Bushe Mexico Akasuminisha Sana Abantu Ukukonka Kampingu Wabo?

KU ULEMBA LOLENI! MU MEXICO

AMAIPEPELE mu Mexico yalisuminishiwa mwi funde. Nangula ni fyo, ifunde licilimo ne fibindo fimo pa lwa maipepele. Ku ca kumwenako, muli ici calo, tacaishibikwa sana ukuti umo kuti akaana umulimo wa bushilika pa mulandu wa cisumino cakwe. E mulandu wine akabungwe ka Institute of Legal Investigations, ukufuma ku National Autonomous University of Mexico (UNAM), kapingwililepo ukuti kube ukulanshanya kwa beminishi ba mu fyalo fyalekanalekana pa lyashi ilyakwete umutwe waleti “Umupampamina wa Kukanacita Fimo pa Mulandu wa Kampingu mu Mexico ne Fyalo Fimbi.” Akabungwe ka Institute of Legal Investigations aka ba UNAM ka buteko, lelo imifwaile ya aka kabungwe ili kufwailisha amafunde yapangwa ne fyo yabomba. Inte sha kwa Yehova mu Mexico shalilaalikwe ukutuma umwiminishi wa kulanda ilyashi pa mutwe wa kuti “Ifyo Inte sha kwa Yehova Shimona Umupampamina wa Kukanacita Fimo pa Mulandu wa Kampingu.”

Baprofesa Balanda mu Kushipa

Ukulanda pa lwa “Umupampamina wa Kukanacita Fimo pa Mulandu wa Kampingu ne Funde lya pa Kati ka Fyalo,” Dokota Javier Martínez Torrón, profesa wa pa Granada University of Law, mu Spain, alangilile ukuti ubuntungwa bwa kampingu e lyo ne nsambu sha kukanacita ififwaikwa fimo ifye funde pa mulandu wa kampingu kale kale fyalishibikwa mu fyalo fyonse. Alandile pa mulandu umo uwakumine Nte sha kwa Yehova mu Spain e lyo na pa mulandu wa kwa Kokkinakis mu Greece. *

Dokota José Luis Soberanes Fernández, profesa wa pa Institute of Legal Investigations iya ba UNAM, alandile pa mutwe waleti, “Ifyo Abena Mexico Basanga Pali Uyu Mulandu.” Atile, “tatwapite na mu mbali ukusosa ukuti Akabungwe ka Mexican Law of Religious Associations and Public Worship kalibinda ukukanacita fimo pa mulandu wa kampingu.” Ilyo alelanda pa Cipande ca Kubalilapo, icitila: “Ifisumino fya mipepele tafifwile nangu panono ukulesha umo ukumfwila amafunde ya ici calo. Takuli nangu umo uufwile ukusosa ukuti imipepele yakwe te kuti imusuminishe ukubomba imilimo imo no kucita ififwaikwa fye funde.” Pa kusondwelela, Dokota Soberanes atile: “Tulekabila ukwalula bwangu ifunde pa lwa mupampamina wa kukanacita fimo pa mulandu wa kampingu mu Mexico.”

Alandile pa cishinka ca kuti cila mwaka abana ba Nte sha kwa Yehova abengi mu Mexico balakwata ubwafya ku masukulu pa mulandu wa kukaana ukupika sulupu ku mendela. Bamo ba mwana Nte tabasuminishiwa no kwingila isukulu. Nalyo line, nga batwala imilandu ku cipani ca Human Rights Commission, abengi balababwesesha pa sukulu. Abakalamba ba masukulu bamo balacitako fimo ku kucingilila abana ukukanatamfiwa pa sukulu, lelo bakafundisha bamo tabapoosako amano kuli ifyo fintu. Abakalamba ba masukulu bamo tabasuusha fintu Inte sha kwa Yehova shasumina, lelo takwatala akuba ifunde lya kukonka mu masukulu ya mu Mexico.

