya bubifi fyonse. (1 Kor. 13:4-7, 13) Nomba natulande pa fyo ukutemwa Yehova, ukutemwa Abena Kristu banensu, e lyo fye no kutemwa abalwani besu, kwingalenga twalashipikisha abantu nga batupata.

5. Finshi Yesu acitile pa mulandu wa kuti alitemenwe Wishi?

⁵ Mu nshita ya bushiku ilyo Yesu bashilamwipaya ku balwani bakwe, aebele abasambi bakwe abali aba cishinka kuli ena ati: “Nalitemwa Tata, filya fine na Tata ampeela ifunde, e fyo na ine ndecita.” (Yoh. 14:31) Filya Yesu atemenwe sana Yehova fyalilengele ashipikishe amesho ayakalamba ayo akwete. Na ifwe nga twatemwa sana Yehova tukalashipikisha amesho.

6. Nga fintu Baibolo ilanda pa Abena Roma 5:3-5, bushe fwe babomfi ba kwa Yehova tumfwa shani aba muli ici calo nga batupata?

⁶ Ukutemwa Yehova kwalilenga ababomfi bakwe ukutwalilila ukushipikisha ilyo balebacusha. Ku ca kumwenako, ilyo icilye icikalamba ica baYuda icakwete sana amaka caleseshe abatumwa ukubila imbila nsuma, ukutemwa Lesa kwalengele abatumwa basalepo “ukunakila Lesa ukucila ukunakila abantu.” (Imil. 5:29; 1 Yoh. 5:3) Ukutemwa Lesa muli iyi inshila, kulafwa na ba bwananyina muno nshiku abo bacusha ku mabuteko ya maka kabili ayankalwe ukutwalilila ukuba aba cishinka. Aba muli ici calo nga batupata tatufuupuka, lelo tumona ukuti lishuko.—Imil. 5:41; belengeni Abena Roma 5:3-5.

7. Finshi tufwile ukucita nga ca kuti balupwa lwesu baletukaanya?

⁷ Kuti catukosela sana ukushipikisha nga ca kuti balupwa lwesu e baletukaanya. Nga twatendeka ukusambilila icine pali Yehova, nalimo balupwa lwesu bamo kuti balamona kwati ifyo tulesambilila fyalatulufya. Bamo kuti balamona kwati nalimo natwamba ukufulungana. (Linganyeniko Marko 3:21.) Nalimo kuti balatucusha no kutucusha. Nomba ifya musango uyu tafifwile ukutupapusha. Yesu atile: “Abalwani ba muntu bakaba aba mu ng’anda yakwe.” (Mat. 10:36) Kwena te mulandu ne fyo balupwa lwesu bengalatumona, tatubamona ukuti balwani besu. Pantu ilyo tuletemenwako Yehova, tulatemenwako na bantu. (Mat. 22:37-39) Lelo tatwakaleke ukukonka amafunde ya kwa Lesa na mashinte ya mafunde ya mu Baibolo pa kuti fye tusekeshe umuntu.

8-9. Finshi fya-afwile nkashi Georgina ukushipikisha ilyo balemucusha?

⁸ Nkashi Georgina uo tulandilepo alitwalilile ukushipikisha nangu ca kuti banyina balemucusha sana. Alondolwele ukuti: “Ine na bamayo twalitendeke ukusambilila Baibolo ne Nte sha kwa Yehova. Lelo ilyo papitile imyeshi 6, bamayo balyalwike sana ica kuti balenkaanya  nga nafwaya ukuya mu kulongana. Naishileishiba ukuti bamayo balelanshanya na basangu, kabili balebomfya ifyo abasangu balebeba nga balelanshanya na ine. Inshita shimo balentuka ne nsele, balentinta umushishi, balenkama pa mukoshi, kabili balempoosela ne mpapulo. Ilyo nali ne myaka 15 nalibatishiwe. Bamayo balintwele ku cikuulwa uko basungila abacaice bacintomfwa pa kuti fye bandeshe ukubombela Yehova. Kabili abacaice bamo abo twali nabo kulya balebomfya imiti babinda kabili balepanga ne milandu iikalamba. Cilafya sana ukushipikisha nga ca kuti abantu abalingile ukukutemwa no kukusakamana e balekucusha.”

