Bushe Imibele Naibipisha Ukucila Kale?

NGA mwali no kwipusha abalemba ilyashi lya kale ukuti, “Bushe imibele ya bantu pali lelo yalibapo bwino nelyo bushe yalicilapo ukubipa ukucila iya ku kale?” bamo kuti bayasuka ukuti calishupa ukulinganya imibele ya mu nshita shapusanapusana. Nalimo kuti bayumfwa ukuti inkulo iili yonse ilingile ukupiminwa ukulingana ne fyalecitika muli ilya ine nkulo.

Ku ca kumwenako, tontonkanyeni pa lwa kulunduluka kwa bumpulamafunde ku Bulaya ukutula muli ba 1500. Pa myaka 400 iyapitapo ubukomi bwaliseekele. Abantu ilingi line baleilandwila abene beka, kabili ukwipayana pa kati ka ndupwa kwaliseekele.

Nangu cibe fyo, bakalemba ba lyashi lya kale Arne Jarrick na Johan Söderberg balemba mu citabo icitila Människovärdet och makten (Umucinshi wa Bantu na Maka Yabo) ukuti imyaka ukufuma mu 1600 ukufika mu 1850 “yaishibikilwe ku kutumpuluka kwa cine cine ukwa mikalile ya bantu” mu fifulo fimo fimo. Abantu batendeke ukumfwana bwino kabili babele abalangulukilako sana. Ku ca kumwenako, bakalemba ba lyashi lya kale bambi basosele ukuti ubupupu na bumpulamafunde tafyaseekele muli ba 1500 ukucila fintu fyaba ilelo. Maka maka ku mishi te lingi caleumfwika ukuti mu mushi mwaliba ibungwe lya bapupu.

Ca cine, ukuti icimusango ca kwikata abantu ubusha e ko cali, kabili calengele ukuti kubeko bumpulamafunde bwabipisha mu lyashi lya kale pamo nga—filya ifyalo abasulwishi ba ku Bulaya balesenda abasha ukufuma mu Afrika no kuya mu kubacululusha mu fyalo baletwalwako.

E co, nga twaibukisha ifyapita pa myaka iingi, kuti twasanga ukuti lintu twabebeta ifyalecitika, fimo fimo fyaliko bwino, e lyo fimbi na fyo fyalibipishe. Te mulandu ne fyo, icintu cimo icaibela kabili icabipisha, icishingalinganishiwako, calicitike muli ba 1900 kabili cicili cilecitika.

Imyaka ya ba 1900—Apa Kwalukila

Bakalemba ba lyashi lya kale Jarrick na Söderberg batila: “Muli ba 1930 ubukomi bwalekanalekana na kabili bwailileko pa muulu, kabili ica bulanda cili ca kuti ukutula iyo nshita ubukomi bwalitwalilila ukucila na pa myaka 50.”

Ukulingana no kulandapo kwa bengi, kwaliko ukubotelela ukukalamba ukwa mibele muli ba 1900. Umushikakulo pa lwa fishinte fya mibele isuma usosa ukuti: “Umuntu  kuti aimwena fye apabuuta ukuti ifyo abantu bamona ukulaalana ne capokelelwa nge mibele isuma fyalyaluka apakalamba mu myaka 30 ukufika kuli 40 iyapitapo. Mu bwikashi bwa pa kale abantu balepanga amafunde ya mibele isuma ayo balekonka sana. Ilelo abantu baliikwatila ubuntungwa bwa kucita ico batemenwe.”

Ici cilepilibula ukuti ukulaalana ne mibele fye imbi fintu ifyo abantu abengi baleyumfwa ukuti e bafwile ukuipingwila abene beka. Pa kulangilila ici cishinka, umushikakulo walandile pa fipendo fyalelangilila ukuti mu 1960 amapesenti fye 5.3 aya bana bonse abafyelwe mu United States e bali abana ba mu cani. Mu 1990 icipendo cafikile ku mapesenti 28.

Mu lyashi lyalandilwe pa Yuniversiti ya Notre Dame, uwa mu ng’anda ya mafunde iya ku United States Joe Lieberman alondolwele imibele ya muli ino nkulo ukuti “ya cabe cabe, . . . iyo mu kupita kwa nshita yaonaula imfundo sha calungama ne calubana.” Ukulingana na Lieberman, uyu musango wa mibele “watendeke ukulundululwa mu nkulo shibili ishaishibikwa sana.”

Ukuipingwila

Cinshi bakalemba be lyashi lya kale ne ncenshi shimbi batila e calengele ukuti kubeko uku kwaluka kwamonekesha muli ba 1900? Icitabo citila Människovärdet och makten cisosa ukuti, “Ukwaluka kumo ukwacindamisha mu bwikashi bwa bantu pa myaka 200 iyapitapo kwa kuipingwila ica kucita.” Ukuipingwila ica kucita kwapilibwile ukuti “abantu bafwile ukuisalila abene beka pa cili fye conse. Iyi mfundo . . . yatendekwe na ba mano ya buntunse abaikeleko mu myaka ya ba 1700, ababalilepo . . . ukukaana ukuti Baibolo tayaba e ntulo fye yeka iya cine.” E co imipepele, maka maka iya mu Kristendomu, taimonwa nge ingacingilila imibele isuma nga fintu yalemonwa kale.

