Bushe Icalo Conse Cikekatana?

MU MYAKA ya nomba line abantu abengi ku Bulaya bwa ku Kabanga na mu fyalo fimbi baliculilamo pa mulandu wa nkondo ishaletako amalekano. Lelo na lintu kwali uku kukansana kwa bukatu, abantu abengi muli ifi fyalo fyalimo inkondo bali abaikatana icine cine kabili balisungilile uku kwikatana pa kati kabo. Belengeni ifya kumwenako finono.

Mu 1991 ibumba ilyafumine ku fyalo fimbi nalimo 15,000 lyalilongene mu Zagreb, ku Croatia. Calengele kapokola uwasangilweko ukulanda ukuti: “Kuti cawama ukulangisha ababombela ku fya kusabankanishishamo amalyashi ifilecitika kuno ku cibansa uko tulemona abena Serbia, abena Croatia, abena Slovenia, abena Montenegro, na bambi nabekela capamo mu mutende.” Cinshi cilenga ukuti bekatane sana ifi?

Mu 1993 ibungano lya pa kati ka nko ilyacililenapo ubukulu, ilyakwete umutwe waleti “Ukusambilisha kwa Bulesa,” lyabelele mu musumba ukalamba uwa Kiev, ku Ukraine. Impendwa ya basangilweko yaile pa muulu nalimo 65,000. Pe bula lya pa ntanshi, inyunshipepala ya Evening Kiev yatile: “Inte sha kwa Yehova . . . tashaikatana fye ku mabaji ya bulu na mashiwi yalembwapo  ukuti ‘Ukusambilisha kwa Bulesa,’ lelo shaalikatana mu citetekelo cine cine.”

Ukusambilisha kwa Bulesa Kulekatanya

Bushe mulapapa icalenga Inte sha kwa Yehova ukwikatana ilintu abantu bambi bapalamana na bo tabaikatana? Profesa umwina Poland, Wojciech Modzelewski alishiba icalenga pa kulanda pa Nte sha kwa Yehova ukuti: “Icikalamba icalenga babe no mutende kukonka ifishinte fya mafunde ifisangwa mu Baibolo.” Inte sha kwa Yehova shalikatana nga nshi mu calo conse ukupitila mu kusambilisha kwa bulesa ukwa kwa Kalenga, Yehova Lesa. Kusambilisha nshi uko?

Yesu Kristu alandile icishinte ca mafunde icibekatanya lintu alandile pa lwa bakonshi bakwe ukuti: “Tabali ba pano isonde, ifyo na ine nshili wa pano isonde.” Ukukanaibimbamo mu milandu ya calo e kwalenga ukuti Inte sha kwa Yehova shikatane mwi sonde lyonse. Ici cilomfwana na mashiwi ya kwa Yesu lintu apepele ati: ‘Ndelomba . . . ukuti bonse babe bamo; ifyo imwe, mwe Tata, mwaba muli ine na ine muli imwe, e fyo na abo babe muli ifwe.’—Yohane 17:16-21.

Uku kukanaibimbamo mu milandu ya calo kulabekatanya pantu kulenga Inte konse mu calo ukumfwila cintu kasesema Esaya alandile pa lwa bantu bonse abo Lesa ‘akalange mibele yakwe.’ Esaya atile aba musango yo bali no ‘kufula impanga shabo shibe ifya kuliminako umushili, na mafumo yabo yabe ifya kutungwilako imiti.’ Uyu kasesema akonkenyepo ukusoso kuti: “Lukasuke uluko alubulo kusumbwilo lupanga ku luko, nangu kusambilila kabili ubulwi.”—Esaya 2:2-4.

Ukwikatana no mutende uwali pa mabungano ya Nte sha kwa Yehova ku Bulaya bwa ku Kabanga imyaka 10 iyapitapo filangilila ukuti kale kale ukusesema kwa kwa Esaya kulefikilishiwa panono. Ku Bulaya na mu fyalo fimbi Inte shalifula mu mampalanya impanga shabo ukuba ifya kuliminako umushili, na mafumo yabo ukuba ifya kutungwilako imiti. E calenga  ukuti bekatane no kuba no mutende muli cino calo cishaikatana. Te kuti tupape umulandu inyunshipepala imo yasosele inshita imo ukuti: “Abantu bonse abalaikala ukulingana ne cisumino [ca mu Baibolo] ica fya mipepele ya Nte [sha kwa Yehova], ukusuumya umulopa no kupatana kuti fyapwa, kabili ukutemwa kuti kwateka nge mfumu”! Bushe ico cikabala acicitika?