Muli ili lyashi aba mipepele imbi na bo balilandilepo pa lwa kukaana ukucita fimo pa mulandu wa kampingu wabo, pamo ngo kubapatikisha ukubomba pa nshiku isho bamona ishashila, no kufwaya ukuti ku ncito bafwale  ifishileumfwana ne fisumino fyabo, e lyo na fimbi. Ukukaana ubushilika ne nshila shimo isha kundapilwamo na fyo fyalilandilwepo.

Inte sha kwa Yehova na Kaisare

Umo ukufuma pa maofeshi yanono aya Nte sha kwa Yehova mu Mexico alandile mu kusupawila pa lwa fisumino fya kutendekelako ifya Nte sha kwa Yehova. Alondolwele ukuti Inte balabaka ifishinte fya mu Baibolo pamo nga cilya cisangwa pali Luka 20:25, apo Abena Kristu bakambishiwa ‘ukupeela ifya kwa Kaisare kuli Kaisare.’ Alandile na pa Abena Roma 13:1, apatila Abena Kristu bafwile ukucindika bakateka ba mu fyalo umo bekala. Akomaile pa kuti Inte sha kwa Yehova bantu ababa fye bwino, abomfwila amafunde, abesha sana ukulipila imisonko, aba mikalile isuma, abasunga amayanda yabo aya busaka, no kutwala abana babo ku sukulu.

Lyene alandile pa mulandu wa mu Malembo uo Inte sha kwa Yehova bakaanina ukupika sulupu ku mendela, uusangwa pa Mafunde 10, ayaba pa Ukufuma 20:3-5 apatila: “Wilaba na milungu imbi pa cinso candi. Wilacita cabaswa, icipasho ca cintu conse ca mu muulu ku muulu, nangu ca mu calo pa nshi, nangu ca mu menshi mwi samba lya calo: wilafishinshimuna, nangu kufibombela.”

Inte sha kwa Yehova bapepa Lesa eka fye, kabili tabesha nangu panono ukupepa ifipasho. Nalyo line, Inte sha kwa Yehova tabakabale abasaalula icishibilo ca calo mu mashiwi nelyo mu ncitilo.

Pa kukomaila pa mimwene ya Nte sha kwa Yehova pali uyu mulandu, abatambishe vidio wa Purple Triangles. Uyu vidio alangisha ukushangila kwa Nte sha kwa Yehova mu Nazi Germany (1933-45). Vidio alanda pa lupwa lwa ba Kusserow, ulwali ulwashangila mu fisumino fyabo mu buteko bwa ciNazi. *

Abapeele no mulandu wa mu Malembo uo Inte sha kwa Yehova bakaanina ukubabikamo umulopa. (Ukutendeka 9:3, 4; Imilimo 15:28, 29) Alondolwele ne mibombele ya ba Hospital Liaison Committee ukushinguluke sonde lyonse. Ukulundapo, alandile pa fyo badokota ababombela pa kulepula Inte sha kwa Yehova ukwabula ukubabikamo umulopa baletunguluka.

Cila bushiku, abantu mupepi na 100 balesangwako kuli uku kulanshanya, kabili abengi baleba ni baloya. Abeminishi ukufuma ku Office of Religious Affairs mu Mexico na bo balisangilweko. Bonse abaliko balikutike ku fyo incenshi shalandilepo pali ili lyashi lya kukana ukucita fimo pa mulandu wa kampingu. Ici cintu cipya ku bapanga amafunde mu Mexico, nangu cingati mu fyalo fya demokrasi ifingi ukupala France, Portugal, Spain, na United States ukusanshako ne fyali kale ifyalo fya Komyunisimu pamo nga Czechia na Slovakia calisuminishiwa ku bengi.

[Amafutunoti]

[Icikope pe bula 13]

Inte sha kwa Yehova mu Mexico shalikatamika ubuntungwa bwa kushimikila