⁹ Cinshi ca-afwile nkashi Georgina ukushipikisha? Atile: “Ilyo bamayo banjalukile, ninshi e lyo napwishishe fye ukubelenga Baibolo yonse. Nalishininkishe ukuti ninsanga icine, kabili naleumfwa ukuti nimpalama sana kuli Yehova. Nalepepa kuli ena imiku iingi, kabili aleasuka amapepo yandi. Ilyo naleikala muli cilya cikuulwa, nkashi umo alinjitile ku ng’anda ku mwakwe. Ilyo naile, twalibelengele Baibolo, kabili twalifwailepo ifyebo no kumona ifyo twingafibomfya. Pa nshita yonse iyo naleikala muli cilya cikuulwa, bamunyinefwe na bankashi balenkoselesha. Balensakamana fye nga lupwa wabo. Nalishibe ukuti Yehova alikwata amaka ukucila abali bonse abatukaanya.”

10. Finshi twingacetekela ukuti Yehova Lesa wesu akulatucitila lyonse?

¹⁰ Umutumwa Paulo alembele ukuti takuli icingaba na maka ya “kutupaatulako ku kutemwa kwa kwa Lesa ukwaba muli Kristu Yesu Shikulwifwe.” (Rom. 8:38, 39) Nangu ca kuti limo kuti twaba no bwafya ubukalamba, Yehova lyonse akulatusansamusha no kutukosha. Kabili nga filya fine cali kuli nkashi Georgina, Yehova alabomfya na bamunyinefwe na bankashi ukutwafwa.

11. Bushe ukutemwa uko Yesu alandilepo pali Yohane 15:12, 13 kwali no kwafwa shani abasambi bakwe? Landeni ica kumwenako.

¹¹ Mu nshita ya bushiku ilyo Yesu ali mupepi no kufwa, alicinkwileko abasambi bakwe ukulatemwana. (Belengeni Yohane 15:12, 13.) Alishibe ukuti ukutemwana ukufuma pa nshi ya mutima kwali no kulenga abasambi bakwe baikatana kabili balashipikisha ulupato lwa ba muli ici calo. Tontonkanyeni pa fyo cali mu cilonganino icali mu Tesalonika. Ukutula apo ici cilonganino capangiilwe, aba muli ici cilonganino balebacusha. Na lyo line, aba bwananyina balitwalilile ukuba aba cishinka kabili balitemwanene. (1 Tes. 1:3, 6, 7) Paulo abakoseleshe ukulalanga ukutemwa,  atile: “Mutwalilile ukucishapo ukutemwana.” (1 Tes. 4:9, 10) Ukutemwa kwali no kulenga balasansamusha abali no bulanda no kukoselesha abanaka. (1 Tes. 5:14) Balikonkele ifyo Paulo abebele, ica kuti muli kalata yalenga bubili iyo abalembeele ilyo papitile nalimo umwaka umo, abebele ukuti: “Ukutemwana kwenu bonse umo umo kulekoselako.” (2 Tes. 1:3-5) Filya batemwanene fyalilengele balashipikisha amafya ne fyo balebacusha.

