Bushe El Niño Cinshi?

Lintu umumana wabulamo amenshi uwa Apurímac uwaba mupepi na Lima, ku Peru wapyangilile conse ico Carmen akwete, atile: “Tuli bengi fwebo ciponene, abengi sana. Te ine neka.” Ukulola ku kapinda ka ku kulyo, imiloke pa nshita imo yalengele incende ya ciswebebe ca Sechura icabela lwa ku lulamba ukusanguka cibemba ca bubili ku bukulu mu Peru, icakulile ukufika ku masikweya kilomita 5,000. Mu fifulo fimbi ukushinguluke sonde, ilyeshi likalamba, inkuuka shikalamba, ne filala fyabipisha fyaletele ifipowe, ifikuko, imililo ya mu mpanga, no bonaushi ku fipe ne sonde. Cinshi calengele ifi fyonse? Abengi batila ni El Niño uwaimine mu Pacific Ocean, ku ncende shakabisha nelyo ku equatorial ku kupwa kwa 1997 iyasendele imyeshi 8.

Bushe El Niño yine cinshi? Itendeka shani? Mulandu nshi icitikila mpanga yonse? Bushe ukwima kwa iko ukwingakonkapo kuti kwasoobelwa mu kulungika, pa kuti ubusanso ku bumi no bonaushi ku fipe bwingacepako?

Ukukaba kwa Menshi e Kutendekelapo

Magazini wa Newsweek atila, “Ukulungatika fye, El Niño kukonkoloka kwa menshi yakaba ayafuma mupepi no lulamba lwa Peru lyonse pa numa ya myaka ibili ukufika ku myaka 7.” Ukucila pa myaka 100, abenda pa menshi ukukonka ululamba lwa Peru balyumfwa uko kukaba. Apo uko kukonkoloka kwa menshi yakaba kucitika mupepi ne nshita ya Krisimasi, kwainikwa ati El Niño, ishiwi lya ciSpanish ilipilibula Yesu ilyo aali akacece.

Ukukaba kwa menshi mupepi no lulamba lwa ku Peru kulalenga imfula ukuloka sana muli cilya calo. Imfula ilalenga ifiswebebe ukupuuka ne nama ukukula sana. Imfula nga yaloka sana, ilaleta na bamulamba muli ilya ncende. Na kabili, amenshi yakaba ayaba pa muulu wa bemba yalacilikila amenshi yatalala ayaisulamo umulyo ku kwisa pa muulu. E ico ifibumbwa fya mu menshi ifingi ukusanshapo fye ne fyuni fimo filakuuka ku kuyafwaya ifya kulya kumbi. Amafya ayo El Niño iletako yalakuma fye ne ncende shimbi ishabela ukutali ukufuma ku lulamba lwa Peru. *

Umwela na Menshi e Fileta El Niño

Cinshi cileta uku kwingilishiwako kwaibela ukwa kukaba mupepi no lulamba lwa Peru? Pa kumfwikisha ici, intanshi  natulande pa mpito, yaishibikwa ukuti Walker Circulation, iyaba mu lwelele pa kati ka kabanga na masamba ya ncende yakabisha iya ku Pacific. * Lintu akasuba kakafya amenshi ya pa muulu ku masamba, mupepi na Indonesia na Australia, umwela wakaba kabili uwa cipuki uleema ukuya mu lwelele, icilenga ukuti amenshi yali lwa pa muulu yatalaleko. Umwela nga uleima ulatalala kabili ulaleka ukuba no mutonshi, no kuleta imfula kuli ilya ncende. Uyu mwela wabula umutonshi ulasendwa lwa ku kabanga ku mwela uba mu lwelele sana. Nga waya ku kabanga, ulatalalilako kabili ulafininako no kutendeka ukubwela pa nshi lintu wafika mu Peru na Ecuador. Icifumamo ciba mwela wafina sana uuba mupepi na bemba. Kabili lwa mwi samba, umwela waishibikwa nga trade winds ulaaluka walaya ku masamba ukulola ku Indonesia, na muli fyo ukupwishishisha impito.

