Ukufika pa Fishinte

UKUMFWANA kwa pa kati ka nko, bumunyina, umutende—nani uushingatemwa iyo mibele ishaiwamina? Uwabukulwile ama Olympic, Baron Pierre de Coubertin, asumine ukutila amangalo kuti yapwisha ukucimfyanya kwa nko ukupitila mu kucindikisha bakangala ba mangalo ukwabula ukusakamana umushobo wabo, uko bapepa, nelyo ukubamona ukuti teti bafikepo pantu banakashi nelyo baume. Ashininwe ukuti “icalo cisuma kuti calengwa fye na bantu basuma.” Lelo bushe kwena amangalo kuti yaleta umutende wa mwi sonde lyonse? Nga twalolesha pa fyacitika ku numa, kuti twatila nakalya.

Nangu ca kuti amangalo tayabipa, amasomo ya mu Baibolo e yafwaikwa pa kutwala pa ntanshi umutende wa cine cine. Ca cine ukuti ifishinte fya mu Baibolo kuti fyalenga abantu ukuba “abawaminako,” nga fintu Coubertin asosele. Moneni amalembo yamo ayatwala pa ntanshi umutende pa bantu abayabomfya, te mulandu no luko babamo.

“Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:35.

“Nga cingacitwa; mube aba mutende ku bantu bonse nga caba mu maka yenu.”—Abena Roma 12:18.

 “Lyonse ilyo twaba ne nshita, tubombe icisuma kuli bonse.”—Abena Galatia 6:10.

“Mwicita cintu mu kuisakamana nangu ni ku matutumuko, lelo mu kupetama mutunge abanenu ukuba abacila imwe bene.”—Abena Filipi 2:3.

“Ukutukusho mubili kwafwa panono, lelo bukapepa bwafwa ku fintu fyonse, pa kuba ne cilayo ku bwikashi bwa nomba no bukesa.”—1 Timote 4:8.

Bushe ifishinte fyaba muli aya malembo filabomba icine cine? Moneni icacitike ku Munich, mu Germany. Mu 1974 imyaka fye ibili pa numa ya Mangalo ya ma Olympic ayabelele mu musumba ulya, yafulunganishiwe no lukaakala e lyo no bukomi, Inte sha kwa Yehova shakwatile ukulongana kwa pa kati ka nko mu cibansa cine ica Olympic Stadium. Pa basangilweko, pali abafumine ku Greece na ku Turkey—ifyalo ifyalelwishanya. Na kuba, muli lulya lwine lusuba, abashilika ba ku Greece na ba ku Turkey balelwila icishi ca Cyprus. Bushe ici cali no kukuma Abena Kristu balesangwa kuli ili ibungano? Napacepa! Fintu cali ica kukoselesha ku baletambako ukumona abaGriki na bena Turkey balekumbatana no kulaitana ati munyina no kuti nkashi!

Inte sha kwa Yehova shaishibikwa isonde lyonse pa mulandu wa kulenga abantu ba nko shimbi, aba mishobo, na ba mikowa imbi baleumfwana mu mutende. Kwena, tabatunga ukuti balifika pa kwikatana no kumfwana kwapwililika ukwa mwi sonde lyonse. Apo baba fye ngo uuli onse, bakabila ukubombesha ukukonka ukufunda kwa Bwina Kristu ukwa mutumwa Paulo ukwa kuti: ‘Fuuleni ubuntu bwa kale ne micitile ya buko, no kufwalo buntu bupya.’ (Abena Kolose 3:9, 10) Nangu cabe fyo, balisumina icine cine ukuti ukukonka ifishinte fya mu Baibolo kuti kwayafwa abantu ‘ukufwaya umutende no kuukonkelela.’—1 Petro 3:11.

Ku ca bulanda, te mulandu ne fyo ifishinte fya ma Olympics fyawama, ama Olympics yalenga abengi ukuba ne mibele yabipisha icine cine. Ukupusanako, Icebo ca kwa Lesa ica maka cilenga abantu ukuba abasuma, ukutwala pa ntanshi ubusuma no mutende.

[Ifikope pe bula 24]

Ama Olympic yalatwala pa ntanshi ukucimfyanya

[Abatusuminishe]

Aus dem Fundus der MÜNCHNER OLYMPIAPARK GMBH, München

[Ifikope pe bula 25]

Baibolo itwala pa ntanshi umutende