12. Ilyo mu calo cimo mwali inkondo, bushe bamunyinefwe na bankashi balangile shani ukuti balitemwana?

¹² Tontonkanyeni pa fyacitike kuli ba Danylo abo tulandilepo e lyo na bena mwabo. Ilyo inkondo yali mu calo cabo yafikile mwi tauni baleikala, balitwalilile ukulalongana, ukulabila imbila nsuma apo bengapesha, e lyo no kula-akana ifya kulya balekwata na bamunyinabo na bankashi. Lyena bushiku bumo abashilika abali ne mfuti baile ku ng’and ya ba Danylo. Ba Danylo batile: “Banjebele ukuti ndeke ukuba Inte ya kwa Yehova. Ilyo nakeene, balimpumine kabili batendeke ukulishisha imfuti pa mutwe wandi pa kuti bantiinye. Ilyo bashilaya, banjebele ukuti bali no kubwela no kwisacenda umukashi wandi. Lelo bamunyinefwe balyangufyenye ukutuninikisha ishitima pa kuti tuye kwi tauni limbi. Nshakalabe ifyo aba aba bwananyina balangile ukuti balitutemwa. Ilyo twafikile kuli lilya itauni, aba bwananyina balitupeele ifya kulya kabili balingafwile ukusanga incito ne ng’anda! Ici calilengele na ifwe tulesungako aba bwananyina bamo abalefulumuka ku ncende ukwali inkondo.” Ifi ifyacitike filanga ukuti ifyo fwe Bena Kristu twatemwana kuti fyatwafwa ukushipikisha abantu nga batupata.

13. Bushe umupashi wa mushilo utwafwa shani ukutwalilila ukushipikisha ilyo tulebombela Yehova nangu abantu batupata?

¹³ Yesu aebele abasambi bakwe ukuti baletemwa abalwani babo. (Mat. 5:44, 45) Bushe ukucita ifi kwalyanguka? Takwa-anguka nangu panono! Lelo umupashi wa mushilo uwa kwa Lesa kuti watwafwa ukulatemwa abalwani besu. Pa fisabo fya mupashi wa mushilo uwa kwa Lesa paba ukutemwa, e lyo no kushishimisha, icikuuku, ukufuuka, no kuilama. (Gal. 5:22, 23) Iyi imibele ilatwafwa ukushipikisha abantu nga batupata. Abantu abengi balileka ukutukaanya pa mulandu wa kuti abalume babo, abakashi babo, umwana wabo, nelyo abena mupalamano balelanga iyi imibele. Kabili abengi pali aba balisambilila icine no kuba bamunyinefwe na bankashi. Kanshi nga ca kuti  cilamukosela ukutemwa abamupata pa mulandu wa kuti mulabombela Yehova, mulelomba umupashi wa mushilo kuli Yehova. (Luka 11:13) Kabili mwilatwishika ukuti ukumfwila Yehova e cawamisha ico mufwile ukulacita lyonse.—Amapi. 3:5-7.

14-15. Bushe ifyaba pa Abena Roma 12:17-21 fya-afwile shani ba Yasmeen ukulalanga ukutemwa ku bena mwabo nangu ca kuti balebacusha sana?

¹⁴ Tontonkanyeni pa fyacitike kuli nkashi Yasmeen, uwikala ku Middle East. Ilyo ba Yasmeen baishileba Inte ya kwa Yehova, abalume babo bamwene kwati balibabepa pa kuti babe ba Nte. E co balyeseshe ukubalesha ukubombela Lesa. Balebatuka insele kabili baebele balupwa, shimapepo, e lyo no uucita ifinjelengwe ukuti baletiinya ba Yasmeen, kabili balebeba no kuti balepaatukanya ulupwa. Abalume baba Yasmeen balesaalula na bamunyinefwe ilyo bali pa kulongana! Ilingi line ba Yasmeen balelila pa mulandu wa kuti balebacusha.

¹⁵ Ba Yasmeen balebasansamusha no kubakoselesha ku ba bwananyina nga baya ku Ng’anda ya Bufumu. Baeluda babakoseleshe ukulakonka amashiwi yaba pa Abena Roma 12:17-21. (Belengeni.) Ba Yasmeen batile: “Taca-angwike ukucita ifi. Lelo nalilombele Yehova ukuti angafwe, kabili nale-esha apo ningapesha ukukonka ifyo Baibolo ilanda. Kanshi abena mwandi nga bapoosa ifisooso mu muputule wa kwipikilamo pa kuti bankalifye, nalewamya. Nga bantuka, nalebasuka cikuuku cikuuku. Kabili nga balwala, nalebasakamana bwino.”

16-17. Finshi mwasambilila ku lyashi lya ba Yasmeen?

