Ifyo Ulupwa Lwesu Lwaikatene Na Kabili

Nga fintu cashimikwa na Ba Lars na Ba Judith Westergaard

ING’ANDA yabo imoneka nge fimoneka ing’anda yonse umwikala ulupwa lwa nsansa mu Denmark. Ni ng’anda iisuma kabili iyakwata ibala lyayemba, ilyabela mu mushi uwa mutende. Mu ng’anda mwaba icikope icikalamba pa cibumba icilangisha abana ng’anda abalelema kabili abalemwentula.

Ba shibo, ba Lars, ni baeluda mu cilonganino ca Nte sha kwa Yehova. Abakashi babo, ba Judith, ni bapainiya (bakabila ba mbila nsuma aba nshita yonse). Nangu ca kuti icupo cabo ca nsansa, kale te fyo caali. Ba Lars na ba Judith balipitile mu mafya kabili balipusene ica kuti balilekene no kulenga ulupwa lwabo ukupaatukana. Lelo, nomba ulupwa lwabo lwaliikatana na kabili. Mulandu nshi? Abene balalondolola ifyacitike.

Ba Lars na ba Judith bali abaiteyanya ukushimika amafya ayaponene icupo cabo na fintu babweshenye. Batila ifyabacitikile nalimo kuti fyaafwilishako bambi.

Icupo Cabo Catendeke fye Bwino

Ba Lars: Icupo cesu cali fye ica nsansa lintu twaupene mu April 1973. Twamwene kwati tukekala bwino ku ntanshi. Tatwaishibe Baibolo nangu ni Nte sha kwa Yehova, lelo twacetekele ukuti ifwe kuti twalenga isonde ukuba icifulo cisuma ica kwikalamo nga ca kuti abantu bonse balibombeshe ukuti cibe fyo. E co twaitumpile mu matukuto ayengi aya mapolitiki. Insansa shesu shalifulileko lintu twafyele abalumendo batatu abalelema kabili abacincila—Martin, Thomas, na Jonas.

Ba Judith: Nali umukalamba wa ncito mu cipani ca buteko. Pa nshita imo ine, naitumpile mu fya mapolitiki na mu milimo ya kabungwe ka babomfi. Mu kupita kwa nshita napeelwe incito sha pa muulu.

Ba Lars: Lelo ine, nalebomba mu kabungwe kakalamba aka babomfi, kabili nalifikile na pa cifulo ca bukanabesa. Twalelundulukilako fye mu ncito shesu, kabili takwali icali no kutupumfyanya.

Ukupaatukana

Ba Lars: Lelo twalyobelwe sana ne ncito shesu ica kuti tatwalekwata inshita ya kwikala pamo. Twalebomba mu kabungwe ka mapolitiki kamo kene lelo tatwalebomba incito shimo shine. Abalumendo besu batatu balesakamanwa ku bantu bambi twaingishe incito, atemwa mu fifulo balelelamo abana. Apo ifwe babili twalesakamana fye cila muntu ifyakwe, imikalile ya lupwa lwesu yalifulungene. Nga ca kuti bonse babili tuli pa ng’anda, ilingi twaleotokelana. Lyene natendeke ukunwo bwalwa pa kuti ningalabako ku fyalecitika.

Ba Judith: Lelo, tatwalekele ukutemwana kabili twalitemenwe na bana, lelo ukutemwana kwesu takwakosele  nga fintu calekabilwa; kwamoneke kwati kwalibonsele. Twalilekele ukumfwana mu cupo cesu, kabili ico calengele abana ukuculilamo.

Ba Lars: Pa kwesha ukulenga ulupwa lwandi ukwikatana na kabili, napingwilepo ukuleka incito nalebomba. Mu 1985 twafumine mu musumba no kukuukila mu mushi umo twikala nomba. Ifintu fyalyendele bwino pa nshita inono, lelo ine no mukashi wandi twatwalilile cila muntu ukulasakamana ifyakwe. Mu February 1989, icupo cesu ica myaka 16 casukile capwa. Ulupwa lwesu lwalibongolweke.

Ba Judith: Calibipile ukumona ulupwa lwesu ukupaatukana e lyo no kumona ifyo abana besu balecula. Twalipusene sana ica kuti tatwasuminishenye ukuti bonse babili tukalesunga abana, e co nine nashele na bana bonse batatu.

