Mulandu Nshi Abengi Batemenwe Ukupupe Mipashi?

Ukupupe mipashi kwalondololwa nga “ukusumina mu kuti umupashi wa muntu ulafuma mu mubili ilyo umuntu afwa kabili kuti walanda ku batuntulu, ilingi line ukupitila mu wa ngulu.”

MU 1998 icitabo cilondolola ifya kulanda na bafwa calilumbwike sana ku United States ica kuti mu kwangufyanya caishileba pa muulu wa mutande wa fitabo fyaleshitwa sana ifyo batantike mu nyushipepala ya New York Times.

Imyaka inono iyapitapo, bapolitishani na bashimakwebo ba ku Moscow, batemenwe ukuya ku ng’anga, uko balepoose ndalama ishingi pa kubukisha.

Ku Brazil, amafilimu ya pa televishoni ayalanda pa fya kupupe mipashi yalatambwa na bantu abengi nga nshi.

Ku mintapendwa ya bekashi ba muno Afrika na bena Asia, ukupupe mipashi kwaliseeka nga filya kwaba ukukabushanya kwa fintu pa mushiika.

Umulandu Abengi Batampilo Kupupe Mipashi

Abengi batampa ukupupe mipashi pa kwenekela ukuti bali no kusanga icisansamushi pa numa ya mfwa ya mutemwikwa wabo. Ing’anga shibeba ifyebo fyaibela ifyumfwika kwati uwafwile e ulelanda. E mulandu wine, ilingi line abafwililwe balaba abashininwa ukuti abatemwikwa babo abafwa bali abomi kabili ukulandako na bo kulabakosha kabili kuti kwabalenga ukushipikisha ku bulanda bwa mfwa ya muntu wabo.

Bambi na bo balasembelekwa no kwamba ukupupe mipashi pa mulandu wa kumfwa kuli bambi ukuti imipashi ili no kubafwa ku kusanga ukundapwa, ukusange cuma, ukutemwikwa, ukupwisha amafya ya mu cupo,  nelyo ukwingile ncito. Kabili abantu abengi balukila ku kupupe mipashi pa mulandu wa kuti fye beshibepo fimo.

Cimbi na co icilenga abantu abengi ukwalukila ku kupupe mipashi kufwaya ukwishiba fintu ukupupa imipashi kwaba, incenshi mu fya kupupe mipashi yatile ukupupe mipashi kwaba “kupepa na kumbi” ukwabako pa nshita ntali “pamo no buKristu.” Ificita ababa mu mipepele ku Brazil kuti fyalenga twaumfwikishe ci.

Icalo ca Brazil e cafulishamo baKatolika pano calo, lelo ukulingana na fintu kalemba Sol Biderman atila, “imintapendwa ya basumina balaya mu kusanika bakandulo babo mu macalici na mu fifulo fya kupupilamo imipashi, kabili bamona [ukuti] ukucite co kwaliba fye bwino.” Na kuba, inyunshipepala ya ku Brazil iifuma cila mulungu iya Veja yashimike ukuti pa bantu baya mu fifulo fya kupupilamo imipashi ku Brazil paba abantu amapesenti 80 ababatishiwa mu Katolika na ku Minsa balaya. Cimbi ca kuti nangu ni bashimapepo bamo balasangwa mu ncende sha kupupilamo imipashi, e co umuntu kuti aumfwikisha umulandu abengi abasumina bamwena ukuti ukwalukila ku mipashi pa kusanga icisansamushi no butungulushi fyalisuminishiwa na Lesa. Lelo bushe ifi e fyo caba?

[Akabokoshi ne Fikope pe bula 3]

Inshila Shalekanalekana Isha Kupupilamo Imipashi

Kwaliba inshila shalekanalekana isha kupupilamo imipashi pamo nga ukwipusha ku cipao ca bafwe, ukubuusha ku bafwa, atemwa ukubuke mbuko. Ukubuka kwaliseeka sana mu kupupe mipashi, kwaba kufwayo kwishiba ifili no kucitika ku ntanshi nelyo ifishilaishibikwa ukupitila mu mipashi. Inshila sha kubukilamo shaba kupendule ntanda, ukusobela kwa kubomfya crystal-ball, ukulongole filoto, ukubelenga imipelwa ya ndupi, no kusobela ifisuma ukubomfya injuka shitwa tarot.