Ifyo Ukwikatana kwa Calo Conse Kukabako

Pa kuti icalo conse cikatane, ifingi filakabilwa ukucila fye pa kalibumba aka bantu abafwaya ukwikatana. Kufwile kwabako no buteko ubwakwata amaka ya kucincintila ukusongelekanya kwa bantu abapumfyanya ukwikatana no mutende. Na kuba, Yesu asambilishe abakonshi bakwe ukupepela ubuteko bwa musango yo ukuti: “Ubufumu bwenu bwise. Ukufwaya kwenu kucitwe pano nse nga mu muulu.” (Mateo 6:10) Cine cine, Yesu alangilile ukuti buteko fye bwa kwa Lesa, “ubufumu bwa mu muulu,” e bwingapwisha amafya ya cino calo, kumo no bwafya bwa kukanaikatana.—Mateo 4:17.

Yesu Kristu e Mfumu ya ubu Bufumu bwa mu muulu. Ilyo akulateka, abantu bakaba no mutende no kwikatana ifishabala afibako. Te kweshaesha kwa bantunse ukuwamya ifya bunonshi ukukalenga ukuti icalo conse cikekatane. Buteko fye bwa calo conse ubukalatekwa na “Cilolo wa mutende” e bwingacita ica musango yo.—Esaya 9:6, 7.

Cilolo wa Mutende takasuminishe ulufyengo lwa ndakai, ulo ilingi line lufuma mu bupiina no kubomfya amaka ya kuteka bubi bubi. Baibolo yalaya ukuti: “Lekeni shitoote kuli yene ishamfumu shonse; inko shonse shiibombele. Pantu ipokololo mubusu uwakuuta, no mulanda, no ushikwete wa kumwafwa; ilubule myeo yabo mu kunyanyantilwa na mu kufyengwa . . . Mube ukupaka kwa ngano mu calo, na pa muulu wa mpili.”—Amalumbo 72:11, 12, 14, 16.

Mu kuteka kwa kwa Kristu tamwakabe no bulofwa. Kasesema Esaya atila: “Tabakakuule na bambi abekalamo, tabakalime na bambi abalyako; pantu inshiku sha bantu bandi shikaba nge nshiku sha muti, ne milimo ya minwe yabo abasalwa bandi bakasekelamo pa myaka iingi.” (Esaya 65:22) Taleni tontonkanyeni, umuntu onse akalabomba incito iisuma kabili intu akasekelamo!

Ni Lilali Ukwikatana Kukabako?

Lelo ni lilali Kristu akatendeka ukuteka icalo conse? Pa kwasuka ico cipusho, Yesu Kristu alandile pa lwa nshita kwali no kuba inkondo, impupilisho sha bulwi, amalwele, ifinkukuma ne fintu fimbi. Lelo alilandile na pa cintu icisuma icali no kubako, e kuti, ukushimikila imbila nsuma ya Bufumu bwa kwa Lesa mu calo conse. (Mateo 24:3-14; Luka 21:11) Yesu atile ifi fyonse fikasuka fikafike na ku “bucushi bukalamba” ubukaalula apakalamba imitekele ya pano isonde. (Mateo 24:21) Belengeni ili lyashi ilyalembwa muli Mateo icipandwa 24 na Luka icipandwa 21. Linganyeni fintu asobele na fintu mulemona mu calo ilelo. Kuti mwaimwena fye mwe bene ukuti nomba tuleikala mu nshita intu Lesa ali mupepi fye no kufumyapo ubuteko bwa bantunse. Ubufumu bwakwe ubwakwata Yesu Kristu nge Mfumu, e bukalateka. Icalo conse icaikatana nacipalama!

Lelo kuciliko icipusho, Cinshi mulingile ukucita pa kuti mukamoneko uko ubu bulayo bukafikilishiwa? Apo Baibolo yalicindama mu masubilo ya bantunse aya ku ntanshi, cilimo amano ukuti mutukute ukwishiba Baibolo bwino bwino. E co Inte sha kwa Yehova kuti shatemwa ukumutandalila no kutendeka ukusambilila Baibolo na imwe. * Nga ca kuti mwasumina ukusambilila, mukaimwena mwe bene ukuti ukwikatana kwa calo conse nakupalama kabili na imwe kuti mwaba pa bantu abakekatana!

[Futunoti]

 [Ifikope pe bula 16, 17]

Inte sha kwa Yehova shalikatana sana mu calo conse

Kiev, Ukraine

Ku Zagreb, mu Croatia

[Icikope pe bula 18]

Ukufwaya kwa kwa Lesa kwa kuti abantunse bakekatane ngo lupwa lumo ulwa mu calo conse