Ba Lars: Ine na Judith twalitukwite nga nshi pa kuti fye twingekatanya ulupwa lwesu ulwalebongoloka. Twalipepele fye na kuli Lesa ukuti atwafwilishe. Lelo tatwaishibe ifingi pa lwa kwa Lesa.

Ba Judith: Amapepo yesu yalengele tumone kwati Lesa taleumfwa amapepo. Tuletasha pantu ukutule lyo twalimona ukuti Lesa alomfwa amapepo.

Ba Lars: Tatwailwike ukuti twalekabila ukuibikilishako e lyo no kwalula imibele yesu. E co twalilekene ica kuti caletele no bulanda sana.

Ifishaleenekelwa Fyacitikila ba Lars

Ba Lars: Ilyo naleikala neka, ifyo nshaenekele e fyancitikile. Bushiku bumo napokelele bamagazini babili ku Nte sha kwa Yehova. Akale nshalefwaya ukukutika ku Nte. Lelo lintu nabelengele abo bamagazini, nasangile ukuti Inte shalisumina muli Lesa na muli Yesu Kristu. Ico calimpapwishe sana. Nshaishibe ukuti bali Bena Kristu.

Pali iyo ine nshita, natendeke ukwikala no mwanakashi nakumenye. Nasangile ukuti aali kale ni Nte ya kwa Yehova. Lintu natendeke ukumwipusha ifipusho, anangile muli Baibolo ukuti Yehova e shina lya kwa Lesa. E co ishina “Inte sha kwa Yehova” lyalola mu kutila “Inte sha kwa Lesa”!

Uyu mwanakashi atantike ukuti nsangweko ku lyashi lya cintubwingi ku Ciyanda ca Kulonganinamo ica Nte sha kwa Yehova. Ifyo namwene kulya fyanengele mfwaye ukusambilila icine. Naile ku Ng’anda ya Bufumu ku kusambilila na fimbi, kabili natendeke ukusambilila Baibolo. Mu kwangufyanya naliilwike ukuti imyendele yandi tayaweme, e co nalilekele ukwikala no mwanakashi cibusa wandi kabili naileikala neka mwi tauni umo nafyalilwe. Pa numa ya kushingashinga nasukile nalanda ne Nte sha kwa Yehova no kutwalilila ukusambilila Baibolo.

Nalyo line, nali ncili ndetwishika. Bushe cine cine Inte sha kwa Yehova bantu ba kwa Lesa? Ni shani pa lwa fyonse nasambilile ku bwaice? Apo nakushiiwe nga Seventh-Day Adventist, naile kuli shimapepo wa ba Seventh-Day. Na o alisumine ukulasambilila na ine lyonse pali Citatu, ilintu Inte sha kwa Yehova shalesambilila na ine lyonse pali Cimo. Nalefwaya ukuti amabumba yonse yabili yanondolwele bwino pa fintu fine pamo nga: ukubwela kwa kwa Kristu, ukubuushiwa, icifundisho ca Balesa Batatu, na fintu icilonganino cilingile ukutungululwa. Cansendele imyeshi fye inono ukuti  ndeke ukutwishika. Pa fintu fyonse fine—ne fintu fyonse fimbi—nasangile ukuti ifisumino fya Nte sha kwa Yehova e fyashimpilwe pali Baibolo. Ico calengele ukuti ntendeke ukuibimba mu milimo yonse iya cilonganino kabili mu kwangufyanya naliipeele kuli Yehova. Mu May 1990, nalibatishiwe.

Bushe Cali Shani Kuli ba Judith?

Ba Judith: Lintu icupo cesu cali na mafya ayengi, natendeke na kabili ukuya ku calici. Lintu naumfwile ukuti ba Lars balefwaya ukuba Inte ya kwa Yehova, nalifulilwe icibi. Kasuli wesu, Jonas, limo limo aletandalila bawishi, lelo nalikenye ba Lars ukulasenda Jonas ku kulongana konse ukwa Nte. Ba Lars batwele umulandu ku filye, lelo nalicimfishe.

