Ukwafwa pa kulubukako Kuli Bucintomfwa

KU ULEMBA LOLENI! MU FRANCE

Ifintu filecitika mu misumba iingi iya mu France filetiinya nga nshi, pantu filelangilila ifyo bumpulamafunde bufulile muli shilya ncende sha mu misumba iyalekeleshiwa. Magazini wa ci French uwitwa L’Express alondolola ukuti, “ulukaakala mu ncende ya mu misumba nalufulilako nga nshi mu myaka 6 iyapitapo.” Icicililepo ukupapusha ca kutila, impendwa ya bacaice abaiposele muli bumpulamafunde naikula icine cine.

Ukulunda pa kuitumpa mu konaula ifintu, ukushitisha imiti ikola, ukufinsha, ukoca ifipe, no kwiba, bacintomfwa balefwaisha maka maka abantu ababombela Ubuteko. Bakapokola, abashimya umulilo, e lyo na banamutekenya, na bo balacushiwa libili libili kuli aba bacintomfwa.

Mulandu nshi ulukaakala lufulile fi? Abasambilila ifya bwikashi babili balondolola ukuti, “Icilenga caba kubongoloka kwa ndupwa ishingi, e lyo no kwimina fye conse icimininako ubulashi.” Na kabili balandile “pa [misepela] ukuyumfwa abalekeleshiwa ku bafyashi babo” kabili pamo nga “abashakakwate inshita ya ku ntanshi iisuma.”

Inte sha kwa Yehova bashimikila ubukombe bwa mu Baibolo ubwe subilo libili libili mu ncende yafulamo bucintomfwa. Pali programu waishile nomba line pa mulabasa wa televishoni mu France, kalemba we lyashi alandile ukuti: “Inte sha kwa Yehova bashinguluka mu ncende sha mu matauni ishimoneka ukuba ishalekeleshiwa kuli bakapokola, ababombela abekashi, na kuli kamfulumende. Muli ifi fikuulwa na mu misebo, balasosa kabili balakutika.” Mu mulimo wabo mwalifuma ifisabo ifisuma, nga fintu kalata afumine ku wacaice uubelenga Loleni! alondolola.

“Ndemutootela ukufuma pa nshi ya mutima wandi pa mpapulo shenu. Pa lwandi mwalingafwa sana e lyo nomba nalitendeka ukumfwana na bafyashi bandi. Ndi ne myaka 16 kabili ndi Mushilamu.

“Cintu ndefwaya ukulanda ca kutila mwalinenga ukufuma muli bucintomfwa. Pali uyu mulandu, nalitendeka ukukonka imipepele yandi bwino, lelo ndabelenga na Baibolo. Mwalinenga kuti ntwalilile na masambililo yandi. Icacilapo ukuwama, mwalyafwa abantu abengi mu ncende njikala ukulubukako kuli bucintomfwa ilyo babelenga bamagazini benu—abo mbaashimako cila mweshi. Ndemutasha nga nshi”.