Lintu Ubulwele bwa Mutatakuya Bwatebelela Ulupwa

ULUPWA lwa ba Du Toit lwalikwata insansa nga nshi. Ukutemwana lwatemwana ni sotambe. Nga mwalukumanya, tamwingatunganya ukuti ulu lupwa lwalishipikisha amacushi ayengi nga nshi.

Intanshi, lintu ibeli lyabo, Michelle, ali ne myaka ibili, Braam na Ann baishileishiba ukuti alikwete ubulwele bwa mutatakuya ubwa mu lupwa ubulenga imicincili ukupomponteka.

Ba Ann, banyina balondolola ati: “Mu kupumikisha, twalekabila ukwishiba ifyo twingakumamo ukutensha uulwele ubulwele bwa mutatakuya ubwa kutembula. Twalilwike ukuti ifintu nafyaluka mu lupwa lwesu.”

Lelo ilyo kwafyelwe umwana mwanakashi no mwana mwaume, ubwafya na bumbi bwalitebelele ulu lupwa. Bushiku bumo ilyo aba bana batatu bali pa nse baleangala, babili baingile ulubilo mu ng’anda. Balepunda abati: “Mayo! Mayo! Endesheni. Iseni mumone ificitike kuli Neil!”

Ilyo banyina bafumine ulubilo, bamwene Neil uwa myaka itatu nakobola umukoshi ku lubali lumo. Alifililwe ukwimya umutwe.

Ba Ann bebukisho kuti: “Calimponeshe pa musao, kabili ilyo line fye nalilwike. Nalyumfwile ubulanda pa kuti aka kalumendo akatuntulu kali no kushomboka no bulwele bwa kupomponteka imicincili ubwakwata nkashi yakwe umukalamba.”

Ba Braam, bawishi batila: “Fwe baleenekela ukukusha ulupwa lwa bumi busuma kabili ulwa nsansa, twapulikilwe fye tulelolenkana na mafya yakalamba ayo tushatalile atukwata.”

Te mulandu no kundapwa bwino mu cipatala, Michelle alifwile pa mulandu wa bwafya bumo ubwalengelwe no bulwele bwakwe. Aali fye ne myaka 14 pali iyo nshita. Neil acili aleshomboka no bulwele bwakwe.

Ici ciletako icipusho ca kuti, Ni shani indupwa pamo ngo lwa ba Du Toit shingakumamo ukutensha umulwele uwalwala ubulwele bwa mutatakuya? Pa kwasuka ubo bwipusho, natubebete inshila shimo umo indupwa shambukilwa no bulwele bwa mutatakuya.