Natendeke ukwenda no mwaume umbi. Na kabili naliipoosele sana mu fya mapolitiki na mu milimo yalekanalekana iya mu bwikashi. E co nga ca kuti pali iyo nshita kwali uwaleenekela ukuti ulupwa lwesu lukekatana na kabili, tacali no kucitika.

Pa kuti ningasuusha bwino Inte sha kwa Yehova, naile kuli shimapepo we calici lya mu mushi, uwalandile bwangu ukuti taishibe nangu cimo pa lwa Nte kabili takwete impapulo ishilanda pa lwa shene. Lelo anjebele fye ukuti mfwile ukushitaluka. Nalyo line, ico tacanengele ukuti ndeke ukutwishika Inte sha kwa Yehova. Lelo nasukile nakumana na sho mu musango uo nshaleenekela.

Ndume yandi uwikala ku Sweden alisangwike Inte ya kwa Yehova, kabili andalike ku bwinga bwakwe pa Ng’anda ya Bufumu! Ubo bwinga bwalyalwile sana ifyo nalemona Inte. Nalipapile ilyo nailwike ukutila tabali bantu abaifinya nga fintu lyonse naletontonkanya. Bali aba cikuuku kabili aba nsansa, kabili bali aba nseko.

Pali iyi nshita, ba Lars, abalume bandi aba kale, ninshi balyaluka sana. Bali nomba abacetekelwa, abaleikalako pamo na bana, bali ne cikuuku kabili baleilama mu milandile yabo, kabili balilekele ukunwensha ubwalwa nga fintu balenwa kale. Imibele yabo yaliweme icine cine! Bali nomba umwaume untu nalefwaya ukuti babe. Calinkalipe ilyo natontonkenye ukuti tabali balume bandi no kuti napamo bushiku bumo bakopa umwanakashi umbi!

E co kanshi napangile “umungalato” umo. Bushiku bumo lintu Jonas aleikala na bawishi, natantike ukuya pamo ne nkashi nandi shibili mu kumona Jonas na ba Lars, ukubepekesha ukuti inkashi nandi shalefwaya ukumonako umwana wabo. Twakumene mu parka umubela amangalo. Ilintu inkashi nandi shali pamo no mulumendo, ine na ba Lars twasangile benchi kabili twalikele.

Ku ca kupapa, ilyo fye natendeke ukulanda pa fyo tukekala ku ntanshi, ba Lars bafumishe icitabo cimo mwi tumba. Caleitwa ati Ukulenga Ubumi bwa Lupwa Lobe Ubwa Nsansa. * Bampeele ico citabo no kutubulula ukuti mbelenge ifipandwa filanda pa lwa mulimo wa mulume no mukashi mu lupwa. Ankoseleshe maka maka ukuti mbelenge na malembo.

Lyene, lintu ine na ba Lars twaimine pa benchi, nafwaile ukwikata ukuboko kwabo, lelo mu mucinshi balikeene. Ba Lars tabalefwaya ukuti tutendeke ukumfwana na kabili ukwabula ukuti beshibe fintu nalemona uko balepepa pali nomba. Kwena ico calinkalipe, lelo lyene naliilwike ukuti mwali amano mu fyo bakeene kabili nali no kumwenamo nga ca kuti bali no kuba abalume bandi na kabili.

Fyonse ifi fyanengele ukuti mfwaye ukwishiba ifingi pa lwa Nte sha kwa Yehova. Ubushiku bwakonkelepo, nalandile no mwanakashi umo uo naishibe ukuti ali ni Nte, kabili twatantike ukuti pamo no mulume wakwe bakanjebeko fimo pa lwa mipepele yabo. Babomfeshe Baibolo pa kwasuka ifipusho fyonse ifyo nabepwishe. Naliimwenene ukuti ifyo Inte sha kwa Yehova shisambilisha fyashimpwa pali Baibolo. Nalisumine ukuti fyonse ifyo twalanshenye na bo fyali fya cine.

Pali iyo nshita nalekele ukupepa ku Evangelical Lutheran Church no kuleka ifya mapolitiki. Nalekele no kupeepa fwaka. Pali fyonse ni fwaka e yangafishepo ukuleka. Natendeke ukusambilila  Baibolo mu August 1990, kabili mu April 1991, nalibatishiwe pamo nge Nte ya kwa Yehova.

