Ukubomfya Televishoni Bwino

AKABUNGWE kalanda pa maprogramu ya pa milabasa mu United States kalandile pa mutwe wa lyashi waleti, Not in the Public Interest—Local TV News in America (Umulabasa wa cikaya uwa TV News ku Amerika—Taunonsha Icintubwingi). Katile TV yaba kwati ni “ulya ashimikila abana utushimi, nelyo uushala alelela abana kabili ilambukila icintubwingi.” “TV ilasangwa ukuli konse . . . Ukupala icushi ca ulepeepa fwaka, yaba fye mpanga yonse.” Kabili filya fine fye ukupeemako icushi ca ulepeepa fwaka kwabipa, e fyo no kupoosa inshita ikalamba ukulatamba TV ukwabula ukusalulula ifya kutamba kwabipa—maka maka ku bana.

Ukulanda pali bumpulamafunde e lyo no lukaakala lwa pa TV, ilyashi limo line lyatile “ukutamba amafilimu ya lukaakala lwa kwelenganya kulasonga imisambililile ya bana, ukubalenga abakalushi no kukanaba ne cililishi.” Mu 1992 akabungwe ka American Medical Association kasosele ati: “Ulukaakala lwa pa TV ni cimo icileonaula imibele isuma iya bacaice.”

Kuti mwacincintila shani ukusonga kwa maprogramu yabipa aya pa TV pa bana benu? Ilyashi lyatantikeko fimo ifingacitwa, ifyalandilwe na batubungwe tulanda pa bumi bwa bantu pa fya kubomfya bwino TV. Fimo pa fyalandilwepo ni fi fili pe samba.

◼ Tantikeni no kwimika inshita ya kulekelapo ukutamba TV. Imikeni inshita abana bengafishapo ukutamba. Mwiesha ukubika TV mu miputule isendamamo abana.

◼ Bikeni mapu wa cibulungwa ca calo mupepi na TV pa kuti abana balefwaya no kusanga incende sha pano isonde isho baletamba pa TV.

◼ Tambileni TV pamo na bana benu pa kuti mulebalondolwela ifya cine cine ne fya kwelenganya fye. Abana abengi abashilakumanya imyaka 10 tabeshiba ifili ifya cine cine nelyo ifya kwelenganya fye.

◼ Fumyeni TV palya ikala mu mwenu. Ibikeni mu kabineti no kuikomena. Ici kuti calamuletela umulele wa kuifumya, ukwasha no kutendeka ukufwaya ukwa kutamba.