Ni shani fintu umwela witwa trade winds, wambukila imiceele mu ncende shakabisha isha ku Pacific? Newsweek yatila, “Ilingi line uyu mwela ubomba nga mutunga mu cishiba uulesunkila amenshi yakaba ku kabanga ka Pacific ica kuti na bemba alashikilako ukufika kuli basentimita 60 no kukabilako ukufika ku madigiri Celcius 8 ukucila icalo pamo nga Ecuador.” Ku kabanga ka Pacific amenshi ayatalala ayaisulamo umulyo ukufuma pa nshi yalesa pa muulu, icilenga ifya mweo mu menshi ukukula bwino. E co, imyaka ilyo kushiba El Niño, ku kabanga ka bemba kulatalalapo ukucila ku masamba.

Kwaluka nshi mu mwela kulenga ukuti kubeko El Niño? National Geographic itila, “Pa milandu iyo basayantisiti bashaumfwikisha na nomba, lyonse pa numa ya myaka inono umwela wa trade winds, ulabwela mwi samba nelyo fye ukuluba.” Lintu uyu mwela wanakako, amenshi ayakaba ayesula lwa ku Indonesia yalaya yalesabauka ukubwelela ku kabanga, kabili yalenga fibemba mu Peru na mu ncende shimbi ukukaba. Na muli fyo iyi myendele ilaletako ukwaluka mu lwelele. Ulupapulo lumo lutila, “Ku kabanga ka ncende shakabisha isha ku Pacific Ocean nga  kwakaba, impito ya Walker Circulation ilanakako ne cifumamo, umwela uuleta imfula ya citalawe ulasela ukufuma ku masamba ukuya ku kabanga ukulola fye lwa pa kati ka kabanga ka ncende yakabisha iya Pacific.” E co, imiceele lwa ku Pacific yonse ilaaluka.

Ukupala Umwalaala mu Mulonga

El Niño kuti yaalula ne miceele mu ncende shabela ukutali ukufuma ku mukuuku wa menshi uwa ku Pacific. Mu nshila nshi? Pa kubomfya impito ya mu lwelele. Ififuma mu kupumfyanishiwa kwa iyi mpito ya mu lwelele kuti fyapashanishiwa ku fyo umwalaala pa kati ka mulonga wingalenga amatamba yanono ukukumana umulonga onse fye. Amakumbi ya mfula ayema pa muulu wa menshi pali fibemba yalapanga ifyapala umwalaala mu lwelele, ifyambukila imiceele na ku ncende fye ishibelele apatali.

Nga yafika ukutali El Niño ilaluminako no kupyana umwela uubutukisha sana, ukulola lwa ku kabanga uwaishibikwa nga jet streams. Pali ishi ncende, uyu mwela uubutukisha e upima uko inkuuka ilelola. Umwela witwa jet streams nga waluma kabili wasela, ulawamya nelyo ukubifya imiceele. Ku ca kumwenako, nga kuli El Niño, mu mpepo incende shabela ku kapinda ka kulyo aka United States shitalala fye panono, lelo ku fyalo fyabela ku kapinda ka kuso, imfula ilalokesha kabili kulatalalisha.

Bushe Kuti Yasoobelwa Shani?

Inkuuka imo na imo kuti yasoobelwa inshiku fye ishinono ilyo ishilacitika. Bushe El Niño na yo kuti yasoobelwa mu nshila imo ine? Iyo. Mu cifulo ca kusanshamo imiceele ya pa nshita fye iinono, ukusoobela El Niño kubimbamo imiceele yabipa mu ncende ishikalamba kabili pa myeshi iingi cila nshita. Abasapika pa lwa miceele balatungulukako panono mu kusoobela El Niño.

Ku ca kumwenako, El Niño uwaliko mu 1997-1998 asoobelwe mu May 1997, e kuti imyeshi 6 ilyo ashilaima. Mu ncende shakabisha isha ku Pacific nomba kulasangwa ifya kupiminako umwela 70 ifyelela pa menshi. Fipima imyendele ya mwela pali bemba no kukaba no kutalala kwa bemba ukufika pa nshi sana apashikile bamita 500. Lintu ifyebo pa lwa miceele fyapishiwa muli kompyuta, filasoobela pa lwa miceele.