Ubwinga Bwabo Ubwalenga Bubili

Ba Judith: Nomba bonse babili twali Inte shabatishiwa. Nangu cingati twalipusene, bonse twalisambilile Baibolo. Ifisambilisho fya iko fyatulengele ukuba bantu bapusana ne fyo twali kale. Twalitwalilile ukusakamanana, napamo ukucila ne fyo cali kale. E co kanshi nomba takwali ica kutulesha ukuupana na kabili—kabili e fyo twacitile. Twalapile imilapo ya cupo umuku walenga bubili lelo pali uno muku twacitile fyo mu Ng’anda ya Bufumu iya Nte sha kwa Yehova.

Ba Lars: Cali cipesha mano fintu ulupwa lwesu lwaikatene na kabili! Mwandi nomba calituletele insansa no buseko!

Ba Judith: Ku bwinga kwali abana besu abaume, balupwa abengi, ne fibusa ifipya ne fya kale ifingi. Ubwinga bwaliweme nga nshi. Bamo abasangilweko balitwishibe mu cupo cesu ica kubalilapo; balitemenwe pa kutumona capamo na kabili. Balipapile na pa kumona insansa sha cine cine pa kati ka Nte sha kwa Yehova.

Abana Babo

Ba Lars: Ukutula ilyo twabatishiwe twalisekelela pa kumona abana besu babili basalapo ukupeela ubumi bwabo kuli Yehova.

Ba Judith: Jonas alitesekesha icine ca mu Baibolo ukutula ilyo acishibe ku bwaice lintu aletandalila bawishi. Ali ne myaka fye 10 lintu anjebele ukuti alefwaya ukulaikala na bawishi pa mulandu wa kuti, nga fintu umwine alondolwele ati, “batata balakonka Baibolo.” Jonas abatishiwe ilyo ali ne myaka 14. Alipwa isukulu, kabili pali ino nshita mutumikishi wa nshita yonse.

Ba Lars: Ibeli lyesu, Martin, ali nomba ne myaka 27. Lintu amwene ifyo twaalwike, calengele atontonkanyepo sana. Alifumine pa ng’anda no kukuukila ku citungu cimbi. Imyaka ibili iyapita atendeke ukusambilila Baibolo ne cilonganino ca Nte sha kwa Yehova icabako. Pa numa fye ya myeshi isano, aali uwaiteyanya ukubatishiwa. Acili talaleka amapange yakwe yasuma aya kutwalilila ukuba Umwina Kristu.

Umwana wesu Thomas, cikonke beli, pali ndakai te Nte ya kwa Yehova. Lelo kwena, tucili twalimutemwa, kabili tulomfwana nankwe. Alitemwa ifyo ulupwa lwesu lwayaluka. Kabili bonse tulesumino kuti ifishinte ifyo fwe bafyashi twasambilile mu Baibolo e fyalengele ukuti ulupwa lwesu lwikatane na kabili. Mwandi lipaalo kuli ifwe ukuti nomba kuti twaikala lyonse pamo ngo lupwa, capamo na balumendo batatu na fwe bafyashi babo bonse babili!

Ifyo Twikala Pali Lelo

Ba Lars: Tatuletila nomba twalipwililika. Lelo twalisambilila—ukuti ukutemwana no kucindikana e fingalenge cupo ukutunguluka. Icakosha icupo cesu nomba calipusana sana ne fyo cali kale. Pali nomba twalipokelelo bulashi ubwasumbuka ukutucila, pantu bonse twalishiba ukuti twabelako ku kubombela Yehova. Pali ino nshita ine na Judith twalikatana sana kabili tuleenekele fisuma ku ntanshi.

Ba Judith: Nalicetekela ukuti ifyatucitikila fishininkisha ukuti pali lelo Yehova e cing’ombe capulamo ica fyupo no lupwa icabako.

[Amafutunoti]

[Icikope pe bula 28]

Ba Lars na ba Judith ilyo bapishishe ubwinga bwabo bwa kubalilapo, mu 1973

[Icikope pe bula 29]

Abalumendo batatu balufishe ulupwa lwabo ulwaikatana lelo balilusangile na kabili

[Icikope pe bula 31]

Ba Lars na ba Judith lelo, balibweshanya na kabili ukupitila mu kukonka ifishinte fya mu Baibolo