Bushe Kuti Mwakusha Shani Abana Benu Bwino?

Inyunshipepala ya The Gazette iya mu Montreal ku Canada yatile, “abana balasambilila ukuicindika no kuilama ilyo abafyashi babo balebalanga ukutemwa na lintu balebasalapula.” Bushe cinshi ici cibimbamo? Ukulingana ne fyasosele Constance Lalinec uwasoma sayansi ya muntontonkanya kulya ku Montreal, calicindama ukwimikila abana ifya kukonka no mwa kupeleela.

Lalinec, uupandako amano abana ne ndupwa, alundilepo no kuti “lintu twacingilila abana ku fyabipa ififuma mu ncitilo shabo, tubacingilila na ku fingi ifyo bengasambilila.” Umulekelesha kuti walenga umwana ukukanakula bwino.

Ukupanda amano ukwakokwesha pa lwa kukusha abana ukusangwa muli Baibolo kulafwa sana. Kutila: “Leka icebo cobe cibe Ee, ee, napamo Iyo, iyo.” (Mateo 5:37) Lintu amafunde yalinga yapangwa kabili abana benu bayomfwikisha, ilyo line fye shininkisheni ukuti baleyakonka lyonse. Mulecita ifintu ukulingana na filya fine mubasambilisha. Ici cilenga abana ukumfwikisha amafunde ya bafyashi ne fya kwenekela—ukuti ‘ico abantu babyala e co bakalobolola.’ (Abena Galatia 6:7; Abena Roma 2:6) Icikalamba ico kubela ukusalapwila kusuma kabili ukwa kutemwa ca kutila abana basambilile ukumfwila amafunde no kulatekanishisha ifintu ilyo fimo fyalubana, no kuti basambilile ukulolela lintu icisuma ico balefwaya cashingashinga pa kuti balundulule imibele bakabila ku kuleka bakule ukuba abakalamba bashintililwapo.

Ukupanda amano ukwalundwapo ukulosha ku co Lesa asosa ku bafyashi pa lwa kusalapula abana mu nshila isuma, kusangwa mu citabo ca Icaba Inkaama ku Nsansa sha Lupwa. Kuti mwapokelela ici citabo ca mabula 192 ukupitila mu kwisushisha akapepala kali pe samba no kutuma ku keyala kali pa kapepala nelyo ku keyala kalinga akali pe bula 5 ilya uno magazini.