Ifyo Mwingaleka Ukupeepa

UKULEKA ukupeepa fwaka kwapalana no kusambilila ukucofe incinga. Te kuti muleke mu bushiku bumo. E co nga mulefwaisha ukuleka, mufwile ukuiteyanya ukulaeshaesha ukuleka ukupeepa ukufikila mwalekelela. Mwitila ifi mwabwekeshapo ukupeepa ninshi calaala capwa tamwakaleke. Ishibeni fye ukuti muli pa kusambilila, kabili ukuti ukubwelulukila ku kupeepa kuti kwalenga mwasuka mwatunguluka mu kuleka ukupeepa. Pano palipo imitubululo iyabomba kuli bambi. Nalimo kuti yabomba bwino na kuli imwe bene.

Ipekanyeni mu Mutima Ukuleka Ukupeepa

■ Ica kubalilapo fye, mufwile ukuishinina ukuti ukuleka ukupeepa kusuma. Tantikeni imilandu mulefwaila ukulekela ukupeepa, ukusanshako no busuma bwa kulekela. Ilyo mwaleka ukupeepa, mulingile ukulapituluka mu milandu mwatantike pa kuti mukoshe ukupingulapo kwenu. Icikalamba icifwile ukumulenga ukupingulapo ukuleka ukupeepa kufwaya ukutemuna Lesa. Baibolo itila tufwile ukutemwa Lesa na mano yesu yonse, umutima wesu onse, umweo wesu onse, na maka yesu yonse. Kuti twafilwa ukucite ci nga ca kuti twalikunkuma kuli fwaka.—Marko 12:30.

■ Ceeceeteni icibelesho cenu ica kupeepa pa kuti mwishibe inshita mupeepa ne cilenga ukuti mupeepe. Nalimo kuti camwafwa nga ca kuti mulelemba inshita mupeepa no ko mupeepela cila bushiku. Ici kuti camwafwa ukumwena libela imibele ingamulenga ukwesha ukupeepa ilyo mwaleka.

Saleni Ubushiku bwa Kulekelapo

■ Saleni ubushiku bwa kulekelapo ukupeepa, kabili bucongeni pali kalenda wenu. Caliwamishapo ukusala ubushiku ubo mwishibe ukuti tamwakapopomenwe pa nshita ntali. Ilyo ubo bushiku bwafika, apo pene fye lekeleleni ukupeepa umupwilapo.

■ Ilyo ubushiku bwa kuleka ukupeepa bushilafika, pooseni utubale mubikapo imito ya fwaka, bamacisa, no twa kusontekelako fwaka tumbi. Capeni ifya kufwala fyonse ifinunka icushi ca fwaka.

■ Lekeni ababomfi banenu, ifibusa, no lupwa balemukoseleshako pa kubombesha kwenu ukwa kuleka ukupeepa. Mwilatiina ukweba bambi ukukanapeepa ilyo mulipo.

■ Tantikileni limo ifyo mukalacita pa bushiku bwa kuleka ukupeepa. Nalimo kuti mwaya kumo uko bashisuminisha ukupeepa fwaka, pamo nga ku ciyanda ca babenye nelyo ku ciyanda ca mangalo. Kuti na kabili mwatukushako umubili pamo nga ukoowa nelyo ukucofe ncinga nelyo ukwenda fye intamfu yalepa.

 Ukubomba na Mafya ya Kuleka Ukupeepa

Nga ca kuti mulapeepa sana fwaka, nangu cafye shani kukaba amafya yesako pa kuleka ukupeepa, ayatendeka mu maawala ya kulekeleshako ukupeepa fwaka. Aya kuti yasanshamo ukufulwa bwangu, ukukanatekanya, ukukaluka, ukusakamikwa, ukupopomenwa, ukufufiwa utulo, ukupekapeka, ukuliisha, ne cilaka ca fwaka. Nakalimo dokota wenu kuti amulembela umuti uwingafwa ukucefyanyako aya mafya. Ukulundapo, kuliko ifintu fimo ifyo mwingacita ifingamwafwilishako ukucimfya ici cibelesho.

■ Mu milungu yaafya iya kubalilapo, tamufwile ukulalya sana ifya kulya fipeelesha amaka, kabili mufwile ukulanwa sana amenshi. Bamo batila cilafwa sana ukulalya umusalu uubishi, pamo nga kalota uwalekanalekana. Nga muletukusha umubili, cikamwafwa ukukanaina sana kabili cikafwako ukucefyanyako ukututuma mu mishipa.

■ Sengaukeni ififulo ne mibele ifingamulenga ukufwaya ukupeepa.

■ Kanyeni ukupelulula kwalubana ukwingamulenga ukufwaya ukupeepa. Ifi e fintu bamo balanda ilintu balefwaya ukuleka ukupeepa: ‘Kalelo fye nalapeepako pa kuti mpwisheko fye icilaka ca pali lelo.’ ‘Ukupeepa fwaka e kabi fye ncita.’ ‘Fwaka tayabipa sana; bamo abapeepa sana fwaka balekala imyaka ukucila na pali 90.’ ‘Nangula nshilepeepa fwaka nalyo line nkafwa.’ ‘Nshiipakisha ukwabula ukupeepa.’

■ Nga ca kuti icilaka ca fwaka caisa sana, shipikisheni fye. Ukulolelako fye baminiti 10, kuti kwalenga icilaka ukupwa. Limo limo itontonkanyo lya kukanapeepapo na kabili kuti lyamoneka nga ilishingacitika. Nga e fyo muleyumfwa, pampamikeni fye ukuti lelo lyena tamwapeepepo.

■ Nga mulefwaya ukubombela Lesa, pepeleni ukwafwa. Kabumba wesu uwa tutemwa kuti apeela “ukwafwa ukwa pa nshita yalinga” ku balefwaisha ukulaikala ukulingana no kufwaya kwakwe. (AbaHebere 4:16, NW) Lelo tamulingile ukwenekela icisungusho. Mufwile ukucita ukulingana ne fyo mulepepelapo.

Twalilileni Ukukanapeepa

■ Imyeshi ya kubalilapo itatu e yacilishapo ukwafya, lelo nangu ni lintu iyo myeshi ibe naipita, mulingile ukusengauka ukuba pamo na bapeepa nelyo ukuba mu mibele ingalenga ukuti mufwaye ukupeepa.

■ Mwiibepa ukuti kuti mulepeepako patali patali, nangu ni lintu napapita umwaka umo nelyo ukucilapo ukutula apo mwalekele ukupeepa.

■ Kanyeni itunko lya kufwaya ukupeepako “fye umushanga umo.” Ukupeepako fye umushanga umo kuti kwalenga ukupeepa iyafulilako, kabili mu nshita fye iinono ukubombesha kwenu konse ukwa kuleka ukupeepa kuti kwaya fye mu menshi. Nangu cibe fyo, nga mwafilwa ukushipa kabili mwapeepapo umushanga umo, tamulingile ukupeepelapo na umbi. Nga mwabwelulukila ku kupeepa, tendekeni na kabili ubulwi bwa kuleka ukupeepa.

Abengi balisuka baleka ukupeepa. Na imwe bene kuti mwaleka nga mwapampamina fye pa kuleka no kuba aba mukoosha mu kukanapeepa.