‘Baali Aba Kupembeesula!’

NOMBA line fye umukalamba wa pa hotela lyabela lwa mupepi ne cibansa ca ndeke ica mu Japan alitandalile iofesi lya Watchtower Society mu Ebina. Alemoneka fye uwasekaseka. Mulandu nshi?

Mu 1998, Inte sha kwa Yehova ukucila pali 200 balikelepo pa hotela lyakwe pa kuya na pa kubwela ku mabungano ya pa kati ka nko mu Afrika, ku Australia, ku Korea, na ku North America. Lintu ababomfi ba pali lilya ihotela bakumene ku kupituluka mu mibombele yabo iya mwaka onse, basosele ukuti pa batandashi 30,000 abo bapokelela cila mwaka, abo baipakishe sana ukuba na bo ni balya baleya ku mabungano.

Na muli fyo, umukalamba we hotela aliile ku Ebina ku kuyatasha. Atile, ‘Balya batandashi baali aba mucinshi kabili bashile imiputule yabo iya busaka kabili iyapempenkana. Ilingi baletutasha. Ukulundapo balitwebeleko na mashiwi ya kukoselesha ukufuma muli Baibolo. Baali aba kupembesula sana!’

Umukalamba we hotela atwalilile ukusosa ukuti: ‘Tulapokelela abatandashi abengi abapelelwa. E co tulafwayako ifyebo fimo ifingabafwa. Tulefwaya bakamwenemo mu kufunda kwa Baibolo pantu yena ilaafwa abantu ukwikala ubumi ubusuma.’

Pali uyu mulandu, umukalamba we hotela alombele ukuti bamupeko ifitabo 80 ifyalekanalekana ifyasabankanishiwa ne Nte sha kwa Yehova pa kuti engafibika mu miputule ya mu hotela. Pa fitabo alombele pali ne citabo ca mabula 192 icitila Icaba Inkaama ku Nsansa sha Lupwa. Nga mwingatemwa ukukwatako ici citabo, kuti mwaisushisha umukululo uli pali lino ibula no kutuma ku keyala kalipo nelyo ku keyala kalinga pe bula 5 muli uno wine magazini.

□ Ntumineniko icitabo citila Icaba Inkaama ku Nsansa sha Lupwa.

□ Ndelomba ukuti mukesemona ukukuma kwi sambililo lya Baibolo pa ng’anda pa mwandi.