“Walafwa!”

NGA FINTU CASHIMIKWA NA BA LEANNE KARLINSKY

Ukufwaya ukundapwa ukusuma ukwabula ukubomfya umulopa mu Spain

NGA mwali no kwima ubulendo muli ci calo ukuya ukuli konse, bushe ni kwi mwingasoobolapo ukulola? Kuli ine ukwasuka ici cipusho takwakosele. Nsambilisha icina Spain pa sukulu, kabili capamo na balume bandi baJay, e lyo no mwana wandi umwaume Joel, nsangwa ku cilonganino ca Nte sha kwa Yehova icibomfya ululimi lwa cina Spain ica mu Galax, Virginia mu U.S.A. Kanshi ico nalefwaisha maka maka kuya ku Spain. E co kuti mwaelenganya fintu nacincimwike lintu abafyashi bandi bansendele ukuya na bo ku Spain! Nangu ca kuti abalume bandi no mwana wandi umwaume tabali na kukonka, ico nalefwaisha cali apepi no kufikilishiwa lintu abafyashi bandi na ine twaninine mu ndeke ukuya ku Madrid. Lintu twafikile pa April 21, twapingwilepo ukwensha motoka ukuya kwi tauni linono ilya Estella mu Navarre, ilyabela ku kapinda ka kuso aka Spain. Naileikala mu bwanalale ku cipuna ca ku numa mu motoka kabili ilyo line natendeke ukushipula.

Ico njibukisha mu kukonkapo ca kuti naisangile ninambalala mwi bala, na kasuba kalensanika pa menso. Ni kwi nali? Nafikileko shani? Bushe ndeloota? Ilyo naleipusha ifi fipusho, cintu naishilekutuluka calintiinishe. Pafwile pali icalubene, kabili ici tacali iciloto fye. Ukuboko kwa kuso ukwe laya lyandi kwalilepwike, kabili nalefilwa ukusesha amaboko na molu. Pa numa, naishileishibo ukuti motoka twalimo yapunkile mu lucingi lwa kucinga umusebo ku mukonko kabili motoka yamfwintile ku nse ilyo yalepilibukila mu mukonko wa mamita 20. Ico tutashako ca kuti, ine pamo na bafyashi bandi tatwibukisha icili conse pa fyo busanso bwacitike.

Nalipundile mutuule, kabili namutekenya wa cimbayambaya umo ifi mu kwangufyanya aishile apo nali. Mu kukonkapo akunkulwike ukuya apali motoka, pa bafyashi bandi abo motoka yaisalile mu kati. Namutekenya apundile ku munankwe ati: “Mwebe aba ambyulansi ukuti bangufyanye! Abali mu motoka nabacenwa icabipisha!” Lyena namutekenya abwelele pantu nalambalele ukwabulo kusunkana, kabili mu kufwaya ukwafwilisha, aeseshe ukolola ukulu kwandi. Nalikuutile ku bukali, e lintu naishibe ifyo nacenenwe ububi.

Bwangu bwangu bantwele mu muputule wa kundapilamo ifya mu kampampa mu cipatala ca uko kwine ica mu Logroño. Bakapokola mu cikuuku baishibishe Inte sha kwa Yehova ku cifulo nali kabili babebele na pa cacitike. Ilyo tapalalepa, abengi ukufuma ku cilonganino ca Estella na Logroño ukusanshako na ba muli Komiti wa Kumfwaninamo ne Fipatala baishilempempula mu cipatala. Na kuba, mu kucula kwandi konse mu cipatala ca Logroño, abantu nshabalilemonapo, Abena Kristu batemwikwa bali abaipekanya kabili abaitemenwa ukunsakamana inshita yonse. Kabili mu kutemwa basakamene na bafyashi bandi, abaumfwileko bwino  panono ica kuti balibafumishe mu cipatala mupepi no mulungu umo pa numa ya ubu busanso.

