Ukulingana na Baibolo

Bushe Caliba fye Bwino Ukupepa Yesu?

UKUTULA fye ku kale, aba mu Kristendomu abengi balipepa Yesu Kristu kwati e Lesa Wa maka yonse. Lelo Yesu umwine apepele fye Yehova Lesa epela. Ku ca kumwenako, lintu atunkilwe ukupepako Kaseebanya nangu fye umuku umo, Yesu atile: “[Yehova, NW] Lesa obe e o ulepepa, kabili wene eka e o ulebombela.” (Mateo 4:10) Pa nshita imbi Yesu asambilishe abasambi bakwe ukuti: “Mwiita uwa pano isonde, Tata; pantu Shinwe umo, uwa mu muulu.”—Mateo 23:9.

Yesu alondolwelele umwanakashi umwina Samaria umusango abantu umo umo balingile ukupepelamo Lesa. Bafwile ukumupepela mu mupashi na mu cine. Pantu, “na Tata afwaya aba musango uyu babe aba kumupepa.” (Yohane 4:23, 24) Ca cine, Lesa eka fye e ulingile ukupepwa muli uyo musango. Ukupepa uuli onse nelyo icili conse cimbi kuti caba musango wa kupepa utulubi, ukushasuminishiwa mu Malembo ya ciHebere na ya ciGriki.—Ukufuma 20:4, 5; Abena Galatia 5:19, 20.

Bamo kuti bakaana abati, ‘Bushe Baibolo tailangilila ukuti tufwile ukupepa Yesu na o wine? Bushe Paulo tasosele pa AbaHebere 1:6 ukuti: “Na bamalaika bonse ba kwa Lesa bamupepe [Yesu]”?’ Kuti twaumfwikisha shani ili lembo ukulosha ku co Baibolo isosa pa lwa kupepa utulubi?

Umo Baibolo Ilosha pa lwa Kupepa

Pa kubala, tulingile ukumfwikisha ico Paulo apilibwile pa lwa kupepa. Abomfeshe ishiwi lya ciGriki ilya prō·skē·neʹō. Unger’s Bible Dictionary isosa ukuti ili shiwi nga kulikonka fye lipilibula ‘ukutomona ukuboko kwa muntu nge cilangililo ca kupeela umucinshi nelyo ukucindika.’ An Expository Dictionary of New Testament Words, iya kwa W. E. Vine, isosa ukuti ili shiwi “lilangilila umucinshi, uupeelwa ku muntu . . . nelyo kuli Lesa.” Mu nshita balelemba Baibolo prō·skē·neʹō ilingi line yalesanshamo ukukontama ku cinso ca muntu wacindama.

Tontonkanyeni pa mulumbe Yesu alandile uwa musha uwafililwe ukulipila imisha iingi akwatile shikulu wakwe. Ili shiwi lya ciGriki lilasangwa muli uyu mulumbe, kabili pa kulipilibula, Baibolo wa King James Version isosa ukuti “umusha awile pa nshi, no kupepa [umusango wa prō·skē·neʹō] wene [imfumu], ati, mwe Shikulu mutekanye pali ine, na ine nkamufuta fyonse.” (Mateo 18:26; Ifilembo fipindeme fyesu.) Bushe ico uyu mwaume acitile kupepa utulubi? Nakalya! Alepeela fye umucinshi na katiina ifyalinga ku mfumu, shikulu wakwe kabili nga ku mukalamba.

Ukutoota kwa musango yo, nelyo ukucindika, kwaliseekele mu fyalo fya ku Kabanga mu nshita Baibolo yalelembwa. Yakobo  akonteme imiku 7 ilyo akumenye munyina, Esau. (Ukutendeka 33:3) Bamunyina kwa Yosefe bawile pa nshi, nelyo ukutoota, ku cinso cakwe pa kucindika icifulo akwete kwi sano lya bena Egupti. (Ukutendeka 42:6) Ukwishiba ifi fishinka kuti kwatulenga ukumfwikisha icacitike lintu bakalengula wa ntanda basangile Yesu akanya, uo batile “uufyelwe Imfumu ya baYuda.” Ukulingana ne fyo lyapilibulwa muli King James Version, calondololwa ukuti “bawile pa nshi, no kupepa [prō·skē·neʹō] wene.”—Mateo 2:2, 11.

Kanshi, cailanga fye apabuuta ukuti ishiwi prō·skē·neʹō, ilyapilibulwa “ukupepa” mu maBaibolo yamo, talipilibula fye umucinshi upeelwa kuli Yehova Lesa. Kuti lyalosha na ku mucinshi upeelwa ku muntu umbi. Pa kuti pelaba ukufulunganishiwa, amaBaibolo yamo yapilibula prō·skē·neʹō pa AbaHebere 1:6 ukuti “bamupeele umucinshi” (New Jerusalem Bible), “bamucindike” (The Complete Bible in Modern English), “bawe ubukupeme ku cinso cakwe” (Twentieth Century New Testament), nelyo “bacindike wene” (New World Translation).

Yesu AIiwaminwa Ukucindikwa

Bushe Yesu aliwaminwa umucinshi wa musango yo? Ee, ukwabula no kutwishika! Muli kalata wakwe ku baHebere, umutumwa Paulo alondolola ukuti nge “mpyani ya fintu fyonse,” Yesu aikala “ku kulyo kwa Bumulopwe mu muulu.” (AbaHebere 1:2-4) Pa mulandu wa ici, “kwi shina lya kwa Yesu ikufi lyonse likafukame, ilya mu muulu ne lya pano nse ne lya pa nshi ya calo, no lulimi lonse lukasose, ukuti, Yesu Kristu e Shikulu; kube ubukata kuli Lesa Shifwe.”—Abena Filipi 2:10, 11.

Icacindamisha ca kuti, Kristu alaswa abomfye ici cifulo casumbukisha na maka yakalamba aya cifumu ayo apeelelwa pamo ne ci cifulo ku kwalula isonde lyonse ukuba paradise. Pa kutungululwa na Lesa, na pa mulandu we lambo lya cilubula ilya kwa Yesu, akafumya pe sonde ubulanda bonse, ukukalipwa, no kuloosha pa kuti cikawamine abainashisha ku mitekele yakwe iyalungama. Bushe kwena tawaminwa umucinshi wesu, ukucindikwa, no kumunakila?—Amalumbo 2:12; Esaya 9:6; Luka 23:43; Ukusokolola 21:3, 4.

“Lesa wa Kalumwa”

Nalyo line, Baibolo ilangilila fye apabuuta tutu ukuti ukupepa kwesu, e kuti kulya ukwa kucindika no kuipeelesha ku mipepele, kufwile fye ukupeelwa kuli Lesa epela. Mose amulondolwele ukuti ni “Lesa wa kalumwa.” Kabili Baibolo itucincisha ukupepa “uwacitile umuulu ne calo na bemba no tumfukumfuku twa menshi.”—Amalango 4:24; Ukusokolola 14:7.

Ukwabula no kutwishika Yesu alicindama mu mipepele ya cine, uwawaminwa umucinshi no kucindikwa. (2 Abena Korinti 1:20, 21; 1 Timote 2:5) E nshila fye yeka iyo twingalandilamo na Yehova Lesa. (Yohane 14:6) Pali uyu mulandu, Abena Kristu ba cine balacita bwino ukupepa fye Yehova Lesa, Uwa maka yonse.