Kateeka wa Kupapusha

ICUNI cakulisha pali filya batila amapengwini, icainikwa ukuti kateeka, calepa ukucila pali mita umo kabili cafina amakilogramu 40. Ilyo amapengwini yambi yalekuuka ukuya ku kapinda ka ku kuso pa mulandu wa kutiina ukutalala kuba mu citungu ca Antarkitika mu nshita ya mpepo ilyo kufiita, ifyuni batila fikateeka fyena filola ku kapinda ka ku kulyo ku Antarkitika kwine! Fiya mu kucitako nshi? Ku ca kupapusha fiya mu kubiikila amani no kuleka utwana tutootwe.

Lintu cikateeka icikota cabiikila ilini, icilume bwangu bwangu cilemisha ilini ku Fikondilo ukulifumya mu menshi makaasa no kulibika mu capala tumba, e kuti inkanda yabela lwa pe samba ye fumo lya ciko. Icikota lyene ciya kuli bemba mu kufwaya ifilyo. Pa nshiku 65, muli ilya nshita yatalalisha, icilume cilaalila ilini nangu ca kuti tacilya nelyo kamo, lelo cibomfya amafuta ya mu mubili wa ciko. Pa kuti fiifwa ku mpepo ilyo filelokwa ne mfula ya buuta iyatalalisha kabili iya cipuupu ca mwela icibutuka amakilomita 200 mwi awala fye limo, ifi fyuni fyacenjela fikolongana capamo mu mabumba yakalamba, fimbi fiba ku nse ya fibiye filoseshe inuma ukulefuma umwela filelekaanina fimbi fyabako mu kati ifibiye na fyo ku nse.

Lilya line fye inshita yafika, ilyo ifikota fyabweluluka uko fyaile e lyo na mani yatootwa. Lelo fishiba shani ifilume ifili pa mabumba yashaikulila aya fyuni fyapalana? Fyumfwanina mu lwimbo. Ilyo fileishishanya umuku wa kubalilapo, filankulana mu lwimbo no kulwishiba bwino sana. Lintu ifikota fyabweluluka, fyonse pamo filemba icine cine. Abantunse kuti bafulunganishiwa fye ku congo ilyo filelila, lelo fyena ukupitila mu kulila kwine uku, fisuka fyasanga ne filume. Lyene, pa numa ya kushiimunuka ukupeela icikota akana katootelwe, icilume icili no lushile ciya cilekangaasa no kuikula pe fumo bakilomita 75 pa menshi makaasa mu kufwaya amenshi ne filyo.

[Abatusuminishe Ukubomfya Icikope pe bula 31]

Abasuminishe ni ba John R. Peiniger