Isubilo Lyashininkishiwa

MUPEPI ne myaka 2,000 iyapitapo, Yesu, uyo ilingi etwa umuntu wakulisha uwabalile abako uwa mweo, mu lufyengo bamupingwile ukwipaiwa. Ilyo apoopelwe pa cimuti ca kucushiwilwapo, imbifi imo iyapoopelwe lwa mupepi nankwe yamupumishe aiti: “Bushe iwe tauli Kristu? Shi uituule we mwine na ifwe.”

Pa kumfwa ifyo, iibiye iyapoopelwe na yo pa cimuti yaebawile imbifi inankwe ukuti: “Bushe iwe tauletiina Lesa, ico uli mu kusekwa kumo kwine? Kabili ifwe cena cintu calungama; pantu tulepokelele cilambu iciyene ne fyo twacitile. Lelo uyu tacitile icishiyene nakalya.” Lyene yapilibukile kuli Yesu no kumupaapaata ukuti: “Munjibukishe ilyo mukesa mu bufumu bwenu.”

Yesu atile: “Icine cine ndekweba ilelo nati, Uli no kuba na ine mu Paradise.” (NW)—Luka 23:39-43.

Yesu akwete isubilo lya kusungusha ilyabikilwe pa ntanshi yakwe. Umutumwa Paulo alondolola fintu ili isubilo lyakoseshe Yesu ukusosa ukuti: “Pa mulandu wa kusekelela  ukwabikilwe pa ntanshi yakwe, ashipikishe ku capindama, ukusuule nsoni.”—AbaHebere 12:2.

Mu “kusekelela” kwabikilwe pa ntanshi ya kwa Yesu mwasanshishe no kwikala na kabili na Wishi mu muulu na mu kupelako ukuba Kateka mu Bufumu bwa kwa Lesa. Icacilanapo ali no kukwata insansa sha kusengela abakonshi bakwe abaeshiwa no kucetekelwa mu muulu abakateka nankwe isonde nge shamfumu. (Yohane 14:2, 3; Abena Filipi 2:7-11; Ukusokolola 20:5, 6) Ni mwi kanshi Yesu aloseshe ilyo alaile imbifi yalapile ukuti yali no kuba mu Paradise?

Lisubilo Nshi Imbifi Yakwete?

Ilye mbifi tayafikilepo ukuteka pamo na Yesu mu muulu. Tayabapo pali balya Yesu aebele ukuti: “Abatwalilila na ine mu fya kunjesha ni mwe; ifyo Tata ampaatwilile ubufumu, na ine ndemupaatwila.” (Luka 22:28, 29) Lelo, Yesu alaile ukuti aali no kuba ne mbifi mu Paradise. Ni shani fintu ubo bulayo bukafikilishiwa?

Yehova Lesa abikile abantu ba kubalilapo babili, Adamu na Efa, muli Paradise uwali libala lya nsansa ilyaleitwa ukuti Edene. (Ukutendeka 2:8, 15) Edene yali pano pene pe sonde, kabili Lesa afwaile ukuti isonde lyonse likabe paradise. Nangu cibe fyo, Adamu na Efa tabaumfwilile Lesa kabili balitamfiwe mu mushi wabo uwayemba. (Ukutendeka 3:23, 24) Lelo Yesu asokolwele ukuti Paradise ali no kubweshiwa no kuti akaba uwa mwi sonde lyonse.

Lintu umutumwa Petro aipwishe Yesu ico ena na batumwa banankwe bali no kupokelela pa kuba abakonshi bakwe, Yesu alaile ukuti: ‘Mu kulengwa cipya cipya, ilyo Umwana wa muntu akekala pa cipuna ca bukata bwakwe, imwe mwe bankonka mukekala pa fipuna ikumi na fibili.” (Mateo 19:27, 28) Mu bulondoloshi bwa kwa Luka pali uku kulanshanya Yesu ayambulwa ukusosa ukuti “mu bwikashi ubukesa,” mu cifulo ca kusosa ukuti “mu kulengwa cipya cipya.”—Luka 18:28-30.

E co, lintu Yesu Kristu akekala pa cipuna cakwe ica lulumbi mu muulu, capamo na bakateka banankwe, akaletako ubwikashi bupya ubwalungama. (2 Timote 2:11, 12; Ukusokolola 5:10; 14:1, 3) Ukupitila mu kuteka kwa kwa Kristu ukwa ku muulu, imifwaile iya kutendekelako iya kwa Lesa iya kulenga isonde ukuba Paradise ikafikilishiwa!

Mu kuteka kwa ubu Bufumu, Yesu akafikilisha ubulayo bwakwe ku ntalamisoka yafwilile mupepi nankwe. Akaibuusha, kabili ikaba umwikashi wa pe sonde uwa kwa Yesu. Lyene iyi mbifi ikasambilishiwa ukwishiba ifyo Lesa afwaya kabili nga ikakonka fyene ikekala kuli pe na pe mu buteko bwa Bufumu. Ukwabula no kutwishika kuti twasekelela mu cilolelo cashimpwa pali Baibolo ica kwikala kuli pe na pe muli Paradise pe sonde!

Ubumi Kuti Bwakwata Ubupilibulo

Elenganyeni fintu ilyo isubilo likalamba lingalenga ubumi bwesu ukukwata ubupilibulo. Kuti lyatwafwa ukucingilila imintontonkanya yesu ku fya kufumamo fyabipa ifya kupopomenwa. Umutumwa Paulo alingenye ili isubilo ku lubali lwacindama ulwa fya bulwi fya ku mupashi. Asosele ukuti tufwile ukufwala ica ‘kucetekele pusukilo nge ca kucingo mutwe.’—1 Abena Tesalonika 5:8; Amalumbo 37:29; Ukusokolola 21:3, 4.

Isubilo lya musango yo lilatungilila ubumi. Muli Paradise uleisa, ukupopomenwa kukapyanikwapo ne filamba fya buseko lintu abatemwikwa besu bakabuushiwa kuli “Lesa uubuusha abafwa.” (2 Abena Korinti 1:9) Lyene ukukalifiwa no kunaka kwa cifyalilwa, ubukali, no kulemana fikalabwa, pantu “uwalemana amolu akacilauka nge nsebula.” ‘Umubili’ wa muntu ‘ukalelema ukucila uwa mwaice’ kabili akabwelela “ku nshiku sha bulumendo bwakwe.”—Esaya 35:6; Yobo 33:25.

Pali yo nshita, lintu “umwikashi wa mu calo takasose, ati, Nindwala,” ukulufya isubilo pa mulandu wa kulwalilila kukafumishiwapo. (Esaya 33:24) Ukupopomenwa kwamutatakuya kukapyanwapo “no kusekelela kwa muyayaya.” (Esaya 35:10) Amalwele yashipola yakapwila pamo ne mfwa, umulwani wakokwesha uwa bantunse.—1 Abena Korinti 15:26.

[Ifikope pe bula 18, 19]

Twalilileni ukwibukisha isubilo lya kusungusha ilya calo cipya ica kwa Lesa