Lelo mulandu nshi casendele imyaka ukucila pali 200 pa kuti fye amano ya buntunse ayatendekwe muli ba 1700 yaseeke? Icitabo cilumbwilwe mu kubangilila cisosa ukuti, “Tacali icayanguka ukusalanganya ishi mfundo ku cintubwingi. Ukwalukila ku nsambu sha kuipingwila kwali kwa panono panono.”

Nangu ca kuti ukuleka imibele ya cifyalilwa ne ya Bwina Kristu kwaile kulapwa panono panono mupepi no kufika ku myaka 200 iyapitapo, lelo kwalyangufyenye sana muli ba 1900. Maka maka mu makumi ya myaka ayapitilepo e lyo ici cicililemo. Mulandu nshi cibelele fyo?

Bukaitemwe no Bufunushi

Ukulunduluka kwa kapeleko mu fya kupangapanga na mu fya bunonshi mu bwikashi bwa buntunse muli ba 1900 e cikalamba calenga. Icipande ca muli magazini wa lyashi uwa ku Germany uwitwa ukuti Die Zeit casosele ukuti tuleikala “mu nshita ya kwaluka kukalamba, ukupusanako ne nshita sha ku kale, umo ifintu fyabela fye umo fyabela.” Icipande calondolwele ukuti ici calenga ubuntungwa bwa  kucimfyanya mu fya makwebo, ubulengwa na bukaitemwe.

Icipande catwalilile ukusosa ukuti: “Ubu bukaitemwe, tabwingaleshiwa no uuli onse. Na muli fyo cilenga ubucushi ubo tupitamo cila bushiku, pamo no bufumfuntungu, ubwayambukila no buteko mu fyalo ifingi. Abantu tabalangulukilako bambi, bafwaya fye ukuisekesha abene beka.”

Pa numa ya kwipushaipusha abantu uwasoma ifya mikalile ya bantu Robert Wuthnow, uwa pa Princeton University, asangile ukuti abena Amerika ilelo nabatemwisha indalama ukucila fintu bashitemenwe mu nkulo iyapitapo. Ukulingana no kufwailisha casangilwe ukuti, “abena Amerika abengi batila ukutemwisha indalama kwalenga ukuti abantu belacindika abantu banabo, ukubulwo bufumacumi pa ncito no ku kanaafwana mu ncende bekala.”

Ubufunushi mu bwikashi nabulundulukilako pantu abakalamba ba ncito mu fya makwebo baliilundilako indalama ishingi isha kufola ne ndalama shishaifulila isha penshoni uku ninshi balekoselesha fye ababomfi babo ukukanapinda ukulundilwako amalipilo. Profesa wa fishinte fya mibele isuma kabili umukalamba mu fya kusambilila pa lwa kwa Lesa uwa pa Christian Council of Sweden, Kjell Ove Nilsson, atile, “Ubwafya bwa kukonkelela ubunonshi pa kati ka ntungulushi sha fya makwebo bwa kuti imibele yabo ilambukila kabili ilabotelesha imibele isuma iya bantu mu cinkumbawile. E calenga no kuti imibele isuma yonaulwe mu bwikashi na ku muntu umo umo.”

Ifya Kusabankanishishamo Ilyashi

Icikalamba na cimbi icalengele ukubotelela kwa mibele isuma mu myaka ya kulekeleshako iya ba 1900 fya kusabankanishishamo ilyashi. Lieberman uwa mu Ng’anda ya Mafunde atila, “Abalesambilisha ukuulungana nomba ni bakapanga ba maprogramu ya pa TV, bakangala ba mafilimu abalumbuka, bakasabankanya ba mafashoni, bakemba ba nyimbo sha rap isho beta ukuti gangsta, na bantu fye bambi aba ku mulabasa ababa na maka ya kusonga bambi. Aba abalesambilisha iyi mibele bali na maka ya kwalula intambi kabili abana besu e balesongwa sana, kabili te lingi bayumfwa nakalimo tabayumfwa fye na ba mulandu pa lwa mibele yabipa balesabankanya.”

 Ku ca kumwenako, Lieberman alanda pa lwe seleti lya nyimbo ilyashikilwe na bakalisha ba nyimbo sha heavy metal abetwa ukuti Bamulya Bantu. Bakemba balondolola ukwabula ukushako ifyo bapatikisha ukuulungana no mwanakashi uku ninshi balemutiinya ukuti nga akaana balemulasa umwele. Lieberman no munankwe baile ku kampani kapanga amaseleti ukupaapaata ukuti kepanga lilye seleti. Lelo ukulingana ne fyo alondolola, cali kwati baleuma fye umwela.

