Ukwafwa Abacaice Ukusengauka “Ulutambi lwa Mfwa”

Cinshi cilengele ukuti abacaice batemwishe ukulanda pa mfwa pali ndakai? Henry Hyde umwiminishi wa calo ca Illinois, ku U.S.A., atile: “Apo tapaba uwa kusambilisha aba abacaice ifya kwa Lesa, imitima yabo isulamo fye ifya lutambi lwa mfwa no lukaakala.”

UUBELENGA magazini wa Time alembele ukuti: “Icalenga ukuti pabe ulu lutambi lwa mfwa pa bacaice ba ndakai bafyashi abanang’ani, ifya kusekesha fyabamo lukaakala no kubulwa imibele isuma na bumupashi bwakosa.”

Ukubulwa uwa kulanda na o ni kumo ukwa mafya yakalamba yaleshingwana na bacaice. Bamo bekala mu mayanda umo abafyashi bonse babili babomba kabili tabasangwa pa ng’anda mu nshita ya kasuba; bambi bakwata fye umufyashi umo. Ukulingana no kufwailisha kumo, abacaice ku United States bekala amaawala 3.5 beka cila bushiku kabili no kuba fye na bafyashi babo ukucepako pa maawala 11 cila mulungu ukupusanako na fintu cali ku bacaice mu myaka ya ba 1960. Na kuba, abacaice bamo tababa na bafyashi babo nangu fye ukutungililwa na bafyashi babo lwa mu nkuntu.

Ico Abafyashi Bengacita

Apo abacaice ‘tabasambilishiwa ifya kwa Lesa’, wacindama shani umulimo wa bafyashi? Abafyashi ba mano balishiba ukuti abana babo balakabila ifya kusekesha fyalinga, no kuti balakabila ukubasakamana lyonse. Apo balibatemwa, abafyashi kuti balanda nabo pa lwa  kusalulula inyimbo, amaprogramu ya pa TV, amavidio, ifitabo filanda pa malyashi ya kwelenganya fye, amangalo ya pa vidio, na mafilimu. Abana abengi balafwaisha ukumfwana no kulatungululwa bwino na bafyashi babo nangu ca kuti pambi te kuti balumbulule co. Abana bafwaya ukubasuka fye mu kulungatika pantu bekala mu calo caisulamo ifishashininkishiwa. Abakalamba balekabila ukumfwikisha ukuti abana baleikala mu calo cacilishapo ukwafya ukucila cintu bena baikelemo lintu bali imisepela.

Abafyashi abafwaya ukucingilila abana babo bakulalanshanya nabo cila nshita, ukulakutika kuli bene, no kubasoka ulwa bubi bwaba mu lutambi lwa ndakai. Lintu abafyashi baimikila abana babo umwakupelela kabili baba aba mute no kuba abalangulukilako e lyo no kubatemwa, cikalenga ukuti abana babo bakule bwino.—Mateo 5:37.

Abafyashi Inte sha kwa Yehova balaibikilishako ukulalanshanya lyonse na bana babo, ukubomfya Baibolo ne mpapulo shashimpwa pali Baibolo na mavidio. * Ilyo bali pa kulanshanya kwa musango yo, taiba ni nshita ya kushimawilapo abana, lelo iba ni nshita ya kusambilila ifingakosha abana lwa ku mupashi. Muli uku kulanshanya kwa lupwa, balakutika ku mafya ya bana nelyo ukulanshanya pa filemoneka ukukosela umwana umo umo pa kuti abana babo bapokelele ukusakamanwa bakabila ngo muntu umo umo.