Ukusokwa pa lwa El Niño mu kubangilila cine cine kuti kwaafwa abantu ukuipekanishisha ku kwaluka kwingenekelwa. Ku ca kumwenako, ukutula 1983, ukusoobela ukubapo kwa El Niño mu Peru kwakoseleshe abalimi abengi ukuteka ing’ombe no kulima ifilimwa fimbi ifingamena mu miceele ya miloke, lubali lumbi abalondo balaleka ukwipaya isabi no kwalukila ku kwikata shrimp iyatemwa sana mu menshi ayakaba. Ca cine ukusoobela kwalungika pamo pene no kupekanishisha libela kuti kwacefyako amafya El Niño aleta pa bantu na pa bunonshi bwa calo.

Ukusapika kwa basayantisiti ukwa fintu ifyambukila imiceele ya pano isonde kushininkisha ukuti amashiwi yapuutwamo ayalembelwe ne Mfumu Solomone iya kwa Israele wa pa kale imyaka 3,000 iyapitapo yalilungika. Alembele ukuti: “Umwela uya ku kapinda ka ku kuso ushingulukila ku kapinda ka ku kulyo, umwela uya uleshingulukashinguluka, umwela ubwelela pa kushinguluka kwa uko.” (Lukala Milandu 1:6) Pali ino nshita umuntu alisambilila ifingi pa lwa miceele ukupitila mu kwishiba imyendele ya mwela mu lwelele na pa menshi. Shi natumwenemo muli uku kwishiba pa kumfwila ukusoka ukulosha ku fya kuponako pamo nga El Niño.

[Amafutunoti]

[Akabokoshi pe bula 19]

UBONAUSHI BWA EL NIÑO UKUFIKA PALI NDAKAI

■ 1525: Ukwima kwa kubalilapo ukwa El Niño mu Peru.

■ 1789-93: El Niño yaipeye abantu ukucila pali 600,000 mu India kabili yaletele icipowe cabipisha ku kapinda ka kuso aka Afrika.

■ 1982-83: El Niño yaletele imfwa sha bantu ukucila pali 2,000 no bonaushi ku fipe ukucila pali badola amabilioni 13 mu ncende shakabisha.

■ 1990-95: Ifintu fitatu ifyakonkene capamo fyaletele El Niño iyasendele inshita yalepeshapo ukucila yonse.

■ 1997-98: Nangu cingati balitungulwike mu kusoobela bamulamba ne filala ifyali no kuletwa na El Niño, mupepi na bantu 2,100 balifwile, kabili kwali ubonaushi ku fipe ubwafikile ku ndalama badola amabilioni 33 mu calo conse.

[Ifikope na Mamapu pe bula 17]

(Nga mulefwaya ukumona ifikope na mamapu, moneni muli magazini)

 NINSHI KULI BWINO

“Walker Circulation”

Icikuuku ca mwela witwa “trade winds”

Amenshi yakaba aya muli bemba

Amenshi yatalala aya muli bemba

EL NIÑO

Umwela witwa “Jet stream” waselela ku kapinda ka ku kulyo

Umwela uushaluma

Amenshi yakaba yaselela ku kabanga

Ukukabilako nelyo icilala cakulilako ukucila lyonse

Ukutalalilako nelyo imfula ukulokesha ukucila lyonse

[Ifikope pe bula 18]

(Nga mulefwaya ukumona ifikope, moneni muli magazini)

EL NIÑO

Ukukashika kwa menshi pali uyu mapu we sonde kulelangilila ukukaba kwa menshi ukucila fintu yaba lyonse

NINSHI KULI BWINO Amenshi yakaba yaisula ku masamba ya Pacific, ukulenga amenshi yatalala ayaisulamo ifilyo ukwima ku kabanga

EL NIÑO Umwela uushaluma ulenga amenshi yakaba ukubwelulukila ku kabanga, ukucilikila amenshi yatalala ku kwisa pa muulu

[Ifikope pe bula 16, 17]

PERU

Ilyeshi mu ciswebebe ca Sechura

MEXICO

Icikuuku citwa “Hurricane Linda”

CALIFORNIA

Amatipa

[Abatusuminishe]

Amabula 16-17 ukufuma ku kuso ukuya ku kulyo: Fotografía por Beatrice Velarde; Abakopele icikope ni ba Laboratory for Atmospheres, NASA Goddard Space Flight Center; Icikope ca ba FEMA kuli Dave Gatley