Basolwesolwe mu Kundapa Ukwabula Umulopa

UMWINA Belgium wa myaka ya bukulu 61, uwe shina lya José, uwa ku kalitauni ka Oupeye, aebelwe ukuti alekabila ukubikwamo ilibu limbi. Atila, “Ici cintu camponeshe pa musao.” Imyaka fye 40 iyapitapo, tacatalile acumfwikapo ukuti umuntu nabamubikamo ilibu limbi. Nangu ni muli ba 1970, abalepusuka pa balebikwamo amabu bali fye mupepi na mapesenti 30. Nangu cibe fyo, ilelo, ukubika amabu mu bantu cintu cilecitwa lyonse, kabili banono fye balefwa.

Nalyo line kuciliko ubwafya ubukalamba. Apantu pa kubika ilibu mu muntu kulaba umulopa uwingi uusuuma, badokota ilingi line balabikamo umulopa ilyo balebombela umulwele. Pa mulandu wa fisumino fyakwe ifya mipepele, José alikeene ukumubikamo umulopa. Lelo, alefwaya ukumubikamo ilibu. Bushe kuti cacitika? E fyo bamo bengepusha. Lelo umukalamba wa badokota babombela abantu capamo na babomfi banankwe bamwene ifyo kuti bamubombela fye bwino ukwabula no kumubikamo umulopa. Kabili ifyo fine fye e fyo bacitile! Inshiku fye 25 pa numa ya kumubombela, José alifumine mu cipatala no kubwelela ku mwakwe ku mukashi no mwana wakwe umwanakashi. *

Pa mulandu wa kulamuka kwa balya badokota abo magazini wa Time eta ukuti “impalume sha fya cipatala,” umuti wabulamo umulopa no kulepula ukwabula ukubikwamo umulopa nomba nakuseeka ukucila na kale lyonse. Lelo mulandu nshi abengi balekufwaila? Pa kwasuka ico cipusho, lekeni tupituluke mu lyashi lyakokwesha ililenga ukupusana pa lwa mimwene ya kubikwamo umulopa.

[Futunoti]

[Icikope pe bula 3]

Pali nomba kuliko badokota ukucila 90,000 mwi sonde lyonse abailandile abene ukuti bali abaipeelesha ukundapa Inte sha kwa Yehova ukwabula umulopa