Ukulingana Na Baibolo

Bushe Kwalibako Ubufi Ubusuma?

“LIMO UKUBEPAKO PANONO KULAFWA UKUKANALONDOLOLA IFINGI.”

AYA mashiwi yalangilila ifyo abantu bayumfwa pa lwa kubepa. Imimwene yabo ya kuti ukubepa takwabipa kulila fye takulekalifya uuli onse. Uko kupelulula kwalikwata ne shina lya kuti ifishinte fya mibele, ukulangilila ukuti ifunde fye umo akabila ukukonka lifunde lya kutemwa. Mu mashiwi yambi, kalemba Diane Komp alondolola ukuti, “nga ca kuti icalenga ukuti ubepe e lyo na cintu ulefwaya fili ifye bwino (lyene ninshi) ukubepa . . . takubipile.”

Iyo mimwene yaliseeka mwi sonde ilelo. Umuseebanya pa mulandu wa bufi bwa bashimucindikwa ba mapolitiki ne ntungulushi sha calo walisungusha ubwikashi. Pa mulandu wa iyi mibele, abantu balinenunako ukuipeelesha kwabo ukwa kusosa icishinka. Mu fifulo fimo ukubepa kwalisuminishiwa na mwi funde. Umuntu umo uushitisha mwi tuuka ailishanya ukuti, “Ndafolelapo pa kubepa. Ndashitisha sana ukucila bonse kabili cila mwaka balapituluka mu mibombele yandi no kuntasha sana nga nabepa. . . . Ukuli konse, ici cimoneka kwati e co bacindamika ilyo balesambilisha umuntu ukushitisha mu matuuka.” Abengi basumina ukuti tamwaba ububi mu bufi bunono ubushikalifya bambi. Bushe e fyo caba? Bushe kwaliba inshita shimo ilyo Abena Kristu bengalungamika ukubeepa.

Icipimo Casumbuka Ica mu Baibolo

Baibolo ukwabula ukulamba yalibinda ukubepa ukuli konse. Kemba wa malumbo atila, “Mulofya abasoso bufi, mwe Yehova.” (Amalumbo 5:6; moneni Ukusokolola 22:15.) Pa Amapinda 6:16-19, Baibolo yatantika ifintu 7 ifya muselu kuli Yehova. “Ululimi lwa bufi,” ne “nte ya bufi iilande fya bufi,” fyalisanshiwa pali uyu mutande. Mulandu nshi? Pantu Yehova alipata ifyabipa ififuma mu kubepa. Uyu e mulandu umo Yesu aitile Satana ukuti uwa bufi kabili inkomi. Ubufi bwakwe e bwaletelela abantu ubulanda ne mfwa.—Ukutendeka 3:4, 5; Yohane 8:44; Abena Roma 5:12.

Fintu umulandu wa kubepa wakakala mu mimwene ya kwa Yehova calangililwa mu cacitikile Anania na Safira. Aba babili babepele abatumwa ku mufulo pa kufwaya ukumoneka bakapekape sana ukucila fintu baali icine cine. Bacitile co ku mufulo kabili balipekanishishe libela. Umutumwa Petro asosa ukuti: “Taubepele bantu, ubepele Lesa.” Na pali uyu mulandu,  bonse babili balifwile ku kuboko kwa kwa Lesa.—Imilimo 5:1-10.

Imyaka iingi pa numa, umutumwa Paulo akonkomeshe Abena Kristu ukuti: “Mwibepana.” (Abena Kolose 3:9) Uku kukonkomesha kuli ukwacindama maka maka mu cilonganino ca Bwina Kristu. Yesu asosele ukuti ukutemwa ukubimbamo ukutemwa fye abantu bonse e kukeshibisha abasambi bakwe aba cine cine. (Yohane 13:34, 35) Uku kutemwa kwa cishinka kuti kwakula bwino nga ca kuti pali ubufumacumi no kucetekelana. Calyafya ukutemwa umuntu uo tushicetekele ukuti akulatweba icine lyonse.

Nelyo cingati ukubepa konse kwalibipa, kumo kwalibipisha ukucila kumbi. Ku ca kumwenako, umo kuti abepa pa mulandu wa nsoni nelyo mwenso. Umbi na o kuti akwata icibelesho ca kubepa pa mulandu wa bubifi pa kuti alekalifya bambi. Pa mulandu wa lupato, uyu muntu uubepa ku mufulo alaba uwayafya kuli bambi kabili kuti atamfiwa mu cilonganino nga talapile. Apo te kubepa konse kuba pa mulandu wa lupato, umo nga abepa ubufi, mu cifulo ca kusondwelela fye ukuti ni mbifi, cili bwino ukushininkisha fyonse ifibimbilwemo mu kubepa. Mufwile ukwibukisha icalengele ukuti abepe.—Yakobo 2:13.

“Abacenjela Nge Nsoka”

Nalyo line, ukuba uwa cishinka tacipilibula ukukakililwako ku kusokolola ifyebo ifili fyonse ifyo umo atwipusha. Pali Mateo 7:6, Yesu asokele ukuti: ‘Mwipeela ca mushilo ku mbwa, nangu kupoosa bamargariti bobe kuli bakapoli, epali . . . baalukila ku kumulepaula.’ Ku ca kumwenako abalefwaya ukwishiba fimo pa milandu yalubana tabakwata insambu sha kwishiba ifyo fintu. Abena Kristu bafwile ukwishiba ukuti baleikala mu calo ca bulwani. E co Yesu afundile abasambi bakwe ukuba “abacenjela nge nsoka” na pa nshita imo ine ukuba “abafuuke nge nkunda.” (Mateo 10:16; Yohane 15:19) Te lyonse Yesu alesokolola icine conse, maka maka nga ca kuti ukusokolola ifishinka fyonse kwali no kumuletelela nelyo ukuletelela abasambi bakwe. Nalyo line, na pali sho nshita talebepa. Lelo, alesalapo ukukanalanda icili conse nelyo ukuletapo ilyashi limbi.—Mateo 15:1-6; 21:23-27; Yohane 7:3-10.

Abaume na banakashi ba busumino abalumbulwa mu Baibolo, pamo nga Abrahamu, Isaki, Rahabu, na Davidi na bo bene baali abashilimuka kabili abacenjela lintu balebomba na balwani. (Ukutendeka 20:11-13; 26:9; Yoshua 2:1-6; 1 Samwele 21:10-14) Baibolo isosa ukuti aba baume na banakashi baali bakapepa ba busumino aba cumfwila. Ico cibalenga ukuti bawaminwe ukupashanya.—Abena Roma 15:4; AbaHebere 11:8-10, 20, 31, 32-39.

Kuti kwaba inshita shimo lintu ukubepa kwingamoneka ukwangushako ifintu. Lelo Abena Kristu ilelo balacita bwino ukupashanya Yesu no kukonka kampingu wabo uwasambilishiwa na Baibolo lintu bali mu mibele yayafya nga nshi.—AbaHebere 5:14.

Baibolo itukoselesha ukuba aba cishinka kabili abafumacumi. Ukubepa kwalilubana, kabili tufwile ukukonka ukufunda kwa Baibolo ukwa kuti: “Lanshanyeni icine umuntu onse ku munankwe.” (Abena Efese 4:25) Nga twacite co tukakwata kampingu uwasanguluka, tukalundulula umutende no kutemwana mu cilonganino, kabili tukatwalilila ukucindika “Lesa wa cishinka.”—Amalumbo 31:5; AbaHebere 13:18.

[Icikope pe bula 28]

Anania na Safira balipaiwe pa mulandu wa kubepa