¹⁶ Yehova alilambwile ba Yasmeen pa fyo balelanga ukutemwa ku bena mwabo. Ba Yasmeen balandile ukuti: “Abena mwandi balitendeke ukuncetekela sana pantu lyonse nalelanda icishinka. Balitendeke ukukutika kuli ine kabili balencindika nga tulelanda pa fya mapepo. Kabili balandile no kuti bali no kuleka ukuncusha. Pali ino nshita balankoselesha ukuya mu kulongana. Na kabili ndomfwana bwino na bena mwandi kabili pa ng’anda paliba umutende. Nsubila ukuti bushiku bumo abena mwandi bakasambilila icine kabili bakatendeka ukubombela Yehova pamo na ine.”

¹⁷ Ilyashi lya ba Yasmeen lilanga ukuti “ukutemwa kulasuulako ku fya bubifi fyonse, . . . kusuubila fyonse, kushipikisha fyonse.” (1 Kor. 13:4, 7) Nangu ca kuti ulupato lwalikwata amaka, ukutemwa kwalikwata sana amaka ukucila ulupato. Nga tulelanga ukutemwa ku bantu, nalimo kuti baleka ukutukaanya ukubombela Yehova. Kabili nga tulecita ifi tulalenga Yehova ukusekelela. Na lintu abatukaanya batwalilila ukutupata, kuti twatwalilila ukuba ne nsansa. Cinshi twalandila ifi?

18. Cinshi twingabela ne nsansa abantu nga batupata?

¹⁸ Yesu atile: “Mwalipaalwa nga abantu bamupata.” (Luka 6:22) Tatufwaya ukutupata. Kabili tatumfwa bwino ukutucusha pa mulandu wa kubombela Yehova. Nomba cinshi twingabela ne nsansa abantu nga batupata? Moneni ifintu fitatu ifilenga tuleba ne nsansa. Ica kubalilapo, nga twashipikisha Lesa alatutemenwako. (1 Pet. 4:13, 14) Icalenga bubili, icitetekelo cesu cilakoselako. (1 Pet. 1:7) Ne calenga butatu, tukapokelela icilambu icisuma nga nshi, e kutila umweo wa muyayaya.—Rom. 2:6, 7.

19. Cinshi calengele abatumwa basekelele pa numa ya kubafopaula ifikoti?

¹⁹ Ilyo papitile fye inshita iinono ukutula apo Yesu abuukile, abatumwa bali ne nsansa isho Yesu alandilepo. Pa numa ya kubafopaula no kubeba ukuleka ukubila imbila nsuma, balisekelele. Cinshi calengele basekelele? Icalengele ni co “basangilwe abawamina ukuculila ishina [lya kwa Yesu].” (Imil. 5:40-42) Balitemenwe sana Shikulu wabo ukucila ifyo baletiina abalwani babo ababapatile. Kabili balilangile ifyo batemenwe Shikulu wabo ilyo batwalilile ukubila imbila nsuma “ukwabula ukuleka.” Aba bwananyina abengi muno nshiku nabo balitwalilila ukubombela Yehova ne cishinka nangu ca kuti balaba na mafya. Balishiba ukuti Yehova takalabe imilimo yabo no kutemwa uko balanga kwi shina lyakwe.—Heb. 6:10.

20. Finshi tukasambilila mu cipande cikonkelepo?

²⁰ Aba muli ici calo bakatwalilila ukutupata mpaka cino calo cikapwe. (Yoh. 15:19) Lelo tatulingile ukuba no mwenso. Nga fintu tukasambilila mu cipande cikonkelepo, Yehova ‘akakosha no kucingilila’ ababomfi bakwe aba cishinka. (2 Tes. 3:3) Kanshi natutwalilile ukutemwa Yehova, bamunyinefwe na bankashi, ukubikako fye na balwani besu. Nga tulecita ifi tukatwalilila ukuba abaikatana, tukalenga icitetekelo cesu ukukoselako, tukalenga Yehova ukucindikwa, kabili tukalalanga ukuti ukutemwa kwalikwata sana amaka ukucila ulupato.