Pali Citatu ne nshita ya 01:00 hrs, badokota baishile mu kundepula pa lutungu lwandi ulwaonaike. Nabebele ukuti nshilefwaya ukubikwamo umulopa. * Badokota balishimunwike pa kusumina, nangu ca kuti batile nalimo kuti nafwa. Nalipuswike uyu opareshoni, lelo calimpapwishe ukumona ukuti ifilonda nakwete tafyawamishiwe, kabili nangu ni nsalu isho bakakile pa filonda tabashicinjishe.

Ilyo calefika pali Cisano umulopa nakwete walicepele ukufika kuli 4.7, kabili amaka yaleya yalepwa. Badokota balisumine ukufwaya inshila ya kung’undapilamo imbi—ukundasa inshindano sha erythropoietin (EPO), inshindano nalashilwe ukusanshako ne fikosha amafupa pamo ne fipanga umulopa fintu bampeele, filengilishako ukupangwa kwa nsandesande sha mulopa. * Abalume bandi baJay na Joel pali iyi nshita ninshi nabafika. Fintu caweme ukumona abalume bandi no mwana wandi!

Ilyo cali mupepi na 01:30 hrs, badokota baebele abalume bandi ukuti icipatala calipokele ulusa ku cilye kabili balibasuminisha ukumbikamo umulopa nga ca kuti nalwalisha. Abalume bandi banjebeleko badokota ukuti, ico nalefwaya kukanabikwamo umulopa nangu cibe shani. Badokota bayaswike ukuti: “Nga ni fyo umukashi obe ali no kufwa!”

Abalume bandi balandile na baKomiti wa Kumfwaninamo ne Fipatala pa lwa kunkuushisha ku cipatala cimbi—icipatala uko bashingasuusha ukufwaya kwandi. Te bonse muli ici cipatala abalelwisha ukufwaya kwandi. Ku ca kumwenako, dokota umwanakashi umo andaile ukuti bakabombesha ukufika pantu bengapesha ukung’undapa ukulingana no kufwaya kwandi. Lelo pa numa badokota bambi batendeke ukulantitikisha. Baipwishe ati: “Bushe ulefwaya ukufwa no kusha ulupwa lobe?” Nabebekeshe ukuti nalefwaya kundapa kusuma ukulipo ukwabulo ukubomfya umulopa. Badokota tabayumfwile nga bengafwilisha. Dokota umo ifi mu kulungatika atile: “Walafwa!”

BaKomiti wa Kumfwaninamo ne Fipatala bamfwaile icipatala ku Barcelona icasumine ukung’undapa ukwabulo mulopa. Fintu pali ubupusano pa kati ka ifi fipatala fibili! Banasi babili aba ku Barcelona balensamba mu kunakilila no kunengo kuyumfwa uwapembesulwa. Ilintu balencinja insalu sha pa filonda, nasi umo amwene ukuti insalu shamoneke ishakatapakatapa kabili kwaliko no mulopa uwauma. Uyu nasi atile aliketwe nsoni pa kuti abekala calo banankwe e bancitile fi.

Mu kwangufyanya batendeke ukung’undapa nalingile ukundapwa ku cipatala ica mu Logroño. Ifyafuminemo fyalisungwishe. Mu nshiku shinono ubumi bwandi tabwali mu busanso, kabili hemoglobin (ifyo umulopa umoneka) wandi alifulile ukufika ku cipimo ca 7.3. Pa nshita bamfumishe mu cipatala, hemoglobin aninine ukufika kuli 10.7. Ilyo nalekabila opareshoni yalundwako mu cipatala mu United States, hemoglobin afikile kuli 11.9.

Ndatasha pa kubombesha kwa badokota na banasi abaitemenwa ukubombela pa kufwaya kwa balwele, ukwabulo kusakamana nampo nga balesuminishanya no ko kufwaya kwa balwele nelyo iyo. Lintu ababomba mu cipatala babomba ukulingana ne fisumino fya balwele, ninshi baleundapa umuntu onse te bulwele fye—kabili ninshi balepayanya ukundapa kwawamisha ukwingasangwa.

[Amafutunoti]

[Icikope pe bula 26]

Pamo na balume bandi no mwana wandi

[Icikope pe bula 27]

Babili aba muli Komiti wa Kumfwaninamo ne Fipatala