Ilelo abafyashi abayangwako ku mikulile ya bana babo bali mu bwafya pantu balecimfyanya na bakasambilisha ba mibele yabipa aba pa milabasa. Lelo ni shani kuli shilya indupwa umo abafyashi bashayangwako? Lieberman asosa ukuti, “Nga cabe fyo ninshi calaala capwa, pantu ninshi nomba umwana akulasambilishiwa fye ukufuma pa TV, mu mafilimu, na mu nyimbo, ica kuti amano yakwe aya kwishiba icalungama ne calubana yakalola fye umo mwine.” Kabili pali ndakai, Intaneti kuti yasanshiwapo pali uyu mutande.

Ukubwelulukila ku “Nshita Ilyo Abantu Bashaishibe Ububi no Busuma”

Ni mu nshila nsh iyi mibele yabipa ilemonekela mu bacaice? Ku ca kumwenako, abana abengi na bapungwe balicita ulukaakala lwabipisha mu myaka ya nomba line ku bana banabo na ku bakalamba bene.

Ku Sweden mu 1998 kwacitike umulandu we tensha calo. Bakalume babili umo uwa myaka 5 no mubiye uwa myaka 7 bakamine umunabo pa mukoshi uwa myaka 4 ukufikila afwa! Icipusho abengi baleipusha ca kuti: Bushe abana abanono tabakwata kampingu wa kubalesha ukucita cimo nga ciletwala ku bubi? Uwasambilila imitontonkanishishe ya bana alandilepo ukuti: “Ukuibwelamo ukucita icabipa ni cimo icifwile ukusambililwa. Ne cilenga sana . . . cintu bamona kuli balya bafwaya ukupashanya ne fyo basambilila ku bakalamba abo bekala na bo.”

Imibele yapalako kuti na kabili yamonekela muli bumpulamafunde bwa lukaakala. Ukulingana na Sten Levander, profesa mu fya malwele ya kufulungana uwa ku Sweden, atile amapesenti 15 na 20 aya bafungwa bonse balifulungana—bantu abashangwa uuli onse, abashakwata cililishi, kabili abashingacita nelyo abashingaitemenwa ukumfwikisha imfundo ya calungama ne calubana. Nangu ni pa bana abanono ne misepela abamoneka ukuba fye bwino, abantu bambi balimonamo ukubulisha kwa mibele isuma. Profesa mu fya mano ya buntunse Christina Hoff Sommers asosa ukuti, “Natubwelulukila ku mibele yaliko ilyo abantu bashaishibe ububi no busuma.” Asosele ukuti lintu abasambi bakwe abacaice baipushiwa ulwa calungama ne calubana, abengi tabeshiba ifya kwasuka ico cipusho. Kabili batila takwaba icalungama ne calubana. Basumina ukuti cila muntu afwile ukuisalila umwine icawamisha.

Pali ndakai, abasambi bakwe abengi balikaana icishinka ca kuti ubumi bwa muntu bwalicindama kabili bwaliibela. Ku ca kumwenako, ilyo baipushiwe ico bali no kusalapo ukupususha pa nama bateeka nelyo umuntu munabo uo bashaishiba, abengi batile kuti basalapo ukupususha inama.

Profesa Sommers asosa ukuti, “Te kutila ubwafya bwaba mu kuti abacaice batuutu, abashingacetekelwa, abankalwe, nelyo ukuti tababa na bucishinka iyo, lelo ni pa mulandu wa kuti tabaishiba fye icalungama ne calubana.” Atwalilila ukusosa ukuti abacaice abengi ilelo balatwishika nampo nga kwalibako icalungama ne calubana, kabili atila iyi yine mibele e ilengele ubwafya bukalamba mu bwikashi.

Ukonaulwa kwa mibele isuma mu nshita yesu cintu cilemonwa na menso. Abengi baleti kuti kwaba ifya kufumamo fyabipa. Icipande ca muli Die Zeit ico tulandilepo na pa kubala cisosa ukuti amakwebo ya kucimfyanya aya ndakai mu kupita kwa nshita kuti “yabotelela kabili nalimo bushiku bumo ukuwililila fye nge fyacitikile imibombele ya cisosholisiti nomba line.”

Cinshi cintu ifi fyonse fipilibula icine cine? Kabili musango nshi uwa nshita ya ku ntanshi tulingile ukwenekela?

[Ifikope pe bula 6, 7]

“Abalesambilisha ukuulungana nomba ni bakapanga ba maprogramu ya pa TV, bakangala ba mafilimu abalumbuka, bakasabankanya ba mafashoni, bakemba ba nyimbo sha ‘rap’ isho beta ukuti ‘gangsta’ . . . ”