Ubupusano pa Bakankaala na Bapiina Buleya Bulekulilako

“Kuliko ubuyantanshi mu kucefyako ubupiina mu calo conse mu myaka 50 iyapitapo ukucila fintu cali mu myaka 500 iyabangilileko. Ukutula mu 1960 ifyalo ifipiina fyalicefyako imfwa sha bana banono ukufika kuli hafu wa baalefwa kale, insala yalicepelako, no kwingilishako [ukulembesha] impendwa ya bana be sukulu.” E fisosa ulupapulo lwa United Nations Development Programme, UNDP Today. Nangu cibe fyo, ulu lupapulo lumo lwine lulasumina ukuti te mulandu no bu buyantanshi, ubupiina “bucili ubwayanana” mu calo conse.

Icibipishe ca kuti, umuncishanya ku bekala calo abene na bene atemwa ku ba mu calo cimbi ulekulilako fye. Catherine Bertini, umukalamba wa kabungwe ka UN World Food Program atila, “Abantu abacula ku bulwele bwa nsala ne cipowe balalundwako cila mwaka.” Na kuba, pali ndakai, abantu mupepi na mamilioni 840 mu fyalo ifipiina baba mu nsala ya mutatakuya, bambi na bo ukucila pali bilioni umo tabakwata amenshi ya kunwa ayasuma, kumfwa bambi nalimo amabilioni 1.5 baliila mu ndalama ishacepako pali dola umo cila bushiku. Mary Robinson, UN High Commissioner for Human Rights, asoka ukuti “Tulolenkene no bwafya bwa kuti pa nshita imo kukaba fye amabumba yabili aya fyalo e kutila ifipiina ne fikankaala, te apo peka lelo kukaba ne fyalo ifyakwatisha indalama ne fishakwata nangu kamo.”

Bushe ni ndalama shinga shifwile ukupooswa pa kucefyako ubupusano pa bakankaala na bapiina mu calo conse umuli abantu amabilioni 6? Nakalimo kuti mwatila shingi, lelo shinono fye. Ba United Nations basanga ukuti pa kuti kwingaba ukupoosa ubusali no kuleta amenshi yasuma mu calo conse indalama amadola amabilioni 9 (e kutila amadola 1.50 ku muntu umo) cila mwaka e shingafwaikwa kabili amadola amabilioni 13 (napamo amadola yabili ku muntu umo) cila mwaka e shingapooswapo mu kupayanya ifya cipatala ifikabilwa sana ne fya kulya ku muntu umo na umo mu calo conse. Nangu cingati ishi ndalama shileumfwika ishingi sana, shilacepa lintu twaumfwa indalama isho icalo cipoosa ku fintu fimbi. Ku ca kumwenako, mu mwaka wa nomba line umo, icalo capoosele amabilioni ya madola 435 (e kutila amadola ukucila pali 70 ku muntu umo na umo) mu kwananya ifya makwebo kweka kabili capoosele amabilioni 780 aya madola (e kutila amadola 130 ku muntu umo) ku fyanso. Ukwabula ukutwishika ukucefyako ubupusano pa bakankaala na bapiina takwashintilila pa kufwaya indalama shingi lelo pa fifwile ukubalilapo lintu indalama shilebomfiwa.