Ukulingana na Baibolo

Ifya Kucimfya Ukupelelwa

ABANTUNSE bonse balapelelwa ku cipimo cimo. Lelo, kuli bamo, ukupelelwa kulacilamo ica kuti batemwapo ukufwa ukucila ukuba no mweo.

Baibolo ilangilila ukuti na babomfi ba busumino aba kwa Lesa balakwata amafya ayo yabalenga ukupelelwa. Ku ca kumwenako, natumone ifyo cali kuli Eliya na Yobo—bonse abali fibusa fyapalamisha ifya kwa Lesa. Pa numa ya kubutuka Yesebele Namfumu wabipa uwalefwaya ukumwipaya, Eliya ‘ailombele [kuli Yehova] ukufwa.’ (1 Ishamfumu 19:1-4) Umulungami Yobo apitile mu tuyofi twakonkene, ukusanshako no bulwele bwabipisha ne mfwa ya bana bakwe 10. (Yobo 1:13-19; 2:7, 8) Ukupelelwa kwamulengele ukusosa ukuti: “Kuti natemwapo ukufwa ukucila ukucula.” (Yobo 7:15, The New English Bible) Nga fintu caumfwika, aba baume ba busumino aba kwa Lesa bali abasakamikwa nga nshi.

Bamo ilelo balaba abapelelwa pa mulandu wa mafya yaba mu bukote, imfwa ya mwina mwabo, nelyo amafya pa mulandu wa kubulwa indalama. Bambi basanga ukuti amasakamika ya mutatakuya, amalangulushi ya kupita mu cintu cabipa, nelyo amafya ya mu lupwa yabalenga ukumfwa kwati baleelela pa kati ka bemba, ica kuti ibimbi limo na limo lilelenga cakoselako ukufika ku lulamba. Umwaume umo atile: “Kulaba ukuumfwa kwati tawacindama—kwati tapali uwakulakufuluka nga wafwa. Inshita shimo ukutalalilwa kulacilamo.”

Inshita shimo, ifintu filesamukuwama, na muli fyo ukucefyako uko kushikitika. Lelo ni shani nga ca kuti imibele tulimo tayakaluke? Baibolo kuti yatwafwa shani ukucimfya ukupelelwa?

 Baibolo Kuti Yatwafwa

Yehova ali na maka ya kusungilila Eliya na Yobo mu mafya yabo. (1 Ishamfumu 19:10-12; Yobo 42:1-6) Mwandi ukwishibe co kuli ukwa kusansamusha nga nshi ilelo! Baibolo isosa ukuti: “Lesa aba kuli ifwe icubo kabili ubukose, mu fya kumanama asangwa ukwafwa apakalamba.” (Amalumbo 46:1; 55:22) Nangu cingati kuti camoneka kwati ukuyumfwa uwapelelwa kwakulisha, Yehova alaya ukuti akatufumbatila ku kwa kulyo kwakwe ukwa bulungami. (Esaya 41:10) Bushe kuti twapokelela shani ubu bwafwilisho?

Baibolo ilondolola ukuti ukupitila mwi pepo “umutende wa kwa Lesa uwapulamo mu kwiluka konse, wakulalinde mitima [yesu] na mapange [yesu] muli Kristu Yesu.” (Abena Filipi 4:6, 7) Pa mulandu wa kumanama kwesu, kuti pambi twamona kwati takuli inshila ya kufuminamo muli ubu bwafya. Nga ca kuti ‘ku kupepa twaba aba mukoosha,’ Yehova kuti alinda imitima yesu ne mintontonkanya, ukutupeela amaka tukabila pa kushipikisha.—Abena Roma 12:12; Esaya 40:28-31; 2 Abena Korinti 1:3, 4; Abena Filipi 4:13.

Cikatuwamina nga ca kuti tulepepa mu kulungatika. Nangu cingati kuti cayafya ukulumbulula ifyo tuletontonkanya, tufwile ukuba abantungwa ukusosa kuli Yehova pa lwa fyo tuleumfwa ne fyo tulemona ukuti e filetele ubu bwafya. Tulingile ukumupaapaata ukuti atupeele amaka ya kutusungilila ubushiku no bushiku. Twalaiwa ukuti: “Ukufwaya kwa bamutiina, wene [Yehova] alakucita, ne nkuuta yabo ayumfwa, no kubapususha.”—Amalumbo 145:19.

Ukulunda pa kupepa, tufwile ukucincintila ukuitalusha ku bantu. (Amapinda 18:1) Bambi balisanga inkosho ukupitila mu kwafwa bambi. (Amapinda 19:17; Luka 6:38) Natumone ifyo cali ku mwanakashi uwitwa Maria, * uyo walwele kansa no kufwilwa aba mu lupwa 8 mu mwaka fye umo. Aleipatikisha ukufuma mu busanshi pa kuti aye abombe umulimo wa lyonse. Mupepi na cila bushiku aleya mu kusambilisha bambi Baibolo, kabili alesangwa ku kulongana kwa Bwina Kristu lyonse. Nga abwelela ku ng’anda, ukumanama kwa kwa Maria kwalebwela kabili ninshi nakuluma. Lelo ukupitila mu kutonta pa fyo engaafwa bambi, Maria alashipikisha.

Lelo ni shani nga ca kuti ciletukosela ukupepa, nelyo nga tulefilwa ukuleka ukuitalusha ku bantu? Nga ni fyo tufwile ukufwaya ubwafwilisho. Baibolo itukoselesha ukuya ku “bakalamba ba lukuta.” (Yakobo 5:13-16) Umwaume uulebombela pa kucimfya ukupopomenwa kwa mutatakuya atile: “Inshita shimo ukulanshanya no muntu mwacetekela kulafwa ukutalalika umuntontonkanya no mutima, ica kuti kuti mwatendeka ukutontonkanya sana pa filimo amano.” (Amapinda 17:17) Kwena, nga ca kuti ukupelelwa kwa mutatakuya kabili ukwacilamo kulelangilila ukuti umo nalwala, ubwafwilisho bwa ncenshi kuti bwakabilwa. *—Mateo 9:12.

Nangu cingati takwaba inshila shayanguka isha kupwishishamo ubu bwafya, tatulingile ukucefya amaka ya kwa Lesa aya kutwafwa ukucimfya amafya yesu. (2 Abena Korinti 4:8) Ukuba no mukoosha ku kupepa, ukusengauka ukuitalusha ku bantu, no kulomba ubwafwilisho ku bafikapo fikatwafwa ukuba abashikatala na kabili. Baibolo ilaya ukuti Lesa akafumyapo ifilenga ukuti tuleba abapelelwa sana. Abena Kristu bapampamina pa kushintilila pali wene ilyo balelolela ubushiku lintu “ifya ntanshi tafyakebukishiwe.”—Esaya 65:17; Ukusokolola 21:4.

[Amafutunoti]