Ifye Shiku Pali Intaneti

MPANGA FYE YONSE, ABANTU ABENGI BALABOMFYA INTANETI cila bushiku. Abengi basuntinkanya bakompyuta wabo ku makompyuta ya mwi sonde lyonse pa kuti balecitilapo ubukwebo, ukumfwilapo ifilecitika mwi sonde lyonse, ukwishibilapo imiceele, ukusambilililapo ulwa fyalo fyapusanapusana, ukupokelapo ifyebo pa lwa nyendo, nelyo ukulanshanishishapo na balupwa ne fibusa ababa mu fyalo fimbi. Lelo bamo, cibe balyupana nelyo bashimbe, ukubikako fye ne mpendwa ishaikulila iya bana—bakalabomfya Intaneti KU KUTAMBILAPO IFYE SHIKU.

 UKUTAMBA IFYE SHIKU PALI KOMPYUTA, ukwitwa na kabili ukuti cyberporn, nakuseeka sana ica kuti kusangwike bukwebo bulepanga sana ubukumu mu madola. Magazini wa The Wall Street Journal atile: “Nga mwasanga Web site iipanga sana ulupiya, ilingi line ninshi ni ilya yakwatamo fye ifye shiku.”

Magazini wa Journal atwalilile ukulondolola umulandu abengi balukila ku kutamba ifye shiku pali Intaneti ukuti: “Abatemwa ukutamba ifye shiku kuti baipakisha ukutamba fye fyonse ico bashingacita nga ca kuti bailetambila umo bashitisha amavidio. Awe kuti baleitambila fye fyonse pa lwa bucisenene mu bumfisolo mu ng’anda—nelyo mu ofeshi.”

Abana ne fye Shiku

Ku ca bulanda, abatamba sana ifye shiku bana. Abacaice abo ifunde lishisuminisha ukushitako ifitabo ifyabamo ifyebo fye shiku nelyo ukwashimako amavidio yalanga ifye shiku kuti bafisanga pali kompyuta wa mu mwabo ukubomfya fye aka kutinikilako pa kuti kompyuta esule umwaba ifikope fya musango yo. Ifikope fyabamo cani ca ku mutenge.

Ilingi line abana abengi balesula Intaneti pa makompyuta ukwabula abafyashi babo ukwishiba. Na kuba, inyunshipepala ya The Detroit News ilondolola ukuti “abana abengi balilembesha ukuti balebomfyako Intaneti nangu ca kuti abafyashi mupepi na mapesenti 85 balibinda abana babo ukucita ica musango yo.”

Nangu ca kuti abana abengi nelyo fye bakalamba bene, tabafwaya ukwishibikwa ukuti balatamba ifye shiku, bamo bena tabakwata ne nsoni. Bamo bamona ici cibelesho ngo musango wa kukokoloka uwaba fye bwino. Bambi batila abana tabafwile ukutamba ifye shiku lelo basosa ukuti ificita abakalamba mu bumfisolo fyabo abene.

Mu fyalo fimo ukukansana pa lwa kutamba ifye shiku kwasanguka mulandu uukalamba uwa fikansa fya mapolitiki. Abalanda pa lwa maisosele balasuminisha ukutamba ifye shiku, lelo lubali lumbi abalanda pa lwa mibele isuma mu lupwa beba abalashi ukubinda ukutamba ifye shiku.

Magazini wa Loleni! taiibimbamo mu milandu ya mapolitiki. Imifwaile ya ifi fipande fikonkene ya kwishibishako fye bakabelenga besu ububi bwaba mu kutamba ifye shiku, ukutubulula inshila shingabacingilila no kucingilila abatemwikwa babo, no kupayanya imitubululo yashimpwa pali Baibolo ku bali bonse abaikatwa mu citeyo ca kutamba ifye shiku kabili abalefwaya ukuleka.