Abacaice abashipokelela ubutungulushi bwa ku mupashi ku bafyashi babo kuti bakoshiwa ku mashiwi yasangwa pa Amalumbo 27:10, ayatila: “Ilyo tata na mayo bandekelesha, e lyo Yehova ambuula.” Ni mu nshila nshi Yehova, Shifwe wa nkumbu, aafwila abacaice? Ifilonganino fya Nte sha kwa Yehova fyaba cubo umo abengi basanga ukutemwa kwa bantu bambi kabili balisanga ifyasuko ku fyo baletwishika. Josías, umulumendo wasangile ukuti ico ca cine, asosa ukuti: “Ukuteyanya kwa kwa Yehova kulabomba ulubali lwakatama. Naleyumfwa ukuti ubumi tabwacindama. Naikele ukwabula imifwaile, ukwabula isubilo. Ukwishiba ukuti kwaliba abantu abasakamana kwayalwile ubumi bwandi umupwilapo. Nayumfwile ukuti bamunyina mu cilonganino bapyene pe punda lya lupwa nalufishe. Baeluda ne ndupwa shabo mu cilonganino baba nge nanga lwa mu nkuntu.”

Na kuba, abacaice abengi na bakalamba baliwamyako imitontonkanishishe yabo na bumupashi bwabo ukupitila mu kusangwa lyonse ku  kulongana kwa Nte sha kwa Yehova. Patricia Fortuny, uwasambilila Anthropology, alandile pa lwa uku kwaluka mu mushikakulo alembele uutila Los Testigos de Jehová: una alternativa religiosa para enfrentar el fin del milenio (Inte sha kwa Yehova: E mipepele fye ya kwalukilako iikabako na lintu imyaka ya ba 2000 ikapwa): “Inte sha kwa Yehova balalondolola bwino no kulangilila abantu ifya kwikala mu mikalile ya cila bushiku, ukubalondolwela ifishinte fya mibele isuma ifibomba nge fya kubatungulula mu mitontonkanishishe na mu micitile.” “Ifya kwikala mu mikalile” e lyo ne “fishinte fya mibele isuma” ifiloshiweko pano fyashimpwa pali Baibolo. Pa mulandu wa ici, nangu ca kuti Inte sha kwa Yehova nabo balolenkana naya yene amafya na masakamika kwati fye bena mupalamano, balakoshiwa na mano yaibela ayaba muli cilya citabo cakokwesha. Ca cine, ba Nte balasanga icubo mu fisumino fya mipepele ifilondololwa bwino na mu fishinte fisangwa mu Baibolo.

Lintu “Imfwa Tayakabeko Kabili Iyo”

Ukufunda kupeelwa mu Mayanda ya Bufumu aya Nte sha kwa Yehova ku komaila libili libili pa bulayo bwa kwa Lesa ubwa calo cipya icili fye mupepi, “umwaikalo bulungami” kabili ‘umushakabe na wa kubatutumya.’ (2 Petro 3:13; Mika 4:4) Ukulundapo, kasesema Esaya alemba ukuti pali yo nshita Lesa “akamine mfwa ukumina kwa pe. Shikulu Yehova akafuuta ne filamba pa finso fyonse.” Abantunse balafwa pa mulandu wa bumpulamafunde bwa muntu wa kubalilapo, Adamu, lelo ubulayo bwa kwa Lesa buli bwa kuti nomba line fye “imfwa tayakabeko kabili iyo.”—Esaya 25:8; Ukusokolola 21:3, 4; Abena Roma 5:12.

Nga ca kuti uli wacaice uulefwaya ubwafwilisho, tulekulaalika ukusanga isubilo no mulandu wa kubela umumi, ukupitila mu kusambilila Baibolo. Nga ca kuti waleka Inte sha kwa Yehova ukukwafwilisha, kuti waba ne subilo lya kuti ubumi bwawamisha bucili ku ntanshi mu calo cipya ico Lesa alaya.—Ukusokolola 21:4.

[Amafutunoti]

[Icikope pe bula 9]

Abafyashi bafwile ukusangako inshita ya ku kutika ku bana babo no kumfwikisha amafya ya bana babo

[Ifikope pe bula 10]

“Inte sha kwa Yehova balalondolola bwino no kulangilila abantu ifya kwikala mu mikalile ya cila bushiku”